大包

我有一個特別可愛的腦部組織，唔開心嘅事我通常會真的遺忘佢，好似從來無發生過一樣，全無困難，如果唔係旁人提我曾經發生過嘅不愉快，我真係完全記唔起。

又唔係話我記性差，好多年前曾經發生過，好細節嘅嘢，我都可以記得一清二楚，唔知其它人最細嘅記憶可以去到幾時，我就連兩三歲時曾經係屋前的龍眼樹下捉到一隻色彩斑斕的小蟲，然後將佢擺入一個淡紫色嘅牙刷膠盒內嘅事情，都清楚記得。

腦部嘅運作真係好奇特，為佐保證我可以有一個開心嘅人生，佢會自動幫我選擇性地去記憶定遺忘，有時靜止係度嘅時候，我會專程閉上眼，去返腦海深處尋找返一些自己過去的片段。

尋日俾我諗返起，二十年前的一個午後，我約佐朋友仔出街玩，出門之際阿媽叫住我，著我一定要帶返頂帽先好出門，清楚記得阿媽同我講「今日氣溫高成30℃，帶返頂帽先好出門」

係㗎，二十年前，30度已屬高高溫，當時就算盛夏，平均氣溫都係28或29度左右，熱極都只不過撥下扇仔就可以捱過一個夏季。

當時有一個新聞，話過多十幾年後，成個地球會越嚟越熱，到時平均溫度會比現在（即係二十年前）高多二三度左右，我清楚記得當時聽到咁樣嘅新聞，總嚇到拍拍心口「嘩，如果成日都係31或者32度，咁咪死得」

時間返到今日，話咁快，就到佐2011年，今時今日，隨便32、34、36度都已經習以為常，可能好多人已經唔記得佐曾經我們就算生活係南方，都可以有一個好溫和的夏季生活，無需頂住熱到辣嘅太陽去尋求冷氣的幫助，真係可怕，短短二十年，個氣溫已經惡化至此，真係唔敢想像，過多十年嘅地球，將何去何處~~~

 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

買佐一包低筋麵粉整大包。平時都係用中筋麵粉去整包，依次試下用低盤麵粉睇下有無唔同。

覺得佢含水量會高過中筋麵粉，因為我落水同中筋麵粉差唔多一樣咁多嘅時候，個麵團會變得好濕好軟，要再加多啲麵粉落去先搓得成一個麵團。

整好出嚟嘅包包，外形上同中筋麵粉無乜區別，係個皮好似皺佐啲，依個有可能係我自己搓麵皮嘅時候無搓多幾次等佢變光滑嘅緣故。

依次整嘅大包係用粟米同肉做餡。

肉先用「豉油、米酒、糖、鹽、胡椒粉、麻油、生粉」撈好攪起膠。

然後落啲蔥花，粟米略略舂碎，全部一起與醃佐味嘅免治豬肉撈勻，即成餡料。

包好後發酵上籠蒸12分鐘。

因為我驚生肉唔得熟透，所以蒸嘅時候稍長少少，蒸佐12分鐘咁長，唔知係因為蒸嘅時候太長，定係蒸嘅火太大，蒸好後的包包，表皮有少少皺添。。。

不過原來用低筋麵粉整包包，會較之中筋麵粉整出嚟嘅包包，更為鬆軟。

粟米豬肉做餡嘅包包，好鮮甜美味，正正㗎~~

最方便最快捷嘅食物，莫過於雞亦啦~~

返到屋企，先洗米煮飯。

然後雞亦洗乾淨，落鑊無需落油，兩面煎一煎至定型出油。

然後加入清水，倒幾湯匙現成香草瑞士汁入去，開火燜煮大約七八分鐘，熄火後浸住佢十幾二十分鐘，食之前再開返火收收水即可~~

簡單易整嘅瑞士雞亦~~

整多個肉碎煮豆腐，飯熟菜亦好~~~

豆腐同雞亦都可以提早買返嚟擺係雪櫃，收工返到屋企，都可以有餸可煮~