煲仔一鍋出---花生豬手煲、芥菜感蛋湯、豆腐煎蛋

又到冬意襲人時，煲仔以佢煲暖強，加熱方便，清洗簡單的特性，為我所愛~~

因為我懶，用煲仔載餸，加熱時係佢，上台食又係佢，過程中可以少洗一個碗碟，對我來講，是大好事一件。

而且天凍時似乎肚餓得特別快，而且特別想食肉的感覺，（不過我係例外，唔止冬天，一年四季其實我都咁鐘意食肉）

下午得閒時，預先煲定一煲豬手煲，跟住擺入煲仔度，夜晚食飯之前再開火加加熱就食得。

依次用佐上次整排骨的材料同樣愛黎整豬手，個味一樣咁香，連小斑都走埋出黎八卦下睇下係乜來架~

 

好似上次整排骨的圖片唔記得係BLOG度寫，依次影佐過程圖，再擺上黎啦。

作法：1，先將豬手同花生出一出水（花生出過水之后點煲都唔會變色，煲湯時都可以咁做）

2，開細火，慢慢用油爆香「花椒粒、薑、蒜頭」，爆出香味之后將花椒粒取出，凈係要個油有花椒味就得啦。

3，豬手落鑊，加老抽同糖，炒上糖色

4，加水加花生加生抽加少少醋加料酒二匙，加八角一粒加香葉一塊，燜到腍同埋收汁，我就轉到快速煲度燜佐半個鐘。

因為有「花椒同埋八角」等大料的香味，依味餸真係惹味之極，不過大料不宜落得太多，八角一粒就足夠，過多個味會帶苦，因為高速煲的功勞，個肉燜到好腍好腍，吃落香滑軟糯，又惹味開胃，唔怪得連小斑都忍唔住，想偷食一舊啦~~

我絕對係行動派的擁躉，尋日係網上睇到網友用豆腐煎蛋，依個搭配真係未食過，想像中應該都係好好味，一睇到即刻熄機落街買豆腐，夜晚就整多一味「豆腐煎蛋」出黎啦。

其實最主要目的係想整多一味餸出黎，可以分散下強哥對豬手的注意力，控制下對豬手的攝入量，而且又可以試下新煮意啵。。。

買佐一件豆腐，一開二，一半愛黎煎蛋用。

作法：1，豆腐切粒粒之后，凈鑊慢火儘量烘干D豆腐。

2，雞蛋二隻，打散之后加入蔥花同鹽，最主要，我加佐幾匙梗上邊整豬手凈抵少少的花椒油落去，帶有花椒味的油真係香到爆，連個蛋液都變得香艷動人佐好多~~（另外，通常煎蛋我會落二匙梗仔的清水落去，等個蛋液變多D同埋稀少少，跟住用力打到蛋液起泡泡，類似整蛋糕打到個蛋發起咁的款）

3，將蛋液倒入平底鑊度，開細D火，等佢慢慢煎到個底凝固

4，凝固之后的蛋可以好輕易咁翻轉個身啦，個面再煎多半分鐘左右煎出香味就得啦~~

睇下，一個又靚又香又完美的豆腐煎蛋就完成啦。。。

睇落係唔係好大一碟咁啊？哈哈哈，打發個雞蛋再煎就有咁的功效啦。。而且會香口好多架~

原來真係非常非常唔錯的一個配搭，雞蛋的香脆配合埋豆腐淡淡的豆香，若隱若現的花椒香味，外脆內嫩，無論係口感或者視覺都係一個享受，而且依味餸都好適合茹素者食用~~

我腍我下次都會繼續整依味餸~

另外用感蛋芥菜滾佐一個湯，加埋煎蛋用凈的半邊豆腐，又係煲仔上台，就咁簡單~~

豐富又好味的一餐住家餸~~

屋企好多盒模型開始開工組裝啦，等唔切個仔出世長大再一起玩，佢阿娘手癮佐好耐好耐實在忍唔住，唯有先自己開工啦。。。。