腿蛋三文治+自製印尼咖央

今日好勤力啊，一早起身整早餐俾強哥。

懶得另外開焗爐，煎蛋煎餐肉都係用平底鑊，所以連方包都係用平底鑊烘乾。

其實用平底鑊整熱方包時間上快好多添。。而且個色水都好靚架~

一份早餐話咁快搞掂，一片火腿，一個荷包蛋，一D椒鹽~~

我煎的荷包蛋強哥至鐘意食啦，唔會太生蛋汁太多食到四周圍都係，咁樣有少少溏心，食落又嫩又香，配方包最好味`~

衝碗麥皮，一杯咖啡，強哥已經好開心啦！

-------------------------------------------------------------------

係出邊買到的罐裝咖央，一來香得好假，二來個顏色黃得好恐怖，唔知加佐乜不知名色素與香精，最健康最安全的食法，當然是自家制的啦。。。

咖央係我自細都好鐘意食的一種醬料，愛黎擦面包或者饅頭，都係一極享受，所以細細個果陣時已經識得搬張凳仔企係爐頭自己整定一大樽俾屋企人食啦。

其實自己係屋企整一點都唔難，材料更加係好簡單而且好方便搵到。

材料如下圖所示：

椰漿，雞蛋黃，練乳，砂糖

（個量隨個人鐘意，如果想椰子味濃點就落多D，因為做為醬汁配搭面包一類食物，所以最好落多D砂糖等佢可以甜D）

作法只需俾少少耐性，用一個耐熱容器，稍大小小的，隔住水煮，再搵個匙梗一邊同一方向不斷咁攪拌，咁D蛋先至唔會結成一舊舊。

等聞唔到蛋腥味，只係香味，就謂知得啦。。。

因為雞蛋本身有凝固的效果，所以攤凍之后依個醬汁會自己結起來，睇下，攤佐幾分鐘之后，就已經睇到個效果啦~~

正常黎講，凈係用蛋同埋牛奶同埋椰漿，應該係我整出黎依種粉黃色的效果，出邊賣緊果D又黃又稀果D，真係鬼知落佐乜色素落去啦~~

咖央除佐係黃色，如果加少少斑斕汁落去，就會變成淡淡綠色，其實都好香架~~

一次過唔使整太多，因為無防腐劑，擺係雪櫃最好一個星期之內搞掂佢，所以我次次都只係整二隻蛋黃就足夠啦。。。

整個咖央，就係咁簡單啦~~