豆角的故事（一）之豆角炒魚片

買青豆白豆各半斤。

合共一斤重。

分別「青豆一碟切條條、白豆一碗切粒粒、有凈青白豆全部切粒粒」

備用。

如何發展各自的故事？

且聽我講~~

先講條條切的青豆。

青豆味道稍淡卻要軟可軟要硬可硬，正所謂軟硬兼施正是指青豆啦。

奶奶打佐啲馬鮫魚打成魚肉俾我，煎香備用。

打魚肉方法可見此---->「手打魚肉」

簡單地兩面煎至金黃即可，魚肉好易熟透。

全無添加劑，純手工純魚肉製作，即爽且彈。

煎好的魚肉與青豆同炒，美味的小菜~~

煮多味肉碎煮豆腐，搞掂~~

豆角的其它故事，且聽下回分解~~

準備開工

同阿媽講，決定係六月一日開始我嘅開工大計。

阿媽第一個反應俾我係「落雨唔返工，太陽太勁唔返，心情太差唔返」

哈哈哈，知我者莫若母~~

因為太耐無正式返過工，所以自己規定自己嘅返工時間，每個星期返五日工，每日一定要返足五小時，跟銀行假期之餘總要照顧下自己嘅平時心情而隨機偶爾偷下懶嘅機會

初時有佐搵份工嘅諗法，即刻上佐去勞工處網站睇過，睇佐幾日，朝九晚五嘅寫字樓工作，無一份係我心目中想要嘅職場生活，人一世物一世，做人要開心，工作一樣都好需要得到情緒的支持先可以做得開心，我唔怕辛苦，我最怕係辛苦之餘全無投入感的一份工作，所以同強哥商量過自己嘅一個概念，然後在強哥「人力、物力」的大力支持之下，依家終於一切就緒，定佐六月一日正始開始。

唔會再做零售生意，畢業之後做過幾年寫字樓工，實在悶到想嘔，承父親厚愛遺有少許資金俾我，計過度過自己反正輸得起，於是搵佐間舖嚟玩，開舖做零售，僥倖都叫有賺離場，不過對於箇中玩法實在再無興趣參予，對於毫無技術性支持的零售方式，實在太容易被市場抄襲複製，極易被人在周邊搶去市場份額，做嚟做去，得過做字，都不過係賺份租金，為舖頭業主打份工，都唔見有幾多錢凈抵，開支同收入基本上只可以話係打個平手，根本賺得係雞水咁多，最後好彩有人見我間舖生意好，開佐幾年有班熟客仔，就以一個極滿意的價錢同我接佐去做，我先叫做有賺離場，完全叫僥倖，經此一役，對於設舖做銷售嘅概念，再無興趣。

依次再戰江湖，有清晰的目標客戶群，有自己專長的技術支持，務求在最高質素之下以最低成本追求到最大利潤的目的，暫時成個工作室嚟講，我一人兼任「茶水、秘書、財務、行銷、設計、執行、送貨」等多項職務，希望再度激發體內打不敗的女金剛潛能，無論如何，最緊要係玩得開心，賺得過癮~~

家已成，有業真係要趁後生來立，希望自己能夠堅持，再堅持！！

祝我好運~~

阿媽試用電陶爐

阿媽一直對我用緊嘅電陶爐好有興趣，所以趕係母親節嘅時候送佐部俾佢試用。

同我用緊嘅果款係同一個牌子，不過款式就新過我用嘅果款，就咁睇網頁上嘅介紹，選佐依款有一個制去扭較溫度同時間嘅功能，使用較為簡單，希望阿媽會用得慣，送貨到阿媽度已過成個月，我都無過去睇過，尋日強哥要開OT，我就自己走去阿媽度教下阿媽點用部機。

