大包整幾件---菜肉大包

深夜十一點，電話響

「老婆，等緊巴士返緊嚟」

問老公「洗唔洗我去接你？」

「傻啦，夜麻麻，我自己返嚟就得啦」

答老公「老公，你幾十歲人咪咁天真啦，我衝好涼舒舒服服，點會真係去接你啊，同你講下笑咋」哈哈哈哈哈~~~~

老公：！#%￥·……%￥*「俾你激死」~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~

其實真係好心痛好心痛好心痛老公年後就未停過的忙碌。手上同時有兩個工程要跟，一個就周一到周五，朝九晚六，另一個就周一到周五晚八到晚十二點以及周六周日全日。

即係話，一日由朝到晚，一星期由星期一到星期七，完全唔會得閒，而且工程預計完工要到年尾，果種辛苦法，凈係聽已經覺得心痛。

晚上只要抽得出時間，強哥都會儘量返嚟陪我食晚飯，不過唔想佢咁辛苦行嚟行去，所以都儘量話，我自己一個人唔緊要㗎。

所以唯有係早上，倆公婆一起食下早餐，講下廢話~~~

因為近排要配合強哥早起，所以早餐都會儘量提早整好，第二日一早加返熱就食得果類。

而包包，就係最佳選擇。

~~~~~~~~~~~~~~~~~~~~~~~~~~~~~~~~~~~~~~~~~~~~~~

整包包可參考我另一篇饅頭的做法。「饅頭做法」

饅頭係整包的基礎，整到饅頭，其它就無難度啦。

再長氣啲，講多次我整包包嘅過程。

1、至重要，乾酵母先用暖水，俾少少砂糖入去，開好佢，然後等佢發起。

（份量要視乎麵粉的多寡決定，一般半斤麵粉我都係一茶匙左右乾酵母）

2、麵粉+砂糖+開好水的酵母+油一湯匙

（我就鐘意用牛油或者豬油，原因一係「夠香」，二係牛油或者豬油較重身，搓入到麵粉入邊，蒸煮嘅時候，就會一路係麵粉里邊一層層沉澱落去，咁蒸好的包包，就會好似起酥咁一層層撕得開咁分明啦。）

（豬油同麵粉的味道真係天下無敵，牛油絕對無得比，如有豬油，不妨加入）

3、水逐少逐少咁加，加到綿絮狀，就可以開始搓麵。

4、俾啲耐性，搓至麵團光滑，然後放置於室溫大約五分鐘左右。

舊時做法，就會要等麵團發酵完再包餡，咁我依家多數都係直接包餡再發酵。

效果可參考我另一篇文章「生煎包做法」

5、搓好的麵團直接分割。

依次整菜肉大包。

用小棠菜嚟整，小棠菜剁碎後先用鹽出出水，俾少少鹽入去，好快就會出水。

或者參考我另一次整菜肉餛飩的做法，都一樣好好效果「菜肉餡調法」

最後，將「菜、香菇碎、肉（醃好味）、麻油」撈好，即成餡料。

6、分割好的麵團搓成一片圓形，包入調好的菜肉餡。

7、將包好的包，放置於室溫當中，發酵半個鐘即可。

天氣依幾日較溫和，所以室溫已可發酵，如果天凍，就最好座係暖水上會發得靚啲。

8、水滾後，將火調至中細火（800火），蒸11分鐘。

9、蒸夠時間後，唔好即時揭蓋，等佢焗多五分鐘左右再揭蓋，皮會靚好多。

因為個餡係生嘅而且較大，所以蒸11分鐘，平時蒸饅頭我蒸8、9分鐘已可全熟~~

蒸的時候，係蓋底下包住一塊佈，咁樣啲水氣唔會滴到包包，咁包包皮就唔會變皺。

題外話：

今日晏晝阿媽俾電話我，佢話今日蒸佐花生包好靚，個皮光光滑滑，然後俏皮地問我「你估下係點解？」

無好氣地回答她「你加佐塊布係個蓋下面囉」

阿媽興奮地話「你點估到㗎」

繼續無好氣地回答阿媽「因為係上次你來我度睇到我咁樣蒸包包嘛」

阿媽先恍然大悟「原來係你教我嘅，我總一直係度諗，自己係邊學到嘅咧」

·！#！·#%￥#—（

國際慣例，蒸好後，俾大家睇下成品圖~~`

專業術語謂之：「皮薄餡大~~」

皮好鬆軟，餡好香，咬落啖啖肉，又帶有菜嘅清香，勁滿足！

因為我唔想分開兩次蒸，所以包好嘅包全部擺埋一起上籠蒸，唉，懶嘅結果，係啲包包，發起嘅效果太驚人，所以你逼我，我逼你，個個逼到走哂樣~~~

不過，都無損好味`~~