荷蘭豆炒臘味、蒜蓉牛油包

晏晝強哥係屋企食。

咁煮飯同時，順手切埋一舊臘肉，半條臘腸同潤腸，擺飯面蒸熟。

我通常會等飯已經開始收水先擺上去。

煮飯同時，煮水一煲，烚熟荷蘭豆同西蘭花待用。

然後臘腸臘肉煮得差唔多熟嘅時候取出，切片，落鑊爆啲油出嚟。

俾幾粒蒜頭入去。

完全無需落油，臘味自己會出好多油。

最後將荷蘭豆同少少豆卜切絲倒入去同炒，落少少水略略燜煮一下，等臘味啲味同荷蘭豆溝埋，俾少少幾粒鹽去調味，炒至乾身即可。

快手小炒。。。。

西蘭花同少少免治豬肉炒埋一碟。。。。

晏晝就咁樣，清清哋。。。。

晚上強哥要OT，唯有自己搞掂晚餐。

自己一個人，實在懶得整乜。

睇電視上網，無無聊聊通屋走。。。。。

原來一個人嘅生活，可以寂寞至此，認真可怕。。。

拖拖拉拉直至夜晚八點，開始有少少肚餓感覺。

廚房凈有二塊厚切方包，咁一個人，無乜搞，食件方包算數。

方包擺上爐頭焗一分鐘至兩面金黃。

趁熱擦一舊牛油

然後少少雜香草加埋一湯匙罐頭蒜蓉

擦勻，擺番爐頭。。。。

將蒜蓉果面擺向下，用熱力繼續焗至蒜蓉略顯金黃即可。。。

因為有牛油痴住，所以蒜蓉只不過跌少少係爐頭上，好易清潔。

簡簡單單擦一擦，一塊焗到香噴噴嘅蒜蓉牛油包就整好啦。

開支奶加埋一大塊麵包

一個人嘅晚餐~~~

真係食不知味~~~

無癮~