一睇到部機，咦，真係唔錯喎，外觀上睇幾靚女~~

我部就係直身嘅，阿媽依部就比較上叫橫身啲~~

佢就一樣係2000W火數（火數越大加熱速度就越快），而且最搞嘅係佢總有一個制可以隨時睇到用佐幾多度電，又真係幾得意嘅~~

教阿媽最簡單嘅開關制，聽到佢依部嘅風扇聲明顯細過我部，睇嚟都有改良過~~

而且我發覺佢個發熱盤密集度高過我部，咁個火力一定更加集中，果不其然~~

阿媽就即刻試用佢最心愛嘅韓國陶瓷煲嚟試用下。

就咁睇可能睇唔出阿媽個煲有幾大，但事實上，依個煲，好勁大㗎~~

有幾大？揭蓋睇下，同時可以浸得落兩隻雞㗎~~

阿媽最鐘意佢夠深，浸雞就最一流~~

咁大個煲，我開最大2000火，凍水開始煲，嘩，又真係掂過我部舊款喎，我睇時間，唔洗一分鐘，佢已經開始冒煙，超勁啊，真係唔錯唔錯。。。。

依兩隻雞有毛嘅時候加埋都有成7斤幾重㗎，都叫大隻啦係嘛，阿媽浸雞有自己嘅一套，佢通常擺幾片薑落水，凍水落雞，水滾後再煮多三分鐘然後熄火由得佢浸二十分鐘再撈起，趁熱抹鹽，攤凍後斬雞，咁就浸到又滑又嫩嘅雞啦~~

咁因應部機熄火後繼續會有熱力嘅效能，阿媽就索性水滾後煮多一分鐘，即刻熄火，用餘溫再煲多幾下。

阿媽最欣賞佢嘅定時功能，比起明火更適合老人家使用，煲湯只要設定好時間，就唔洗惊话行開唔记得时间，依家煲夠時間會自動熄火，所以阿媽已打算好以後煲湯就用依款爐專用，暫時其它的功能還有待研究~

浸得靚一靚㗎~~

阿媽幾開心啊，佢話以後早餐愛嚟焗麵包一定好方便，哈哈，以後阿媽又可以多樣嘢俾佢玩啦~~

總括嚟睇，依款真係比我果個舊款掂好多，可惜我部總好健壯，如果唔係，我又要換部嚟玩~~

阿媽浸佐兩隻雞，本嚟諗住我係度食一隻，另一隻俾我帶返屋企同阿強慢慢食嘅（世上最好嘅當然係自己阿媽啦），咁我講得幾講，嗲阿媽幾下，話多人食飯先開心嘛，（實在唔想阿媽周末總要自己一個人係屋企，我返佐屋企嘅話，又凈返阿媽自己一個人冷冷清清係屋企，諗起都覺得好似好唔安樂），終於都叫得到阿媽索性拎埋兩隻雞同我返屋企等埋阿強返嚟一齊食，多人陪，老人家都會開心好多~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先聲明一下，電陶爐我自己真金白銀買返嚟嘅，我同廠家絕對無任何利益上嘅關係，我同意廠家免費使用我嘅圖片做介紹之用，但只做為個人使用後的真實心得為立場。

我向各位網友推薦，純粹係因為自己使用過後覺得非常抵玩，先同大家做出推薦。各位網友購買前請先衡量自己嘅需要再做決定。

關於圓底炒餸鑊可唔可以用係電陶爐之上？我覺得都係一樣可以嘅。

跟爐送嘅果個韓式烤盤，可以派上用場。

睇下，個烤盤揭開之後，中間有一個圓洞。

因為我無圓底嘅鑊，所以就用佐一個圓底嘅煲做示範。

可以將圓底嘅鑊，就咁擺上去，利用中間嘅窿去固定個鑊唔會搖晃，因為電陶爐唔同電磁爐，電磁爐一定要直接接觸到鑊底先會產生熱能，電陶爐直接係爐面就傳遞熱能俾個鑊，所以只需要將鑊儘量接近個爐面，就一樣可以炒到餸。

