阿娘今日另有節目，本來係今晚約佐奶奶食飯，但阿強哥果個工程趕緊起貨，未知今晚又要玩到幾點，如果按依輪既時間睇，無九點十點都返唔到屋企，咁唯有同奶奶另約時間搵佢飲茶食飯。
無端端一個母親節，雙方母親都已經另有節目，咁我自己一個人係屋企，真係無無聊聊。
拾下個廚櫃，發現一包舊年買返黎既大菜絲。
一直未用過，咁今日有得閒時又無聊，咁就索性整D野出黎玩下打發下時間。
因為見依排個皮膚有少少痕，可能係天氣乾燥，加埋有小小血液濕毒燥熱引致，所以都腍住整個龜苓膏黎食下。
係藥房買佐廣西梧州出既龜苓膏粉，按照說明書，整佐二包仔，咁就倒入個密實盒度。
因為齋係龜苓膏未免單調，所以基本上心中已經有個方案，利用大菜絲，整少少野，加多幾層上去配合個龜苓膏食。
咁就整佐咁樣一道冰爽既甜品出黎啦。
睇落係未好靚咧。。。
因為從來都無整過大菜絲，只不過大概知道佢融於水之后攤凍可以起到凝固既效果。咁個比例真係無從考究，唯有自己試下試下咁羅。
先將個大菜絲用凍水浸腍。
然后煲滾佢，倒入牛奶。
因為臨時整食味甜品，屋企無鮮奶，咁就用奶粉開佐杯奶代替。
我係打算加佐牛奶變白色既大菜糕就舖係龜苓膏之上，咁龜苓膏本身係有苦味，所以依層牛奶味既我就落佐糖，等佢甜甜香香，咁一啖食落，就可以中和返龜苓膏既苦味。
將牛奶同大菜絲煮到融化之后，趁熱，倒入已經攤凍定佐形既龜苓膏之上，咁就完成二層啦。
等第二層牛奶味既大菜糕都凝結之後，再用大菜絲加水，加少少桂花乾落去煮開，趁熱再倒入容器度。
咁三層就完成了。
成品從外觀睇黎，黑白透明三層，視覺上真係好靚，從口感上黎講，龜苓膏既口感就同出邊賣果D係一樣，嫩滑之中帶有彈意，而牛奶果層，可能係大菜絲用量稍多，所以食起上黎會有D較為硬身，但係好香既牛奶味，反而硬D我覺得無問題。咁面果層，完全凈係清水加桂花，而且大菜絲落得好好，食落個口感係好涼爽，凝固得到之餘又唔會覺得好硬身，入口即化果種，加埋淡淡既桂花香味，雪過再食，簡直係夏季一流既清心聖品。
依味甜品又易整，又好味，而且好適合依個天時食用，我諗今個夏天，會係我屋企雪櫃常備之物。
個龜苓膏真係幾苦下，所以落多少少練奶配食，更加滋味無窮。。。
因為都係好隨意好隨手咁用D材料，所以無辦法詳細講到具體既材料用量，不過依D咁簡單既甜品，俾少少心思落去，應該睇過就識整啦。。。。
整依個甜品全程無需二十分鐘，好值得嘗試。。。。
沒有留言:
張貼留言