簡單請客食譜--印尼蕉葉焗魚、白汁伴煙肉豆腐

其實生活係香港真係好幸福的一件事。

因為除佐可以品嚐到世界各地美食之餘，有興趣的話，亦可購入異國風味的食材自己烹製一番。

小至香蕉葉這類農產品亦可輕易在泰國或印尼商店買到新鮮空運到本港的產品。

且售價低廉，一大包才不過五元港幣。

是日買佐包香蕉葉，整一味印尼蕉葉焗魚食。

所需材料基本上係印尼或者泰國商店都可以買齊。

「干蔥、香茅、蕃茄、青檸、檸檬葉」

調味香料「咖喱粉、椰子粉、豉油、黑糖（或砂糖）」

作法：1，將所有材料舂碎剁碎之后，落鑊炒勻炒出香味。

2，將步驟1炒香的材料舖係魚腩上邊。（我用佐一舊魚腩黎整，可惜無買到倉魚，如果用倉魚黎整，口感上會更嫩滑好味。）

3，將蕉葉包好。我手工奇劣，雞手鴨腳包得亂七八糟，總要出動埋訂書機先至搞掂，真失敗。

4，跟住入焗爐，二百度火，焗佐十五分鐘。（焗既時間視乎自己所用材料的大細決定，我舊魚腩較細，不過較厚，所以十五分鐘差唔多）

睇下，就咁簡單，一味充滿濃濃的異域風味的蕉葉焗魚就咁簡單。。。。

因為加佐蕃茄加埋有咖喱同椰粉的味道，焗一焗之后蕉葉本身的清香亦滲透入魚肉度，食起上黎，味道濃而不俗，非常精彩，基本上如果係屋企用依味餸招呼人客，賣相已經好嚇得到人，食落既味道更具大廚風範，好值得推薦~~

再介紹多一味亦都好適合係屋企招呼朋友時整黎食既餸菜。

買佐一包煙肉，話係低鹽，試下個味如何，起碼個外觀上睇，個肉色好正常，唔會太嚇人，心理上都舒服D。

係街市買佐一舊佈包豆腐，依种豆腐較為硬身，因為整好的豆腐再用佈包住壓過，無咁多水份，最適合用黎煎。

做法：

1，先將豆腐切片，落少少油，將豆腐煎到二面略略微微焦黃。

2，用煙肉包住豆腐，跟住就咁煎熟煙肉。

3，二面四邊都煎一煎香，睇到略略焦黃就可以。

 

 

因為唔想視覺上太單調，我另外烚佐半舊西蘭花，跟住擺好碟。

基本上到依步，我都無落過任何調味料，因為煙肉本身係帶有少少咸味，煎既時候D咸味會滲入到無任何味道的豆腐入邊。我就係想食到最本真的豆腐同埋煙肉的味道，所以就乜調味都唔使落。

跟住就整個白汁啦。

我買佐隻新既忌廉，係德國既厚忌廉，價格都係十幾蚊就有交易，我都係試下個味如何。（結果個味道都OK架，而且價格又平，份量又小，唔使買太大用唔晒擺到變壞，好值得推薦）

1，整白汁好簡單，先用少少牛油，落少少面粉，將面粉炒勻。

2，跟住落忌廉，落鹽，落黑椒粉（黑椒我通常都係食之前先至磨碎，咁個味先至夠香），我剩有少少蘑菇，係整蘑菇奶油湯剩低既，都加埋落去。

再落少少水，煮到個汁少少結，咁就謂之OK啦。

跟住將個白汁淋上擺好碟既煙肉豆腐度，咁依味餸就完成了。

豆腐本身係無乜味既，勝在夠百搭，又易入口，加埋個白汁可以將二者的味道更完美的聯繫起黎，基本上一啖一個，食相清雅，製作唔使好大陣仗，輕鬆完成~~~

依味餸都可以預先將西蘭花同煙肉豆腐整好，食之前擺入焗爐整番熱佢，跟住再整個白汁淋上面就食得，所以又係請客食果陣時好值得推薦的一味餸黎架~~~

個賣相都唔差架`~

而且依味餸係本小姐原創架，出邊如有雷同，實屬巧合~~~

睇下，二味好簡單既餸菜~~~