未能茹素---白斬雞、發菜蠔豉豬手煲

早前將個雞檔嘅牌交返政府嘅人，真係哭都無淚囉。

以前就話要實施中央屠宰，先至諗住無前景嘅前提下，不如提早退休啦，點知依家又話可能停止依項計劃，真係俾個政府玩死啦。。。。

不過政府能夠因應實際情況做出檢討同調整，都係件好事嚟，起碼唔洗成日食埋啲淡而無味嘅雞嘛。。。

好值得賀一賀嘅，即時買佐隻返嚟做白切雞。

如果係豉油雞或者咖喱或者其它做法嘅雞，我會買普通冰鮮果啲走地雞，因為味道一重，咩都食唔出啦，不過如果想食白斬雞，都係新鮮走地雞，品種唔同，肉質都唔同，味道更有好大區別，斬雞時都知道，走地雞嘅骨頭係硬好多好多㗎。

不過依次浸得有少少唔夠熟添，個比好生啊，個肚嘅地方又係有一舊唔夠熟，唔想再回鍋浸過，唯有將唔熟嘅部位斬落嚟，用少少鹽醃住佢，留返第二餐再包埋錫紙焗返熟佢，味道都唔錯嘅。。。

雞要趁新鮮食多啲，隔餐就唔好食啦，所以食少少飯，儘量清哂碟雞佢。

好奇怪，如果係整豉油雞，個潤我就會食，覺得好香，但係如果白斬雞嘅潤，我係一定唔食㗎，覺得佢好腥啊。。。

香港人真係勁叻自欺欺人，「雞潤」本身唔叫潤，正確應該叫「雞肝」，只不過「肝」同「乾」音，香港人就覺得叫起上嚟唔多老利，於是夾硬改佐佢，將「乾」變成「潤滑」嘅「潤」嚟叫，所以豬肝牛肝，一律變成「豬潤牛潤」，都算係「香港特色」啦。。。

不過記得出到香港之外，都係咪將「肝」講成「潤」啦，人啲聽唔明㗎。。。

浸白斬雞嘅雞湯愛嚟浸炒兩盒豆苗，相得益彰~~~

分兩碗擺碟，一擺上檯，強哥「嘩」一聲：「老婆，食咪咪啊」~~~

哈哈哈，我話「係對Bar Bar 嚟㗎咋」，你腍多佐啦。。。。

禮拜日返奶奶度食飯，帶佐一煲仔蠔豉發菜豬手返嚟。

星期一只需要整返熱佢，搞掂。。。。

奶奶整得真係好好味。。。。。

再買多盒豆苗，落幾片薑，碌幾塊肉片落去，已經係好清甜嘅一啖滾湯啦。。。

老公勁贊好清甜，聽日再買多盒，加多個咸蛋落去滾個湯，應試總好味~~

豬手嘅汁愛嚟撈飯，正。。。。。

再飲埋啖湯，正。。。。