蒸餸之牛丸蒸節瓜+榨菜蒸肉片

一啲好平價的食材，用一啲簡單至極的方法，整到一啲睇落好美味的餸菜，依個時候的成就感，就最為強烈。

如下圖，睇落係咪好吸引？

教大家一個材料廉宜，做法簡單，味道超好的餸菜。

材料：「節瓜一條」

做法：「將節瓜橫切一指寬的高度，係中間略略挖一個窿」

然後將叮叮牛丸，塞入節瓜中間果個窿度。

因為係突發其想餸菜，事前無諗過，所以節瓜的厚度切得較薄身，牛丸塞入去稍嫌大粒佐啲，所以牛丸我將佢對半切開，先再塞入節瓜度。

不過無需太厚，節瓜切成一指寬的厚度就剛好，容易蒸熟透，食起上嚟又易入口。

因為手邊剛好有一碗剛剛剝好的粟米粒，咁就擺些少上去同節瓜一起蒸，等粟米的清甜都俾節瓜吸收，其實有無粟米都無乜太大影響嘅，咁我就水滾後蒸15分鐘左右即可~~

我一次蒸兩碟餸，下層蒸一碟，上層蒸一碟，慳水慳力慳時間~~

蒸好節瓜後，準備一個蠔油芡「舊裝蠔油、生粉、清水、少許糖」煮滾後，淋上蒸好的節瓜上，咁依碟餸，就搞掂~~

做法真係簡單到自己都覺得唔好意思講出嚟，材料更是便宜到好似唔洗錢咁，半包牛丸5蚊雞，一條節瓜2蚊雞，加埋粟米蠔油，依一大碟餸菜，十蚊有找~~

節瓜的清甜軟淋，牛丸的香同彈牙，加埋蠔油芡汁的鮮甜，依味餸唔講，真可以扮「上菜」~~

凈返有一條節瓜，半盒牛丸，聽日晏晝自己再整多次嚟食先得，真係好好味~~

如此簡單的做法，如此平民的價格，推薦俾各位師奶們夏季多一味餸菜的選擇~~

買佐一舊台灣榨菜，味道無咁咸，比較清啲，好食得到榨菜嘅香味。

將榨菜切粒粒，肉片切好後用生粉同水醃一醃鬆化，最後將榨菜同肉片撈勻，俾少少麻油撈勻，然後就可以上籠蒸15分鐘左右，就搞掂啦~~

如果用內地榨菜會較咸，可以俾少許糖去中和個咸味~~

又係好送飯嘅餸菜~~~

一晚兩碟蒸餸，簡單又輕鬆~~