自製柔光燈、反光板、相機內閃柔光罩

無學過攝影，所以對於相機嘅參數同使用技術，可以講嘅心得「無」

影像係用自己對眼，將睇到嘅事同物，利用唔同嘅光同角度去表現，通過相機記錄落嚟嘅過程。我唔識得如何更好控制相機，更加唔識得變更唔同嘅鏡頭，對於相機只是一種記錄的工具，無特別熱好，所以都唔捨得用好多好多錢去添置各類器材。

只是通過平日不停不停地影，去發現唔同嘅光源，打光嘅效果，唔同嘅角度，影出嚟會產生嘅變化，再自己去揣摩同判斷影出嚟嘅可能結果。

簡單嚟講，影像對我而言，係本能嘅反應，而無技術上嘅理性處理，對於圖片後期處理，所需時間不會超過十秒，所以我嘅圖片，基本上，會係比較粗糙同生活化，一直好想認真去鑽研下攝影，不過一個「懶」字，一切皆浮雲~~

今日天氣又凍又濕，下晝同強哥實在悶到嘔，咁齊齊係屋企搞搞震。

搞一啲，一直都有概念而一直無去實行嘅嘢。

 

1、做反光板

反光板可以幫我做到補少少光嘅效果。出邊買，一塊最少都四五十蚊。

我有幾塊硬紙皮留佐好耐係度，咁就自己界好齊整啲紙皮，過年前買佐一包痴廚房牆身嘅錫紙，一包五蚊，用佐一塊，凈有一塊，咁就用凈抵嘅錫紙，界好同紙皮大小相若，包住係面再痴好，咁就變成一塊好天然嘅反光板啦~~~

一共包佐二塊硬紙皮，紙皮唔洗錢，我嘅二塊反光板，所需費用$2.5

再嚟睇下,幾企理嘅反光板.....

2、柔光燈箱

鴨寮街買檯cheap cheap檯燈，專用嚟影相時幫我補光，用佐二年都無穿無爛，$45蚊咋，算係咁啦。。。

不過光直射會太刺眼，以前我就用塊紙巾包住佢等佢柔和啲光，今日見整佐反光板有凈錫紙，咁就整埋個燈企企理理啲。

界好燈位嘅寬度嘅紙皮，包好錫紙，然後穿過燈位，等錫紙係光管上下形成一個較寬嘅燈罩嘅形狀，等燈光再打返錫紙度啲光嘅反射位都大啲嘛，咁樣燈光出嚟會集中同光猛好多。

然後剪開垃圾袋一個，界好長度，就包住上下反光板，用膠紙痴實，搞掂~~~

咁樣增加佐打光嘅範圍，又做到柔和燈光嘅效果，幾正啊~~~

唔洗去買柔光燈箱幾百蚊咁貴啦~~~

自己整，一蚊都唔洗~~

上邊兩個係我自己整嘅，簡單~~

下邊果個就要我同強哥一起完成啦。

影食物通常我都唔會開相機本身配嘅閃光燈，光源通常都係外補。

一直覺得自己嘅相好暗，開閃光燈啲相又會太死，又唔想洗錢去買太貴嘅外置閃光燈，強哥一直話送俾我，但係我最驚，買開有條癮，買佐個閃光燈之後，就又想換各款唔同嘅鏡頭，為免貪念一起無可收拾，所以就一路拒絕。

咁為佐利用到相機本身嘅閃光燈又可以解決到直射燈光太刺眼嘅問題。咁就同強哥一起諗一個計仔去解決依個問題：

3、自製閃光燈柔光罩

樓下五金舖買佐一扎鐵線「五蚊雞」

加埋免費垃圾袋一個，屋企鉗一隻。

三樣嘢。

開工。

強哥取鐵線一截，中間位鉗出一個U形，要剛好Fit相機閃光燈後邊個熱靴位咁大細。

再睇個近鏡，要剛剛好塞得入果個位。

然後鐵線上邊折成一個三角形。

再用垃圾袋，界好適合寬度同長度，用膠紙痴好定係鐵線位。

睇個全景，塞佐入個熱靴位之後，成個升起個旗嘅樣。

未完成㗎。。。。

膠袋嘅一頭痴實係鐵線度，另一邊嘅底，折幾折等佢厚重啲，然後裁好同鏡頭大小相近嘅窿出嚟，窿嘅邊邊位再用膠紙住包好。

然後套入鏡頭度。

咁就係閃光燈面前，扯起一個透光性好好嘅罩啦。。。。

睇下側面。。。利用鐵線升起個高度，再用膠袋擋係閃光燈前面。

咁就起到將閃光燈柔和嘅效果，同埋因為膠袋嘅範圍較寬，咁樣打出嚟嘅光再返射返膠袋上再彈出去，光嘅範圍都會更大㗎。。。。

睇下全景，醜係醜樣佐啲，不過慘得過有效啊。。。。

而且自己親手整出嚟喎，果份成就感，自不能用金錢所衡量啦。。。。

同專業人士昂貴的攝影棚相比，我所費無幾嘅自製攝影環境，唔差㗎~~~~

哈哈哈~~~~~

當然，依個只不過係一個下晝無計劃之下嘅一個雛形，總有好多可以完善嘅地方，以後若有新諗法，再同大家分享~~~

聽日情人節，祝天下有情人或無情人，都同樣開開心心~~~

~~~~~~~~~~~~~~~~~~~~~~~~~~~~~~~~~~~~~

無圖無真相，後拍佐幾張圖片，不改變相機本身的參數，凈係對燈光做佐唔同的處理，睇下圖片出來的效果區別~~~

圖1.無開任何的燈光，就靠自然光，然後開像機本身的閃光燈，拍出來的色澤又假又硬。

圖2.下圖影時左側擺塊反光板，右側開佐柔光燈，拍的時候，打開閃光燈，閃光燈無加柔光罩，效果睇落比上圖靚佐好多咧。。。

色澤柔和佐好多~

圖3.同圖2的燈光處理一樣，不過在閃光燈前多加佐自制的柔光罩，因為我的柔光罩較大塊，所以光打出來的範圍較廣，同上圖相比，色澤柔和之余，總分布更均勻添㗎，加佐個柔光罩響相機內置的閃光燈前，對比下可以睇得出區別吧~~