要解決嘅問題，只係如何令到圓底鑊固定係爐面，所以我就諗住利用個架去固定個圓底嘅鑊解決企唔到係爐面嘅問題。

如果一般較大嘅炒菜鑊，可以將個韓式烤盤掉轉過嚟，一樣有一個窿。

假設個圓底鑊，都一樣可以咁樣擺上個窿度，咁就好穩陣，一樣好似煤氣爐咁樣，開火炒餸啦~~

係咪絕無問題咧~~~

不過依個係理論上嘅推測，實際熱能會否因為多佐一個架而減少，因為我無實際測試過，所以就不得而知啦。

蒜蓉牛油焗金針菇、涼瓜煮豆豉鯪魚

本來預計係自己一個人係屋企，咁諗住求其碌個面算數嘅，差唔多收工嘅時候強哥突然話都係可以返到嚟屋企食飯，咁即刻洗米先煮定個飯先，落去樓下行下睇睇有咩可以買嘅餸。

附近開佐間佳寶，我極少係佳寶買肉一類的食物，視覺上覺得好似唔多靚咁，不過買罐頭或者菜一類嘅都幾多下，買魚買肉，就會係市政街市買，選擇又多又新鮮。

佳寶買金針菇超平，十蚊有四包，而且因為出貨快，啲菇經常都好新鮮，尋日去到，剛好見到金針菇剛剛擺出嚟，勁新鮮，咁就買佐十蚊返嚟。

其實未有概念買佐想點整嘅，咁一邊行一邊諗，靈機一動，俾我諗起平時燒烤咁嘅做法，一個又簡單，又快捷，總好好味嘅食法。

金針菇我凈係略略衝過下水，然後用廚房紙吸佐水份，就直接擺配料啦。

做法超級簡單，搵塊錫紙，將剪去根嘅金針菇擺上去，然後係面落少少帶鹽嘅牛油，落李X記蒜蓉，落少少黑椒粉同幼鹽，落少少米酒上去，搞掂。

任你幾新手，都一樣可做到。

然後用錫紙將金針菇完全包好，擺上電陶爐，用個架隔住，開1600火。

然後較好定時「十分鐘」，咁就完全無你嘅事啦，鐘意做乜就去做乜啦~~

（我會好似焗爐咁，先預先開大火三十秒，等爐面完全熱佐再較細溫度同定時）

完全無需睇火，到佐時間佢會自己熄火，由得佢用餘溫繼續焗多陣都絕無問題，金針菇係好易熟嘅食物，自己本身有一定水份，所以唔洗擔心會焗到燶佐，由得電陶爐自己做嘢，我安座出邊睇電視等待成果~~

