餐肉蛋刈包「食譜」

對於麵食有一種不自覺地迷戀。

中國的麵食變化，無窮無盡，引發我不斷探索之心。

早幾日與強哥食台灣料理，其中一味刈包，因為點的食物過於豐富，已沒有空間再點，所以唯有放棄。

幾日之後，自家泡制山寨版，大致外形相似，不過餡料有異。

是家庭快手簡便版的刈包。

具體做法，且聽細訴~~

其實做法同饅頭類近，只不過是造型上有所改變。

如果識得整饅頭，根本依款包包，絕無難度。

我依家基本上都係直接搓好麵團，就造型，再發酵先蒸熟。

幾湯匙麵粉，加牛油、酵母、砂糖，簡單幾樣材料，搓成麵團。

然後直接分割成一粒粒麵坯。

出邊食肆為增加鬆軟度，會添加一些化學添加劑，咁自己食，就完全純天然，無添加劑。

將一粒粒麵坯，搓成一條較寬的舌狀。

然後輕輕刷上薄薄一層油。

然後將舌頭折過來，下層要預留一點點層次感，不要完全對折。

三幾下功夫，全部麵坯都造好型，直接擺上蒸碟。

室溫下發酵約三十分鐘。

然後開火直接蒸熟。

水滾後，蒸大約4分鐘，已足夠。

因為麵皮本身較薄，好易熟，無需蒸得好耐。

我凈係猛火蒸了4分鐘，就熄火，然後過多五分鐘再揭蓋。

真係易過食豆腐~~~

件件發得好靚好鬆軟。

因為刷過一層油的關係，所有好輕易，就可以揭開形成一個開口狀嘅麵食。

咁食法，就好睇個人，可以好似傳統咁，擺五花腩，酸菜，花生碎果啲。

又或者好似我，隨意炒啲餡料伴食。

第二日，將早一晚蒸好的刈包蒸熱。

用餐肉雞蛋同青蔥，煎成一份內餡。

少少老乾媽牛肉辣醬。

有一個我整成圓形，切開一半，擺入餡料夾埋食。

不過，原來個背部有一個連接位，啲餡唔會漏出嚟，用手捧住食，總方便。

第二日，刈包擦果占花生醬，一樣好好味~~~

平時整好啲刈包擺係雪櫃，隨時早餐下午茶餐，都可以變出美妙多變嘅食物出嚟。

有興趣嘅，試下~~