除非係好「有心」嘅食肆，如果唔係，一般最家常最簡單嘅食物，通常一落到街食，就變得面目全非。
以前就話無時間無心機，早午晚餐都要係出邊解決，要假手於人嘅時候，對品質唯有退而求其次，無得太高要求，依家有足夠嘅條件自己慢慢整出最符心意嘅任何一餐嘅時候，當然無理由再捱出邊毫無心機嘅食物啦。
買佐包厚切方包返嚟。
早餐整返兩件，衝杯麥皮，一杯咖啡，一個方便又好味嘅早餐。
會中火焗大約6分鐘左右（我個焗爐細，火力小），咁樣慢慢焗嘅好處係，個邊邊完全收干水變得脆卜卜，然後再取出嚟，擦少少牛油，因為擦有牛油，再焗嘅時候能夠令面包中間保持濕潤同鬆軟，然後取出嚟，擦花生醬同奶，或者擦一匙罐頭蒜蓉同香草，再返爐焗多二分鐘，食到尾，都唔會變腍，都依然係索索聲㗎，又香又脆，最好味係一啖香脆嘅面包皮，加埋一大啖中間加佐料又鬆軟軟嘅至高享受~~耳邊嘅索索聲，過癮到不得了~~~
實在係出邊太多餐廳，焗件多士咁簡單嘅事，都只不過係求其猛火焗一二分鐘，等表面有些少焦黃就算數，未等送到客手上，已經變腍，擦個牛油，都融唔到咁滯~~不過都理解，餐廳要賺錢梗係無可能慢慢同你整啦，做多一份賺多份嘛~~
厚切方包真係幾大份，一人食一件，基本上都好足夠啦。。。。
~~~~~~~~~~~~~~~~~~~~~~~~~~~~~~~~~~~~~~~~~~~~
老公晏晝返嚟食飯。
青椒可以擺係雪櫃好多日，所以通常都會買幾個擺住應不時之需。
今日晏晝又炒青椒。
如果有可能，都會買有機青椒嚟食。
但邊得咁多有機買啊，又唔方便，所以都係街市求其見靚又大隻肉厚就算數。
唔知有無農藥㗎，不過就算唔係有機菜，都可以食得好安心嘅。
好似依類青椒，假設佢真係有噴農藥，我擺係雪櫃咁多日，應該都揮發得七七八八，不過食之前都需要浸一浸水十分鐘左右，然後用流動嘅清水抹洗表面，最緊要，個頭要切走唔要。因為青椒嘅頭向上，而且係凹落去嘅結構，假設真係噴佐農藥，就一定會積聚係個凹入去嘅位置，所以通常依類大青椒嘅頭，我都會切走唔食。
今日好得閒，咁普通嘅餸我都影影影。。。哈哈哈。。。
配料有：洋蔥同甘筍加埋一個大青椒。
總有少少肉片醃好。
通常我會先爆香配菜。
再將肉片倒入炒至七八成熟，我通常凈係加好少好少水，咁肉味會鮮甜啲。
再倒入配菜，加少少水略燜，落鹽調味。
猛火炒至收汁即可~~~
最快手嘅小炒，勝在新鮮「即叫即炒」，點都好味啦。。。
晏晝食少少，一人一碗飯一碟餸，搞掂~~~
沒有留言:
張貼留言