茄子

授人以魚，不如授人以漁。

第一個魚作名詞解，第二個漁做動詞解。道理好淺顯，俾條魚一個人，唔算係真心地幫助，教識佢實際的捕魚技巧，先至叫長遠解決問題的方式。

我好尊重肯無私同人分享自身經驗的所有行為，因為經由別人失敗而後得出的結論，可以令自己少犯好多不必要的錯誤，我選擇煮食做為自己寫BLOG的主題，除佐如實記錄自己每餐的煮意，更重要係想同多一些人分享自己一路煮食得出的心得，俾果啲同我一樣，希望掌握到更多「捕魚」技巧嘅朋友，一個分享嘅地方。

我唔係大廚，只不過係一個煮佐幾年飯嘅師奶仔，只不過因為一路不斷留意及積累一切煮食過程中的技巧，先可以令到自己依家隨手拈來，都可以煮返三幾味。

好多餸菜我根本係第一次煮，好多食材我根本係第一次接觸，不過有佐煮食的技巧做底蘊，就算係第一次煮，亦都全無困難。

有網友同我抱怨，食譜內無一個詳細的份量對於全無煮食經驗嘅人來講有難度，其實，如果我將所有材料份量詳細記錄落嚟，意義不過如同俾一個人一條魚，可以飽食一餐而已，我儘量詳細地同大家分享自己一路積累落嚟煮食的心得同小技巧，最主要的目的，係希望睇嘅人可以掌握到如何「捕魚」的技巧，咁就算任何材料到佐手上，無需一個食譜，都可以輕鬆煮出一味最適合屋企人口味的餸菜。

做一個聰明人，無需去稀罕一條魚，更應該去追求的，係如何捉到一條魚。

~~~~~~~~~~~~~~~~~~~~~~~~~~~~~~~~~~~~~~~~~~~~~~

依日整茄子。蒸飯依排我都係設好蒸20分鐘，所以等飯煮到15分鐘嘅時候，我就將切好粗條嘅茄子入去，一起蒸多5分鐘至大半熟。

1、凈鑊落豬肉，生炒至熟，我用免治豬肉，無需要醃，直接落鑊煸出香味至熟。

2、落蒸好的茄子入去，落一湯匙油，落埋生蒜，生蒜味道較濃，配埋茄子極香。

3、落少少鹽同生抽，少少砂糖調味，鐘意辣辣哋，所以落多一細匙麻辣醬。

因為茄子我蒸佐五分鐘左右，其實未得夠熟透，所以落多二湯匙清水，冚蓋焗二分鐘至茄子腍軟並入味，搞掂~~

後嚟我發覺蒸嘅時候蒸十分鐘左右，咁茄子就完全熟透腍軟，咁就無需再加水燜焗嘅依個步驟。

另外，燜煮一切的食物，熄火後，唔好即刻揭蓋，等食物在鑊裏漸漸冷卻的過程中繼續燜煮一陣間，讓一直猛火烹煮的食物，享受一下突如其來的密室溫柔，咁樣就算再硬的食物，都會在你手裏變成繞指柔~~

對食物如此，對男人，亦如是~~

因為已經熟佐嘅茄子係唔會再吸入過多嘅油份，所以最後再落油炒一炒嘅目啲係令到茄子表面更香，咁樣炒好嘅茄子效果，同走過油嘅茄子一樣，又香又軟，一啲都唔會覺得生水，我同強哥都勁鐘意茄子嘅味道同口感，所以，咁樣一碟餸，超級好送飯~~

另外炒多碟豆角。

豆角切好粒粒之後先落鑊炒至軟身，俾少少鹽調味。

然後倒入蛋液。

翻炒至定型即可~~

豆角我專登炒到好軟身，配埋蛋炒到香香，好好味㗎~

全家福~~