豆角的故事（三）之自製酸豆角

豆角的故事，已嚟到尾聲。

並非故意拖到咁耐先寫出嚟，實在依一款豆角的製作需時幾日，所以要等製作完成食佐落肚真係好味，先再話俾大家知做法與過程。

事實證明，雖然係第一次做，不過因為實在太簡單之故，全無失手之虞。

係網上見過網友自製酸豆角，不過做法我就覺得過於複雜，而且失敗率好似幾高下，所以自己諗過其中的道理之後，改良簡化成一個最簡單的做法。

做法：

1、豆角洗乾淨，略略晾乾水，然後切成一粒粒。

依處要留意，豆角切嘅時候，一定唔可以痴到油，所以要保證刀同針板的乾淨。

2、將切成粒的豆角，灑上一匙粗鹽，然後搓一搓勻，等鹽均勻地與豆角粘上。

鹽越多制成品就越酸，所以鹽的份量，我只會落比平時煮餸嘅量稍多幾粒就夠。

3、搵一個密實盒，將撈好鹽的豆角倒入密實盒，然後包住一層保鮮膜，跟住蓋好蓋

依個步驟，就係要令到豆角在密封的狀態下與鹽結合產生發酵的作用，發酵的豆角就會自然變酸，而且因為係密封的狀態下，無其它細菌在其中滋生，所以豆角除佐酸味，唔會變壞或者有其它異味。

因為豆角發酵的過程會產生氣體，所以豆角同容器要保留一定的空間，不要落得太多，同埋酸性會對塑膠產生腐蝕作用，所以我建議最好用玻璃或者不銹鋼或者陶瓷一類耐酸性的容器去製作，同埋一次過唔要整太多，因為擺得越耐，豆角就會越酸㗎啦，所以一次整少少，食完再整，就比較好控制個酸度。

要留意一點，等豆角發酵的過程，一定唔好擺入雪櫃，因為低溫之下會抑制細菌的滋生速度，咁就要等好耐先可以整到豆角變酸，所以，上個步驟整好之後，就將佢隨意地擺係任何一個雪櫃以外的地方即可。

天氣越熱整好的時間就越短，好似依家天氣咁熱，基本上二至三天已經成熟酸透可以食得㗎啦。

我係上個星期三嘅下午開始整嘅，基本上到佐星期五嘅時候，已經可以睇到豆角變黃，即係已經發酵變酸~~~

但係我唔想咁快食，又唔想佢太酸，所以就將佢擺入雪櫃，低溫之下可以減緩豆角繼續發酵的速度，咁就唔會一直咁酸落去啦。

到星期六，阿媽嚟我度食飯嘅時候，從雪櫃取出酸豆角，炒俾阿媽食。

睇下，已經變到黃色㗎啦，好夠酸啦，而且一啲異味都無，凈係純正的豆角的酸味~~

阿媽都話好多年無食過酸豆角，所以一見到，已經流哂口水~~~

一聞到味道，即刻叫話好正好正，教佐阿媽做法，佢話返去都要整嚟食~~~

炒酸豆角就太簡單啦，免治豬肉唔洗醃，就咁落鑊炒散，然後落少少蒜蓉同炒，倒入酸豆角，辣椒乾，俾少少糖中和酸味，俾少少水燜熟，炒乾身即成~~

熱天食咁樣一碟酸咪咪的豆角，真係舒服到無得頂~~

如果從來無食過豆角酸的朋友，真係要試一試，熱天愛嚟送粥，真係一流㗎~~

另外咸雞一碟。用耐高溫保鮮紙包住，上鑊略略蒸一二分鐘。

咁樣食起上嚟口感溫滑好多~~

我斬雞都叫OK嘅，阿媽都贊我斬得靚咧~~

炒多碟薯仔絲~~

全家福~~~

係樓下惠X買佐一個金枕頭，今年都係買佐第三個，最靚係依次，啲核薄到咧，個肉厚到咧，口感滑到咧，個味香甜到咧。。。。

強哥一咬落去，即刻幸福到咪埋眼「好好味啊」~~~

阿媽同我話「強仔鐘意食，你咪經常買俾佢食啦」

我話「好食都唔可以日日食㗎，肥㗎嘛」

阿媽答我「肥咩啊，細個時我屋企後面日日有榴蓮熟到跌落地，我同你舅父一日食幾個，連飯都唔食，一樣無事啊」·~￥#·￥￥%#￥—

好食，都係有節制啲嘅食，先好味㗎~~

阿媽，你咪太縱阿強仔啦~~~