自製糯米包（食譜）

依家係酒樓好少見得到糯米包依款點心，唔知點解咧？

強哥超鐘意食，咁我整開臘味糯米飯，就順便整埋依個糯米包，睇下，又靚又好味㗎。。。。

整燒賣嘅皮好少地方可以買到，我係有一次經過一間舖頭，耳尖聽到有個客問老闆娘要一包「大黃皮」，咁就自己記住依間舖頭有得買，咁下次自己想整嘅時候，就可以再去搵返買。

有興趣整嘅朋友可以去深水埗福華街556號地下「何啟昌」中式點心材料舖購買。通常我過去會座地鐵到「長沙灣地鐵站C2出口」過去會方便好多。。。

有一個打橫嘅大招牌，舖面唔係好覺眼，前舖就好似一間倉庫咁嘅款，後邊就係加工嘅作坊仔，好多中式材料都可以係果度搵得到。蓮蓉豆蓉乜都有，18蚊一斤。

我買依個大黃皮，一包好多隻，都係7蚊雞，可以整三次左右。

擺入雪櫃，可以擺好耐㗎。。。。

蒸糯米飯，順便蒸埋兩條臘腸。

整糯米飯嘅方法可參考我以前嘅食譜「生炒糯米飯食譜」

 

 

然後好簡單，將糯米飯包入燒賣皮入邊。

我包佐兩個樣，一種係封口係底，咁就變成一個圓圓嘅包包樣，另一款就係好似燒賣咁，個封口在上~~~

 

包佐一大碟~~

 

上鑊蒸十分鐘，搞掂。。。

一餐食唔哂，可以擺入雪櫃，想食嘅時候再蒸返熱佢~~~

早餐蒸幾隻嚟食，好快食哂，最好係三日之內清哂，想食，咪再整過囉，好易咋~~

依啲皮係比出普通買嘅餃子皮再薄一半，所以咬落去嘅時候，係幾乎食唔到皮嘅感覺，就係香香嘅糯米飯嘅味，傳統嘅大黃皮係用面粉同雞蛋整嘅，不過依個皮咁黃，睇怕都係添加佐色素，不過算啦，懶得自己整，耐唔耐食一次半次，都唔驚得咁多囉~~

係零難度嘅一味點心~~~

 

衝杯濃茶伴食，滋味無窮~~~

早餐宵夜，一流~~