祝福他

尋晚臨瞓之前聽電台深宵節目。

其中一個電話，聽完之後，萬分同情。

事緣該名男士，五年前檢查出不幸患有「白血病」，而恰逢此時，又意外獲得一份滿意的工作機會，權宜之下，他向新公司隱瞞了自已的病情，獲得了這個工作機會，而後利用每年的年假，在醫院進行每次複診，而醫生亦都非常體諒同理解當今社會嘅民情，所以在醫生紙上，只含糊地寫出「身體不適」的診斷結論，男士就每次用咁嘅醫生紙回公司要病假，如是五年時間。

誰不知，時至昨日，公司終於發覺不妥之處，於是致電男士，讓其明日（即今日）回公司詳細解釋醫生紙上的「身體不適」的具體情況。

懷著忐忑不安的心情，該名男士致電電台，希望獲得幾位主持人客觀的意見，如何向公司解釋自己的病情以及當初的隱瞞事實嘅苦衷。

主持人首先否定了男士隱瞞真相的做法，然後希望男士與醫生商量如果解釋醫生紙的診斷，之後向公司坦白事實真相。

男士聽到主持話「就算無佐份工，你可以醫返好個病，再搵過一份工㗎」，細細聲話佐句「睇病都要錢㗎，無佐份工，我就無錢睇病啦」

聞者心酸~~~~

各位主持的冷眼與隔靴搔癢之說，簡直係不負責任同混賬之極。

人啲醫生，點會同病人分析應該如何同公司交待事實，如何會同病人負起佢可能被解職之虞啊。。。。

可能我同屬「機會主義」奉行者，我其實係認同該名男士，在入職之初無向公司坦白自己病情嘅做法。事實上，自己的病情，份屬個人私隱，係有權沉默。

而帶住病係公司工作佐五年，完全勝任有餘，病情未對工作造成任何影響，足以證明佢本身嘅工作能力係無需受病情影響而得到肯定的。

不過我亦同意主持所講，佢應向公司坦白自己嘅病情，因為始終依個係事實，無得迴避，不過我亦都希望該位男士，可以獲得公司最大的理解同接受，如果公司因佢最初隱瞞佐病情嘅事實而同佢解除工作關係，佢一定要據理力爭，爭取自己嘅最大權益，所謂「至之死地，而後生」，可能依次嘅坦白，會對自己人生，有另一種重大轉變。

可以做嘅，唯有衷心的祝福，希望他，一切順利！