咖喱雞、黃薑飯、手

太耐之前嘅一餐，幾乎唔記得佐係食佐啲乜。

某日晏晝，炒芥菜芯，加埋啲煙肉去炒。

煎幾塊餐肉~~

晏晝係咁簡單啦~~

晚上想食咖喱，買佐隻冰鮮雞，反正強哥都食唔出唔同雞嘅分別，煮咖喱用冰鮮雞都無問題嘅~~

其實冰鮮雞同新鮮走地雞嘅分別，唔係所謂嘅「鮮味」上嘅分別，而最根本，係雞嘅品種嘅問題，唔同品種同飼養的方法出嚟嘅雞，肉嘅質感同味道都會有好大分別，同你點樣去用薑蔥出過水或者點樣處理去雪味都無關係。

打個比喻，牛同豬，根本係兩樣嘢，所以你係無可能通過一啲處理嘅方式，就可以令到豬肉變成牛肉㗎味道同口感，一樣嘅道理。

~~~~~~~~~~~~~~~~~~~~~~~~~~~~~~~~~~~~~~~~~~~~

煮一個簡單咖喱雞。

1、薯仔先走一走油，咁樣燜嘅時候無咁易溶。

2、洋蔥一個，少油炒出香味。

3、倒入雞塊炒至轉白色。

4、倒入咖喱粉，少少油，炒勻上味。

加水燜煮大約十五分鐘。

因為係用普通冰鮮雞，雞肉較鬆軟，煮得耐肉都會散開，所以基本上無需煮得過長時間，煮熟即可。

我用印度咖喱粉，所以無需落椰漿，咁樣比較能夠食得到咖喱本身嘅香味。

可以落啲甘筍增加視覺上的愉悅，不過我覺得落佐甘筍會減淡咖喱嘅香味，所以就無落。

印度咖喱粉會較印尼或者日本嘅咖喱更為濃郁，印尼嘅咖喱偏重椰香，日本嘅咖喱偏甜味，相較之下，印度嘅咖喱味道，最「咖喱」，味道好純正濃郁，去重慶大廈樓下地舖，有好多香料舖，可以自己配，亦都可以買配好嘅咖喱粉。

留起大半第二日再加返熱總入味，晚上先食一半。。。。

如果食得辣，可以落埋少少辣椒，總要惹味。

因為依種雞不宜久煮，又想佢入味，所以我晏晝就已經先煮好，晚上要食嘅時候再加返熱佢。

搵佐個耐高溫嘅兜裝咖喱雞。

咁夜晚要食嘅時候，只需要直接擺上爐頭，上邊蓋錫紙，開火直接加熱~~

幾方便~~

熱辣辣，香噴噴咖喱雞，其實唔係咁難整㗎~~

好想食黃薑飯配咖喱雞。

又煮個簡易版嘅。

所需材料好簡單「椰粉、黃薑粉」

無買到香茅，如果有加埋落去飯總要香。

黃薑粉可以係印尼商店或者香料舖買到，買之前最好聞下，味道新鮮無膩味就最好啦。黃薑粉嘅味道可能大家好少聞到，真係好香好香好香，好難用筆墨將果種香氛形容到出嚟，只有親身體會過先可以知道。

咖喱咁黃主要都係因為有黃薑粉係入邊，所以黃薑飯，配咖喱雞，係最搭㗎~~

做法：

「2湯匙椰粉+1細匙黃薑粉開好水」

白米洗凈，溝少少糯米入去增加軟糯口感。

正路嘅黃薑飯，應該係提早將黃薑水同米浸一晚入味，然後濾走多餘水份再上鑊蒸熟，咁我係臨時興起想食，咁就用快速方法去整。

將洗好的米同黃薑水撈好，好似平時煮飯咁，加入足夠嘅水，然後用電飯煲煮飯咁煮大約10分鐘，等米吸哂水，但又未熟嘅時候取出嚟。

點解唔直接係電飯煲煮熟咧？

因為黃薑水會浮起，如果一直咁用電飯煲煮熟，咁煮好後的黃薑飯，上一層就會好濃黃薑味，下層嘅米反而吸收唔到黃薑嘅味道，所以煮到一半嘅時候，要將黃薑同米再取出撈一撈均勻個味道，因為我個電飯煲好怪，你咁樣拎出嚟攪過啲米再煮，會煮到半生熟嘅米，所以我就將撈好勻個味道嘅黃薑飯，轉過一個網兜，再上鑊蒸多十分鐘至熟~~~~

如果你個電飯煲夠大火力，可以直接係電飯煲中途取出撈一撈勻味道，然後直接原煲開火煮至熟透。

咁就煮好香噴噴，軟糯糯嘅黃薑飯啦~~~

食黃薑飯當然要配埋炸蝦片啦~~~

印尼人就咁炸蝦片，加啲沙嗲汁，配埋黃薑飯，已經可以就一餐㗎啦~~

黃薑飯，蝦片，咖喱雞，少少菜，聞到咁嘅香味，已迫不及待~~

開餐~~~

我就絕對係要用手食，撮一小啖飯，配埋一啖蝦片，正~~~

用手食絕對比起用餐具嚟得滋味㗎，絕對唔係心理作用，係真㗎，哈哈哈~~

買西蘭花嘅時候，聽到旁邊嘅師奶係度講「黑麻麻，又咁多白粉係度嘅唔好嘅」

唉，帶有少少白粉嘅霜狀物體，西蘭花帶有少少深色嘅顏色，先謂之最新鮮最靚嘅西蘭花啊。。。。

如果果層深色的色素已經變淡，就表示依個西蘭花摘落嚟好耐，無咁新鮮啦~~~

西蘭花多食有宜㗎~~~

全家福，趁熱，開餐啦~~~