滿足

我細個時儲過收音機，儲過鋼筆。

嗜好總是需要付出代價的，讀緊書無收入嘅我，為此經常地三餐不繼，也在所不惜。

省下盡可能多的零用錢以換取最新的心頭好才是最實際的作法，從來不在衣著上有所要求，阿媽買咩就著咩，一款哈利波特式的大黑膠框眼鏡，貪佢夠舒服一配五六副帶足成個青春期，因外形欠佳因此拒絕過多的社交活動，躲在房中開住HiFi聽電台節目，捧住一書已當成一世界，當時已經好清楚自己內心嘅滿足感係完全唔需要同人交待自己靜靜感受經已足夠，諗返，自己應當係最早期嘅所謂「宅女」嘅標準代表。

最幸運的，是遇上與我完全一樣一樣地強哥，果種相似，係精神上完全嘅吻合，好多事情我倆無需過多言語，態度上已能達成一致，甚至連喜好，大家都相似得驚人。

每日食過晚餐，都會同強哥外出散步，漫無目地周圍行下，志在吹下風，放鬆下情緒；尋晚散步行到旺角，見好耐無去睇機，就入佐去望下依家有咩新款嘢，我隨口講句「好似好耐無買過細機嚟玩」，強哥一聽即刻興致勃勃「好喎，研究下有咩抵玩嘅」

咁就買佐部SONY嘅細機，之前都睇過雜誌介紹，都出佐好幾個月啦，係網上睇過片，佢高清影Movie真係好掂，尋晚一買即試，果然無失望，佢係夜景之下影出嚟嘅效果，真係好出色，而且貪佢夠細部，平日擺係細袋都唔會造成負擔。

我倆公婆一樣咁衰樣，一買開就停唔到手，強哥送部相機俾我，再行多幾行，經過見到強哥似乎幾有興趣一部PMP，問過強哥確係鐘意，咁就買佐部送俾強哥，依啲就叫「禮尚往來」嘛。。。。。

其實，咪又係我自己都有興趣。。。。

所以喜好相近嘅時候，大家買起嘢上嚟真係唔會有所謂嘅「冷靜」，所以可想而知，我哋屋企最多各式各樣嘅，係啲咩啦。

講真，依家嘅PMP真係抵玩，一千幾百蚊，已經好靚質素，功能亦都齊全，依部PMP有6吋大芒，16G內存，同部PSP相比，個芒大佐幾多，而且好薄，拎上手都唔會覺得重。

不過我覺得最抵玩，真係PSP，Game又多又好玩，（不過成日要同埋強哥一起打同一個Game幫佢做任務）一部PSP可以睇戲，可以上網，可以睇電子書，可以打機，而且我依部玩佐四年幾啦，都依然咁work，玩得最多，所以最殘，但足證佢嘅耐用性。

當初買NDS，都只不過係為佐玩Super Mario個Game姐，其它嘅Game過於小朋友程度，通常去廁所，唔想用腦嘅時候最適合玩，不過NDS睇電子書嘅軟件好用過PSP嘅。

好耐無買PMP，因為屋企已經有一部。

買佐四年，用嘅次數極少，當初都唔知點解會買，最唔抵玩係佢，不過當時初次見佢，真係有驚艷嘅感覺，手感一流，成30G內存，當時我部notebook都係得60G咋，可以直接駁睇電視，可以預錄電視節目，加埋配件，當時買接近5000蚊，依家睇返，真係痴線㗎咁鬼貴，依家一千蚊部已經好正啦。。。。

尋晚買果部PMP真係好滿意，咁嘅價錢，可以有咁嘅質素，真係好OK啦。尋晚即刻試下，駁入4X吋嘅大電視睇高清戲，完全都無問題。

我就諗住用佢睇電子書嘅，可以選擇豎睇好似真係睇本書咁，亦都可以橫睇，字體夠大，睇得好舒服。

玩物會否喪志？不得而知，但獲得心頭好嘅滿足感，又點可計較~~

講返部細機，型號係TX7。

細機嘅功能同效果本嚟就無乜太多要求，買嘅目的係佢夠細，同埋高清影Movie果下，而且強哥不嬲鐘情SONY嘢。

個芒夠大啦，有3吋咁大，不過一定好扯電，試玩一排，睇下有無需要買多舊電。

睇返網上其它網友嘅評價，話依部機嘅相太柔和，色度太淡，不過我自己玩開Nikon機，依個問題我都OK接受。

試影下幾張相，完全無處理過嘅裸相，我就覺影出嚟，同SONY其它機相比，係少少柔和，色度無咁濃，不過都好幼細啊，對比都好出，而且係光線不足處，都出得好好。。。

最勁係我係好暗位，拍Movie之後擺上電腦睇返都好清楚。。。。

而且佢25mm廣角鏡，真係幾好取景嘅。

夠傻瓜機，乜都唔洗諗。。。。

草草又係部細機影，完全無PS過。

左邊係無處理過嘅裸相，右邊我用魔術手加強銳度至120，加深佐色彩，加埋水印，一樣好正啊。。。。

影返張電腦芒，我覺得色澤度都好真啊。。。。

洗乜咁深色，假到死。。。。

暫時有咁多心得，兩個小玩意，有排玩啦。。。

 

