花膠煲雞湯、炒芥菜、炒碎蛋伴麻油紅腸

上個月又買佐斤白花膠，依次買嘅又大塊又厚身，最衰係味道亦都重好多，愛嚟炖鮮奶似乎麻麻，所以連續兩個星期都無整過花膠嚟食，咁尋日凈有半邊竹絲雞，一於愛嚟煲湯，等雞同其它材料平衡返花膠嘅腥味。

三塊花膠，滾水煲一煲滾，滴佐幾滴酒入去。

然後清水浸五六個鐘至發起。

浸發後嘅花膠比半邊雞總要多，食多啲，皮膚靚啲~~~

將花膠剪成一塊塊，同半邊雞，一細舊瘦肉（出過水），以及

「淮山片、杞子、紅棗、薑」一起煲湯。

用快速煲煲20分鐘，然後開蓋滾多20分鐘，咁啖湯就非常非常濃了。

我發覺快速煲係咁嘅，你凈係高壓之下煲煮，個味道係唔會完全滾出嚟，最後總要開住蓋係常壓下煲煮一段時間，咁啖湯就好會似瓦煲嘅老火湯咁濃咁好味啦。

側面睇下，煲好嘅湯，同燉湯相比，濃好多~~~

白花膠嘅膠質好勁，啖湯會「膠唇」~~

可惜屋企無螺片或者螺頭，下次要買定啲擺係屋企，加埋會總香。。。

凈返嘅花膠我以後都係愛嚟煲湯算啦，煲鮮奶都係用返平少少嘅果類白花膠就得啦，味道無咁重。

留起一盒湯，第二日再整返熱飲，同強哥一晚一人一大碗就足夠。

買佐一斤小芥菜嚟清炒，好清香。

因為芥菜本身有少少苦澀味，所以芥切切成細粒之後，用滾水碌一碌然後過走水，咁食起上嚟都會清甜好多。。。。

用乾蔥爆香鑊，炒熟芥菜粒，俾雞粉調味，搞掂~~

因為唔知強哥返唔返嚟食飯，所以都唔敢煮餸，臨時話返嚟，咁就炒個麻油紅腸，同埋餐肉碎蛋，快手嘛~~

又快手又簡單的一餐飯餸~~

尋日的湯留有一盒擺入雪櫃，如無意外，今日都會瓊成一舊。

花膠嘅膠質真係好勁㗎，凍佐嘅湯，真係全部凝固成一舊，趁凍嘅時候，將面嘅油全部片走~~

睇下，凍佐嘅湯，好似嗜喱咁㗎~~~

平時我燉鮮奶，因為鮮奶的水比煲湯要少得多，所以煲好後再攤凍嘅鮮奶，第二日硬到咧~~~

其實除佐花膠，豬皮或者雞腳煲好湯後都會有類似嘅效果，都係補充骨膠原極佳的食材，如果整小籠湯包，就係用咁嘅方法，將膠質重嘅食材煲完湯後等佢凝固，咁包小籠包嘅時候，將一細舊凝固好的湯凍擺入肉餡度，咁小籠包一蒸好一咬，就會有一大啖湯汁奔出嚟，就係咁解啦。

其實有無人知道，熱天適唔適合飲花膠湯咧？因為覺得熱天都係飲清淡啲嘅湯水，依類咁膠質重嘅湯水好似熱天飲唔係咁適合？

依排嘅天氣，濕氣咁重，有咩好湯水介紹咧？

我就記得飲癔米水去濕好一流，咦，咁我不如煲豆豆湯。。。。