欖菜肉鬆芥蘭煲「食譜」

細個時唔懂芥蘭，對於芥蘭嘅所有菜式，一律拒絕。

總覺得佢嘅酒味同不搭界的薑味，有著成熟的感覺，小朋友如我，需要完全抗拒。

母親炒芥蘭，必備「薑、酒、鹽、砂糖」

每次父親的酒友到來，其中一味簡單如薑絲炒芥蘭，例必獲得滿堂喝彩，完全唔明。

係要到佐近幾年，先開始品嚐出，芥蘭原來可以清香爽脆至此~~

於是一發不可收拾地愛上。

依日晚餐，芥蘭出場。

1、將芥蘭梗傾斜切段。

2、鑊里落油，倒入免治豬肉，慢火煸炒至油出，略顯硬身。

3、倒入薑絲，少少辣椒絲炒出香味。

3、倒入芥蘭，一匙欖菜，鹽調味，跟住再俾少少砂糖去中和芥蘭嘅澀味，最後沿鑊邊落一細匙酒，猛火兜炒一分鐘左右即刻鏟起。

炒耐佐就會失去佢嘅爽脆，我只不過係利用大啲嘅鑊，炒勻調味。

4、取瓦煲仔一個，擺上爐頭燒紅。

5、將步驟3炒均佐味嘅芥蘭，倒入燒紅佐嘅煲仔度，用煲仔嘅餘熱，將芥蘭焗熟。

所以一開始唔好炒得太熟就係咁嘅原因，煲仔好熱，絕對有能力將未熟嘅芥蘭焗至熟身，並且保持佐芥蘭嘅爽脆度~~

一擺上檯面，強哥嘩一聲「老婆，大排檔嗜嗜煲嚟㗎」

端上檯面嘅時候，清晰可辨地聽到好誇張嘅「滋滋咋咋」聲㗎~~~

有街邊大排檔水準㗎~~~

孜然炒肥牛

1、凈鑊倒入肥牛，慢火煎至出油，裝起備用。

2、倒入配菜，用肥牛逼出嚟嘅油，爆出香味。

3、利用鑊底嘅油，倒入一匙孜然粉同辣椒粉，爆出香味。

4、肥牛回鑊，俾鹽同少少砂糖調味。

5、起鑊之前，倒入一大扎芫莤，熄火炒勻裝碟~~

一滴油都無落過嘅孜然炒肥牛~~

超惹味`~

 

開飯~~~~