整咖喱係我強項。
通常唔多想整複雜既送菜，我就會整一大煲咖喱，再煲定一大煲白飯，就足夠啦。
今日買佐一包日式咖喱包黎試下味。
一打開個包裝即刻後悔，依种味都好算係叫做咖喱？
所有材料如下圖所示：洋蔥，薯仔，甘筍+新鮮雞+所謂咖喱汁
如此咖喱，如何對得住觀眾啊。。。拎出私伙添枝加葉，希望可以令隻雞有一個較好下場。
加佐一种印度咖喱粉+花椒粉+黃薑粉+沙倫葉+香芧葉
做法：1，先將洋蔥同雞炒干身，雞肉要炒到五成熟，咁個雞肉先至會收縮緊致，就算陣間燜耐佐，食起上黎，個口感都依然可以保持咁上下水準。
2，炒好雞肉之后，將所有調味料同薯仔甘筍，加水開始燜。。。
3，燜得一陣，轉到個瓦煲仔度繼續燜，燜到咁上下收汁，就叫食得啦。
因為我比較偏向鐘意北印度的咖喱味。所以味道較重，如果平日媽咪整印尼咖喱，會落好多好多椰汁，我就嫌落椰汁食起上黎會好流，所以自己整，就絕對唔落椰汁，如果鐘意個口感係溫和D，咁就最好係落D椰汁啦，不過要注意，椰汁唔可以太早加落去燜，因為煲得耐佐，個椰汁會出好多椰子油，咁煲咖喱就會變得好油膩，所以如果落椰汁，最好係煲咖喱煲好之后再加落去煲二煲就熄火啦。
睇下，今晚既咖喱雞飯~~
水準唔差ga~~
凈係食飯太干，雪櫃我仲有一盒已經整好佐既韓式泡菜，依家天時又焗又熱，最適合飲D酸咪咪的湯水，索性整佐一煲韓式泡菜湯來配咖喱飯。
泡菜整佐幾次啦，個味越黎越好，做法我之前有寫過，有興趣可以再番睇下~
韓國人的飲食無乜深度，係D商家將食品加以若干包裝之后以更精緻的形象推出市場，其實自己整，話咁易啦~`~
個泡菜湯只要有泡菜做為主角，其餘配角，係自己有乜就落乜。
我有一細舊仔烚熟既五花腩，加埋一D打邊爐剩低既材料，全部都可以加落煲湯度
一煲煮~~用濃郁的味道去掩蓋食物本身的粗劣~~
為佐煲湯的味道更豐富，我又加佐一大匙的韓式辣椒醬+日式味噌醬+廣東白醋
食過一D所謂「高級韓式料理」，同我自己整的依個泡菜湯，無乜區別~~
沒有留言:
張貼留言