瑤柱咸蛋節瓜湯（食譜）

不可否認，來到現時，許多傳統的觀念早已不合時宜兼老土。

尋晚睇到一個post是網友關於俾家用父母的討論。不約而同的，大多數網友的回應，都認為父母在金錢上的態度，無疑是令人難堪的，而做為晚輩，亦都認為持續地孝敬長輩的作法，會成為自己生活當中的負擔，甚至成為煩擾。

不敢指責任何人，每個家庭都有自己的實際問題需要處理。

不過中國傳統素來認為「萬事孝為先」，如果能夠真正盡到孝道之事，又何需父母拉下老臉，攤大手板放下尊嚴要自己出聲先至得到應得之事？如果真是能力所限，不妨大方同父母商量，尋得一個對彼此都更為輕鬆地解決方式，才是正道。

睇到依個post，亦都再次提醒自己，所謂的「養兒妨老」早已不合時宜得好緊要，自己同強哥，一方面有自覺地盡自己為人仔女嘅責任，另一方面，都需要為自己年老之時做好準備，寧可依家趁後生辛苦啲，在社會保障未見得能夠完全照顧所有人嘅前提之下，為自己嘅晚年盡可能地做多些積累與準備，希望自己嘅晚年，可以自給自足之餘總可以對晚輩無所計較，咁樣在晚輩面前，尚能維持盡可能多的尊嚴，較為重要。

~~~~~~~~~~~~~~~~~~~~~~~~~~~~~~~~~~~~~~~~

尋晚滾佐一個湯。

材料「節瓜兩個、瑤柱蝦乾適量、咸蛋一個半」

做法：

1，蝦乾同瑤柱熱水浸腍清洗乾淨，節瓜切大塊，咸蛋黃二個，蛋白一個準備好。

2，節瓜清水入煲，落瑤柱同蝦乾，開火煲半個鐘左右。

3，半個鐘之後，瑤柱同蝦乾嘅味道出哂嚟，將兩個咸蛋黃一開二，落湯煮多10分鐘，煮到咸蛋黃出油。

4，最後再倒咸蛋白落去滾幾下熄火即成。

我無再落鹽，因為蝦同瑤柱同咸蛋都有咸味，咁樣比較飲得到鮮甜味。

 

完全無落油，係咸蛋自己煮佐之後，會出少少油，蝦同瑤柱嘅味道全部出哂嚟，加埋節瓜嘅清甜，本嚟好清嘅湯，一加佐咸蛋黃之後即刻變得好濃郁，凈係聞啖湯，已覺得好正，試飲一啖，強哥大大聲叫佐「正啊~~~」

鮮甜到不得了，比落肉片總正~~~

滾湯，都可以好正㗎~~

 

之前一日，食凈一碟仔鴨肉，加埋雪櫃有三分一個椰菜，洗凈加埋炒做一碟，又係餸一碟~~~~

 

雪櫃又清哂，舒服~~~~

 

 

極惹味，啤酒鴨，食譜

周末兩日落狗屎般地落足兩日，與強哥屈係屋企好盡興地煲碟、瞓覺、吹水~~~

休息本應如此，無任何地負擔，隨心所欲地選擇自己覺得最舒服的方式去做每一樣嘢。

係間中落下超市補倉，其餘時間，全程無踏出家門。

係超市買佐隻鴨，整一味細個時一到熱天，父親最常整的一味餸，回味下。

無計啦，香港全數都係痴肥與冷酷地雪藏米鴨出售，別無選擇之下想一嘗美味，都唯有退而求其次啦。

食鴨無疑係極平嘅一個選擇，大大一隻鴨，都係27.9蚊，不過雪藏鴨絕對要有心理準備，炒好出哂水之後嘅鴨肉會縮水一大截。

買返嚟嘅雪鴨，解佐凍之後首先要做嘅，係斬斷最具騷味嘅鴨屁股。

然後將成隻鴨分解斬件，因為炒熟之後會縮水嘅緣故，鴨肉最好斬大件。

所需材料極簡單，「鴨肉、啤酒、薑」

未擺上嚟嘅「豉油、糖」

總有漏佐影像嘅香料包「八角、辣椒、花椒」

做法：

1、將鴨肉同薑一起倒入鑊，唔洗落油，就咁乾炒至鴨肉出哂油。

