蝦膏蒸肉片、鹽煮冬瓜

天熱到頂唔順，因為頭發又長又厚，咁就搵佐一個據稱「獲獎無數」嘅師傅幫我打理下個頭發，唉，永遠你去整頭發，你講「修少少」之後嘅結果，都係同預期嘅效果爭十萬八千里，頭發剪短到我想喊啊~~

短都唔緊要啊，完全個發型都唔係我想要嘅效果~~

整完頭當晚失眠佐成晚，無誇張啊，真係失眠㗎，可想而知頭發對於女性嘅重要性。

係要過佐兩日先諗通佐，頭發會再生返長，到時生返夠長再去整過另一款發型，而且依排咁熱，索性將頭發綁起個馬尾，咦，又幾清爽，幾舒服喎~~

所以幾時都係咁話嘅，錯誤未必就係死路一條，諗通佐，接受佐，就再無問題。

早兩日連續買佐幾部風扇。

入夏嚟，已經開佐個幾月嘅冷氣，電費貴不在話下，又超級唔環保，所以星期六同強哥走去買佐部掛牆風扇裝係睡房，半夜無咁熱嘅時候可以熄佐冷氣轉開風扇。

貪心啦，叫我同強哥咁鬼貪心，見到有一款成16吋大嘅風扇，寫住「超勁量風速」，諗起咁勁風，一定夠哂涼爽啦，即刻買返嚟即裝入睡房~~

咁就閉傢伙啦~~開著佐一試吹向自己，強哥第一反應係「嘩，龍卷風」~~~

唉，個風扇果然無呃人，真係超勁量風速，但係我啲無諗過，瞓覺太勁風會吹到頭都痛，而且聲又大，風又硬，完全唔掂啊~~~

鬼叫我啲貪心，聽到勁風就以為有著數即買返嚟咩~~

諗佐一晚，第二日覺得好唔掂，同強哥商量過，不如索性徹底轉用風扇為主嘅居家生活啦，咁廳都裝返把風扇好喎，咁最適合嘅，就係房嘅依把超勁風扇，將佢移師到廳嘅一角，勁風啊~~

哈，估唔到錯有錯著，雖然裝係房好唔妥，不過裝係廳，空間夠大，個風咁勁，就恰到好處啦，哈哈，咁就無有錯啦~~

尋晚同強哥係廳睇電視，開住部「龍卷風」，強哥笑稱「開一號風球」已足夠。

一號風球嘅即係一檔風速，一檔風速已經足夠，你話，佢真係幾勁風~~

睡房吸收佐第一次買風扇嘅經驗，所以第二日再去買風扇，就買佐一部風力較柔和，又夠靜音，總有遙控嘅風扇返嚟，比之前果部細，12吋，足夠啦~~

哈哈，所以俾都希望買風扇嘅網友一個心得啦，如果買房嘅風扇，記得要選擇最適合㗎啦~~

依家廳又有風扇，睡房又有風扇，同強哥都好滿意兩款風扇各就其位，真係錯有錯著~~~

開少啲冷氣，慣佐之後，用風扇其實都可以接受得到㗎~~

廚房都裝佐一個細細七吋嘅夾扇，咁係廚房煮到好熱嘅時候，細細嘅風力，都有少少作用㗎~~

今日唔想做嘢，晏晝叫強哥返嚟食飯，係街市求其買佐件上肉，12蚊一舊仔。豬肉佬問我點整，知道我要蒸肉片，即刻主動提出幫我切好片，今時今日，咁嘅服務態度，先係㗎嘛~~

幾方便，返到嚟洗一洗肉片，然後落少少砂糖，少少薑絲，一細匙生粉，一細匙蝦膏，將所有材料撈勻即可。

先蒸落碟飯，蒸十分鐘等飯面收水，係飯面擺兩枝筷子，然後將撈好味嘅肉片擺上去，繼續同飯一起蒸多12分鐘。

飯好餸好~~~

強哥一入屋就即刻叫話「香、香、香」

好好餸飯~~

買件冬瓜，超級便宜，三蚊厚厚一大舊，晏晝切半嚟食。

冬瓜切片，準備一細舊薑同少少蒜蓉。

肉片少少幾塊，同薑落鑊乾煎至熟。（因為肉有少少肥膏，所以我無落油）

因為肉片都無乜人會食嘅，我落埋幾片都係想個餸會甜啲，咁就無需落雞粉果啲。

肉片煎到乾身之後倒入冬瓜，倒入生蒜，略略翻炒幾下，落水燜三五分鐘至熟。

揭蓋之後俾少少鹽調味即可~~

除佐鹽，其它咩調味都完全無需落，咁樣先至可以食得到冬瓜本身嘅清香。

同埋我依家基本上炒餸，都唔會先用油爆香蒜頭，而係直接倒入生蒜去煮，咁樣一嚟可以保持住蒜頭本身具有加促細胞新陣代謝同殺菌嘅功能，二嚟生蒜可以比較保持得到本身嘅味道，餸菜入有佐蒜，係會有少少唔同嘅味覺層次嘅~~

熱天我最鐘意食嘅鹽煮冬瓜~~~

今日晏晝嘅全家福`~