電陶爐版鹽焗雞

買磅雞亦，整鹽焗雞亦食。

將雞亦對半剪開，易入味啲。

落少少酒，鹽焗雞粉、老抽、砂糖，攪勻擺入雪櫃雪四五個鐘入味。

 

其實煮食係好隨意嘅一件事，煮食工具只不過係一種輔助，煮食嘅人只要識得利用各種爐具本身的特性去針對性地做出相應地操作與控制，唔同嘅爐具，都一樣可以達到烹煮的目的。

好唔應該局限於點樣嘅煮食爐先可以煮到點樣嘅食物出嚟的思想，爐具產生嘅最終目的係為使用者服務，不過睇到時下好多人，反而本末倒置，變成係要人去參照食譜的做法，去遷就爐具先可以整到食譜上的食物。

變通好緊要，係烹調一事上，唔好默守成規，應該做到信手拈來皆可用。

 

因應屋企個電陶爐，本身爐面具有發熱的特性，依次整鹽焗雞，就用佢嚟整。

繼上一步，醃好雞亦之後，烹煮之前，取錫紙一塊。

然後舖上適量的薑同蔥段。

然後將醃好味的雞亦，舖上錫紙，面又再擺多少少蔥同薑。

最後就用錫紙包好雞亦，令佢形成一個密封的狀態。

電陶爐先預熱一分鐘（即係高火唔擺嘢，開住爐面一分鐘，等表面達到一定溫度）

然後將錫紙包好的雞亦，擺上個低架，開1200火，燒12分鐘。

唔想火力由邊邊浪費走，所以加一個蓋，冚住錫紙包。

咁樣易熟透啲。

基本上，12分鐘已經足夠熟透。

就咁將錫紙擺上面燒，連鑊都可以少洗一個，而且過程無油無煙，幾方便~~~

 

關於鹽焗雞，同樣醃法，烹煮的方式，除佐用電陶爐焗之外，如果俾我，總可以點整：

1、焗爐：錫紙薑蔥包住，擺入傳統焗爐，上下火焗至熟。

2、電飯煲：內膽擺入薑蔥舖底，擺入醃入味雞件，開電煮熟。

3、電磁爐：開火加熱炒菜鑊，將錫紙包好的雞件就咁擺在鑊底烹煮至熟。

4、煤氣瓦煲：瓦煲底擺薑蔥然後上擺雞件，開煤氣加熱瓦煲至雞全熟。

5、郊外燒烤：將雞件提早用錫紙包好，帶至效外，就成塊擺上燒烤架燒至熟。

 

無論用任何方式，只需要知道，大概做法，係唔需加水，就咁憑熱力焗熟，風味較佳，至於具體的炊具，就視乎個人條件去靈活變化，只要醃好味道，最終烹煮的方式，真係好多選擇好多變化~~~

講咁多，其實係想表達俾大家知道，無需一定要齊市面所售的各式炊具先可以做到心中想要的食物，利用屋企已有資源，如果一樣做到心中所想，果種成就感，其實更為強烈㗎~~

睇下，焗好的雞亦，香噴噴，滑一滑~~

焗好後直接擺上檯，食之前先剪開錫紙，保持得熱辣辣，幾好啊~~

覺得鹽焗雞一定要配埋薑同蔥，會香好多~~

不過底有少少燶佐，下次火要較細少少先得~~~

好好味㗎`~~

煲個花生眉豆赤小豆雞腳湯，依幾日天氣好濕，飲啖依款湯，去除身體水腫最一流~~

記得落多片靚陳皮啊~~

炒多個白菜芯~~

兩餸一湯，搞掂~~