出佐好多油同水啊，我倒走佐啲油，等依味餸食落無咁膩。

乜都唔洗落㗎，就咁凈鑊炒到鴨肉乾身，鴨皮好多油，自己會走好多油出嚟。

2、炒至乾身嘅鴨肉，落生抽老抽糖去較味，翻炒上味，依個時候，已經可以聞到好香嘅香味。。。

如果唔鐘意酒味過多嘅人，可以唔洗落啤酒，就係依步之後，加清水同煮至收汁味道都一樣好好味，不過最好加返二三湯匙嘅酒避鴨嘅騷味。

3、然後將成支嘅啤酒，倒入去。

 

4、無落水，就一隻鴨，一支啤酒，浸過鴨肉，開大火燜至收汁即可。

係咁簡單啦。。。。

（我總將八角花椒辣椒乾包埋一個香料包，掉入去水中煮大約十分鐘就撈起掉佐，等佢有少少香味又未至太濃味，唔想味道太複雜，亦都可落可唔落）

細個時，父親會留返多啲嘅汁，一家人圍住鴨煲，先食一輪嘅肉，然後倒入豆腐芽菜萵苣等素菜入去碌熟，別有風味㗎。。。。

 

5、我唔想食打邊爐咁嘅形勢，咁就收汁收得乾身啲，同埋想佢再香啲，咁就收汁之前，倒入一大扎荽莤~~~

個味道，就似足細個時父親整嘅啤酒鴨嘅味道啦。。。。

 

炒埋一隻鴨最後都係得一碟出嚟，因為啤酒嘅酒精盡已揮發空氣中，凈返嘅係啤酒本身獨有嘅麥香味，配以鴨肉嘅味道，香噴噴，極惹味~~~

熱天食鴨係不錯嘅選擇，因為鴨肉性寒，熱天食就唔會太燥，而且鴨嘅食法多變都好有趣，嚟緊會多諗啲鴨肉嘅食譜介紹俾大家。。。。

 

今日先介紹住一味我屋企秘制嘅啤酒鴨，依味餸，食過嘅人都贊不絕口㗎~~~

有機會，試下`~~

 

用XO醬炒埋一碟椰菜，清甜好味。。。。。

一個晚餐兩味餸，一個惹味一個清甜，菜食完，肉食凈留返第二餐。。。。。

三色甜椒XO醬爆帶子

之前一日食紅燒肉食到個胃唔舒服，不過好彩瞓醒一覺又乜事都無啦，咁就繼續飯照食，餸照煮啦。

無去街市，係樓下求其買啲餸。

買佐包急凍帶子。融佐雪之後，用胡椒粉豉油糖酒醃一醃入味。

 

雪櫃有一包三色椒，切條條。。。。

我好鐘意食依類甜椒㗎，當菜咁食嘅，佢嘅維它命C好強勁，食多有益㗎~~

 

帶子落鑊猛火煎至兩邊金黃，盛起備用。

見有啲少，切多幾條面粉制嘅蟹柳加埋落去。

然後原鑊用油爆香蒜頭，倒入甜椒，落少少水炒軟身，落XO醬同少少鹽俾味，最後倒入帶子入去兜幾下，裝得碟。。。。

 

好香好惹味嘅三色甜椒XO醬炒帶子，就搞掂啦。。。

連強哥都話啲味好好啊。。。。

 

蒸多碟飯，前晚食凈嘅萬惡紅燒肉擺面一起蒸熱，咁就一餐啦。。。。

 

 

無福消受紅燒肉(簡易食譜)

入口即融嘅紅燒肉真係好好味,可惜真係無福消受~~~

可能係太耐無直接食咁肥膩嘅嘢,食嘅時候真係好開心啊,但係食完之後成晚胃都唔舒服,最後全數嘔哂出嚟,先舒服返....

我不嬲以「金剛不壞之肚」著稱㗎嘛,點會食少少肉都頂唔順咧....

最不明嘅係素以「玻璃肚」行走江湖嘅強哥,食得比我多幾倍,竟然乜事都無喎....

唉,莫非,真係要改食齋~~~~

 

係上個星期響灣仔買嘅黑毛豬嘅五花腩，本嚟烚好諗住雪一雪佢跟住切薄片做「涼拌白肉」嚟食嘅，點知係出邊行完街唔想返屋企食飯，咁果一大舊嘅五花腩，就索性擺入到冰格雪到硬一硬，諗住隔日再食嘅，點知一拖拖佐成四五日，尋晚先取出解凍，涼拌就唔敢整啦，肉味肯定都無咁鮮味啦，咁唯有整紅燒啦。

