蝦乾香菇煮勝瓜

從來不願附庸風雅地追隨大流過什麼什麼節日，亦都好肯定對長輩的敬愛並非只得果一年的一次，所以對於母親一節，覺得無非又係商家搞噱頭賺多筆，以我性格，多數如此節日，都淡然飄過。

但係一年當中，總要有所例外，譬如母親一節，我係好樂意配合商家做個傻女，去滿足母親一年一次的虛榮心態，提早一日的星期六已訂好位先同奶奶食飯，難得母親大人好識大體，不介意提早一日與奶奶同時慶賀母親佳節，所以周六的母親節晚宴，我人生中的兩位母親，同座一檯一起慶賀，免我兩頭奔走之虞，兩位母親因我關係而能夠找到相同話題，座埋都能夠相談甚歡，而最難得，同檯的其它叔仔同弟婦，都不拘泥俗例，親切地同強哥一起稱呼我母親為「媽媽」，更意外地，幾個叔仔除佐俾封利是奶奶之餘，連我母親都一樣不見外地俾埋一份請母親飲茶。叫母親感覺份外窩心，同我講話「我好似又多了幾個仔仔一樣」

母親節前幾日同強哥選佐一部高清電視機俾奶奶做禮物，等佢可以同老爺係房睇電視，然後強哥話俾我聽，佢為佐表示對兩位母親同等重視，所以封佐一個差不多價值的利是俾我媽媽，將強哥的這份心思同母親講出來，母親感動到直說「何必咧，何必咧，叫阿強以後無需咁計法，有佢依個半子，我已經好滿足好滿足~~」

令我更加佩服目不識丁的奶奶，大字不識一個，但一樣養育到幾個兒子如此大方識禮，靠的想必是自身的言傳身教吧。

「二叔三叔四叔四嬸，阿嫂多謝哂你哋！！！」

「老公~~~」

~~~~~~~~~~~~~~~~~~~~~~~~~~~~~~~~~~~~~~~~~~~~~

留多母親係我度住多一日，第二日的母親節正日，陪阿媽行街飲茶買禮物，自願甘當傻女，送埋鮮花與蛋糕，下午返屋企之時，路經樓下公園，一班婆婆閒座其中，看到母親手中的鮮花與我拎著的蛋糕，都微微一笑向母親點頭示意，相信因為旁人艷羨的眼光，令到母親臉上散發出一種難掩的喜悅，果一剎那，突然覺得，做個傻女，其實好值得~~~

晚上留係屋企食飯，因為母親不嗜肉，所以煮啲小菜俾佢食。

買佐兩條勝瓜，炒個清甜嘅小菜。

「勝瓜、蝦乾、香菇絲、薑絲」

先落油爆香蝦干，然後再倒入香菇炒出香味。

跟住倒入勝瓜同薑絲，落埋少少水煮熟，最後俾少少鹽調味，搞掂~~

蝦乾本身已帶咸味，所以鹽要落得好輕手先得㗎，太咸就失去依味餸菜嘅鮮甜啦~~

阿媽好欣賞依味餸~~

然後炒多碟峇拉煎炒通菜，阿媽至愛，不過對阿媽嚟講咸佐少少，所以阿媽食佐幾箸就不敢再食，其實我算係食得淡啦，阿媽食得總淡添~~

係樓下斬半斤叉燒上嚟，咁就搞掂一餐飯~~~

全家福~~~

因為無時間煲湯，所以晚上，煲佐腐竹糖水俾阿媽飲，甜哂~~~

 

飲糖水嘅時候，強哥細細聲問佐句「好似總有蛋糕喎」

同母親不約而同「好飽啊，食唔落啦~~~」