豆角的故事（二）之豆角包

上一篇提過，另一半的白豆，俾人斬成一碌碌之後，佢嘅命運，將何去何從？

今日詳細同大家講述返，依半一碌碌的豆角，佢嘅前世、與今生~~

前世佢係一條條嘅豆角，今天，佢俾人斬成一碌碌之後，再配搭上些少的木耳絲~~

豆角雖美，都需要肉來陪。

所以買佐一盒免治豬肉，完全無需事前做任何處理，直接落鑊無落油，生炒。

無醃過嘅肉，一炒熟，就會自動散開成一粒粒啦~~

炒好的肉碎，撥過一邊。

豆角同木耳絲，正式落場~~~

無可避免地，豆角與木耳，都一樣需要經過油煎的洗禮，先可以成就佢光輝的一生。

為佐令到所有材料顯得更加出色，我落佐「生抽、老抽、雞粉、少許糖，重手胡椒粉」炒炒炒~~~

炒到香噴噴~~~

然後，準備好一份軟綿綿的發麵團，將炒好的豆角餡料，包起佢~~

蒸七八分鐘至熟即可~~

幕後花絮，蒸嘅時候，係蓋包住一塊佈，等倒汗水無得滴上包包度~~

睇下，全無添加的自製包包，出籠啦~~

依個時候的豆角，完成佢最終的歷史使命，雖然已面目全非，不過，佢將深深記憶在我胃部的最深處~~

第二日早晨，隔水蒸返熱佢~~

即刻又變得軟綿綿，香噴噴~~

國際慣例，切開一半睇下~~~

豆角炒過再包起再蒸過之後，果種獨特的清香，無與倫比~~~

美美的早晨全餐，就係咁樣~~

包皮的做法寫得太多，所以我著重點在於「豆角餡料的製作」上，對豆角有興趣的朋友，不防一試~~

聽日，聽日請繼續聽我講述，最後的豆角~~~