用現成嘅「紅燒汁」嚟整。

磨佐啲薑蓉，落少少水，然後倒幾湯匙嘅紅燒汁入去撈勻個汁。

將五花腩切大舊，與醬汁撈勻。

依個五花腩真係好靚㗎，睇下層數分明，用嚟整白肉係最一流㗎，黑毛豬嘅肥豬肉部份，食落係爽㗎，一啲都唔會流，好奇怪㗎，尋晚咁樣整一整，有排都唔敢食豬肉啦呱。。。。。

我貪快，先用高壓煲煮佐15分鐘，壓到腍哂。。。。。

 

然後再用鑊開大火收汁，等汁稠色濃。。。。。

 

用少少青瓜伴食，希望減少肥膩感，因為用高壓煲壓過嘅關係，五花肉腍到入口即化，而且真係好香㗎。。。。。

懶得炒多一個菜，咁就一碟飯，一碟肉咁簡單。。。。。

 

可能就係咁樣凈肉食，我凈係食少少飯，食佐幾舊肉咋，個胃都係頂唔順嘅，以後都係要堅持多菜少肉先得啦。。。

不過唔可以否認，真係好好味㗎個紅燒肉。。。。。

 

 

 

自製簡易壽司（食譜）

自細我就比同伴更有口福，小朋友嚟我屋企玩，必定會有超過二款以上嘅點心招呼，實在係因為我有一個好得閒又好鐘意玩轉個廚房嘅阿媽。

直至依家，同啲老友聚會，佢哋都總會同我講起當年係我屋企食過嘅某幾款小點心，精緻嘅造型獨特嘅風味，都令我嘅同學仔印象深刻，大家都羨慕我有一個好叻整食嘅阿媽，不過可能係幸福太接近嘅時候，我反而無乜感覺，對阿媽嘅美食，經常地係視若無睹，實在過份。

諗諗下，可能我咁鐘意煮食，好大因素都係受阿媽影響。

以往一到熱天，個個無乜胃口嘅時候，阿媽就會玩好多唔同嘅食物，自己係屋企拉腸啦，整各式涼拌啦，湯粉面啦，包括壽司，都係熱天最經常食嘅食物。

我都未試過整壽司俾強哥食，以往都係同強哥拍住拖出街食氣氛，依排咁熱嘅天氣，都想係屋企整啲簡單嘅壽司嚟食，所以打佐電話問阿媽做法，尋日晏晝憑感覺，又試整佐次俾強哥試下。

睇下，我第一次整，都唔錯呱。。。。

我做到，你都一定可以做得到~~~

做法，跟我嚟~~~

 

先講下醋。

當然出邊有一樽樽嘅壽司醋賣，但係如果整得果一次兩次就要買樽嘢擺係屋企，好唔符合經濟效益嘅考量，所以，壽司醋，自己整。

買一支「同珍」白醋（其它白醋都可以，我貪依個白醋味道無咁坑），佳寶可以買到，倒細半碗仔出嚟，然後浸幾塊昆布入去，如果無昆布，可用一般市場買得到嘅海帶代替，浸一晚，等醋有佐昆布嘅味道，香好多㗎，然後加一湯匙嘅冰糖入去，較個甜味。如果有時間，可以提早整定依個甜醋，醃多幾日味道會香好多~~

糖同醋嘅比例，可以按個人口味去調配，譬如你鐘意酸啲，就落少啲糖，鐘意甜啲，就落多啲糖，一邊調一邊要自己試味，我自己慣佐嘅味道，係三湯匙嘅醋加一湯匙嘅糖，依個係我自己嘅口味。

 

再講下米。

我無特別去買日本米，就用屋企食開嘅金鳳，我覺得軟硬度都好好，煮嘅時候加多少少糯米入去同煮，增加個粘嘅口感，就用平時煮飯嘅水量去煮個飯，唔知係咪我個煲係日本飯煲嘅關係咧，佢本身設佐水同米嘅比例煮出嚟嘅飯唔會太濕都唔會太乾，愛嚟整壽司，幾好㗎。

煮好嘅飯，趁熱將上個步驟嘅醋倒入去，無一次倒哂啲醋，逐少逐少去加，一邊加一邊試味，撈好嘅醋飯，攤凍佢。（所以我搵一個較大面積嘅兜去裝飯）

 

跟住講下紫菜。

