香茅豬扒+醋意菠菜卷

買佐舊帶骨豬扒，原本打算整吉列豬扒，臨時轉軑，想食香茅豬扒。

通常屋企我都會買定幾枝新鮮香茅，用廚房紙包住香茅之后裝入膠袋，擺入雪櫃急凍住佢，用既時候先至取出切用，用幾多切幾多。急凍之后的香茅，可以保存住水份同埋味道起碼半年以上。

好似果日咁，想食香茅豬扒，話咁話，D材料就有齊。

雖然出邊有配好味道的香茅豬扒醃料，不過我都係鐘意自己隨心配搭做出自己獨有的味道，所以醃依味豬扒，我就用佐：

材料「干蔥頭、薑蓉、香茅蓉、芫莤籽粉，豉油，糖，生粉」

拍鬆佐豬扒之后，用醃料醃二個鐘或以上令佢入味。

 

然之后煎熟就得啦。。。

不過有無人可以話俾我知，點樣煎豬扒較好食咧？

係猛火快煎，定係細火慢慢煎？

我覺得我煎得太耐，好干身，下次我會試下用大火快煎，可能會保留住肉汁，口感上會好食D。

我整多一個薑蔥甜豉油汁伴食。

咁可以降低少少豬扒本身被我煎得太干身的失敗之處。都叫可以送得下碗飯咁羅。

不過整體而言，依味豬扒除佐個味OK，咁干爭爭既口感，都叫幾失敗。。。。

（突然想起，阿蘇係節目中成日鬧D人用「口感」二個字去表達自己對於食物的感覺，其實「口感」二個字嚴格來講，當一個人要去表達自己對於食物的感覺的時候，係作名詞咁用，如果名詞之前或之后跟有詳細的形容表述，我覺得無可非議，根本係阿蘇自身缺乏對於事物的想像力，因此一概否定別人對於「口感」一詞的使用，係非常貽笑大方的一件事）

 

除佐豬扒，另外整佐一味菠菜卷。

作法：

1，菠菜洗凈之后連根燙熟，咁作會比較方便后邊的製作。

2，菠菜好快熟，所以大約汆燙一分鐘左右即可，然后過冰水。

3，用保鮮膜，將菠菜分成兩綑包扎好，擺落雪櫃備用。

4，食之前，將菠菜分切成一段段。

跟住淋上一個由「生抽、白醋、味醂、麻油、檸檬」配搭成的醬汁

食之前淋少少炒香的花生碎，搞掂~！