我會剪開一截仔,因為我晨個包壽司嘅竹簾比較細,同埋我唔想太大塊嘅紫菜,整到太大個嘅壽司,咁樣細一截嘅紫菜,整出嚟嘅壽司都可以細啲,飯少啲,唔會食得太飽肚...

裁出嚟嘅果截細嘅紫菜,都有其它用途,一啲都唔會嘥㗎....

 

最後講下餡.

其實基本上係自己鐘意食咩就落咩.阿媽通常一定會有嘅係「青瓜、甘筍、蛋絲」，再搭配其它嘅肉類。

不過阿媽話，鰻魚就唔好配青瓜，會有腥味，青瓜可以配腸仔或者其它肉類，鰻魚就配甘筍同蛋。

我無買到鰻魚，咁就用佐屋企有嘅料，腸仔啊，青瓜甘筍蛋，芒果、咸牛肉、午餐肉等等。。。。

準備好啲料，就可以包啦。。。。

我準備多碗水，整嘅時候濕濕手，無咁易痴米。

自己屋企人食，我就唔帶手套啦。

 

我個竹簾係買嘅一個托盤上邊配住嘅，所以係會細啲，整出嚟嘅壽司，都會細啲㗎。。。。

就咁樣，舖一塊紫菜係竹簾上，然後舖一層醋米，最後係近自己嘅果邊，擺上鐘意嘅餡料。。。。

我下次都唔要咸牛肉啦，個味完全唔搭。。。。阿媽平時會擺啲肉鬆加埋沙律醬，青瓜同腸仔等等做餡，我見無肉鬆，諗住用咸牛肉代替，可能都好惹味，點知味道完全唔對路。。。。。好彩得一條有咸牛肉，大家都係咪試啦，係一個好錯誤嘅示範。

好啦，舖好餡之後，就可以卷卷卷過去，卷好之後，再用手握實個飯卷。

整佐三卷。。。。

最後搵把刀，利啲嘅刀，切開一舊舊就搞掂。。。。

刀上我會濕少少水，咁切嘅時候就唔會因為痴住米而切得唔靚。

 

整好一卷卷嘅時候，強哥收工返嚟啦，咁就可以整其它造型嘅飯團，即整即食最美味嘛。。。

叫強哥幫我手影相。

手濕少少水，取一舊飯，用手心位置，陰力去將飯團整實成一舊。

（自己人食，我就無戴膠手套啦，帶住手套做嘢無咁方便，並請大家自動忽略我實在有礙觀瞻的肥手）

 

然後將一開始裁出嚟嘅果細半截紫菜，圍一圈係飯團邊邊，個紫菜嘅高度係高過飯團少少嘅。

睇下，咁樣整好幾個飯團之後，上邊嘅位置，鐘意擺乜就擺乜。

 

材料凈返好多，求其用啲腸仔、芒果、蟹柳、青瓜、甘筍剪碎粒，加埋沙律醬，撈勻，舖係飯團之上，就做成沙律壽司拉。。。。

 

熱天食真係幾好味㗎。。。。。

好清爽嘅感覺。。。。又易整喎，又無嘥料喎，一舉多得咧。。。。

 

飯團另一做法，我煎佐幾塊午餐肉，然後用一條紫菜綑住午餐肉同飯團，好中式，但好好味。。。。。

壽司之嘛，點都得啦。。。。

 

整壽司真係好簡單嘅一件事，煩係煩在事後嘅清理現場~~~

睇下，我第一次整壽司，都幾似樣嘛。。。。。

強哥望住兩大碟嘅壽司，鬼咁開心「晏晝都食咁好啊」~~~~~

其實，成本好低咋。。。。。

都呃得下人嘅。。。。

 

唔記得提，我提早二個鐘醃佐啲酸青瓜。

青瓜切到極薄片，然後倒壽司醋入去浸住佢，擺入雪櫃二個幾鐘，咦，都好入味喎，酸咪咪，又清香，凍冰冰，正啊。。。。

雖然無酸薑，不過有酸瓜，齊哂啦。。。。。

 

自己係屋企整嘅壽司，雖然都係好平價嘅材料，但味道一啲都唔會差㗎。。。。

我煲佐好多飯，凈係用佐一部份落佐醋，食凈果啲係無醋嘅，加埋所有食凈嘅配料切粒粒，夜晚就用佢哋，炒佐個飯，所有嘅材料，一啲啲都無浪費到，係咪乾手凈腳，舒服哂咧。。。。。。