強哥返到屋企，拆開錫紙，錫紙嘅保暖效果極佳，打開嘅時候，總冒煙㗎~~

趁熱將所有調味撈勻，食一啖，滑溜溜，香噴噴，金針菇本身的甜味，經由少少的鹽份完全帶到出嚟，牛油的香味好格金針菇，加埋若隱若現的酒香，真係出色之極~~

而且金針菇本身對於肝病或者胃潰瘍甚至係癌症都有好正面的理療作用，常食有益㗎~~~

依次用佐兩包金針菇，都不過五蚊雞而已，而且作法如此地簡單輕鬆，屋企無電陶爐嘅話，可以擺入焗爐焗，都一樣美味，我點講好味都無用，你自己試一試，就知道㗎啦~~

樓下短短一條街，開佐四五檔菜檔仔，係好事嚟嘅，選擇多佐，價錢都會平佐。

涼瓜前日買十蚊斤，尋日跌到八蚊斤，覺得前日食嘅涼瓜炒牛肉未夠喉，咁又行佐圈唔知煮咩餸，於是再買多個涼瓜返嚟，煮多餐涼瓜食啦。

依次嘅涼瓜總大隻，八蚊一斤，我依個已經七蚊，接近一斤一個咁滯，相較隔離嘅罐頭，比佢大隻好多~~

今餐唔係煮牛肉，而係轉成罐頭。

因為時間關係，無時間再切再醃肉咁麻煩，所以直接買佐罐頭返嚟，配埋涼瓜。

罐頭入邊有兩條好齊整嘅炸鯪魚，將佢斬件備用，剁啲蒜頭，罐頭入邊嘅豆豉太多用唔哂，凈係用佐一部份，略略剁一剁碎佢易出味，涼瓜就切粗條備用。

材料的準備，係未好易咧~~

做法總簡單：

1、熱鑊爆一爆蒜頭同豆豉

2、將生嘅涼瓜倒入去，落蠔油調味，炒勻。

3、落二湯匙清水，一細匙米酒，然後冚蓋開中火煲滾後煮五分鐘。

依一步煮佐五分鐘之後，可以離火，等佢冷卻後冚住蓋焗五分鐘，咁就完全會變淋啦。我無嘥時間啊，反正都係要離火焗住佢，我就趁依個時候，用返同一個爐，開始焗道「牛油金針菇」㗎啦。其實焗佐唔止五分鐘，我焗佐有成十分鐘，等金針菇焗好啦，咁就繼續完成依味餸。

4、焗到涼瓜已經變淋之後，因為我焗得時間稍長，啲涼瓜出哂水，所以要開返火，打返個芡落去（生粉加水開好），等啲汁變滑啲，強哥至愛用涼瓜汁去撈飯㗎啦，炸鯪魚要最後先掉入去，係咁易兜幾下，保持佢嘅脆度同香味，搞掂~~

我無再額外俾調味，因為豆豉鯪魚本身已有咸味，加埋蠔油，已經足夠味道，無需再俾鹽。

啲汁多多，愛嚟撈飯真係一流，惹味之極～～

時間剛剛好，強哥返到屋企，飯煮好，餸完成～～

趁熱，開飯啦～～

 

 

喼汁煎鮫魚、涼瓜炒牛肉、牛肉炒飯

尋日晏晝，買佐幾舊鮫魚，先用鹽略略醃一醃入味，然後落鑊干煎至金黃色，起鑊之前，噴喼汁入去煎封表面即成。

喼汁的酸味極好的帶出鮫魚的鮮味，咁樣煎法，係強哥嘅至愛。

買佐一大舊雷公鑿涼瓜，一個足有半斤幾重，好大一隻。

先用水出一出過佢，同強哥都極鐘意食又黃又淋嘅涼瓜，所以出過水的涼瓜，唔揭蓋焗多三分鐘，即成心目中需要的軟淋度。

如果鐘意食爽脆口感的涼瓜，唔冚蓋，就咁用水煮一分鐘左右，然後撈起過冰水，咁樣之後再點樣炒法，都依然能夠保持得到佢又綠油油又脆卜卜的特性啦。

牛肉我會先用「薑絲、生抽老抽、生粉、麻油」醃過味。

然後先落鑊炒至略熟，最後倒入出過水的涼瓜入去一起同炒，加入調味「蒜蓉豆豉同埋蠔油」同少少包尾油炒均，即成~~

極之惹味好送飯~~

晏晝專登煮多些少飯，咁晚上就食炒飯。

晏晝醃過味嘅牛肉留起一啲，剁碎之後同甜粟炒埋做配料。

因為唔想落豉油咁重味，搶走牛肉同甜粟的清香，所以無落豉油，改為落味鹽。

跟手倒入配菜炒勻。

至緊要最後要俾埋一大扎蔥花，有佐蔥花嘅炒飯，香味更上一層樓~~

一人一大碗，炒飯撈電視，搞掂~~

酸辣魚煮魚

都係之前煮過嘅晚餐~~

某日蒸肉餅，肉餅之上舖多幾條菜脯同蒸，幾好~~

節瓜食凈一條，切條後，同洋蔥木耳粉絲蝦乾煮埋一大碟~~~

清清哋幾好㗎~~

又另一日，買佐一塊魚柳，未整過依類魚柳，咁就嘗試下。

先用椒鹽醃一醃好魚肉。

將醃好味的魚柳兩面煎香，然後倒入一罐酸辣罐頭魚

俾少少水，加熱煮收汁即可。。。

不過我嫌個魚柳無乜味，又干又硬，唔好食嘅，唔知係咪我唔識得煮，所以整到佢個口感太干唔好食咧？

不過味道係唔錯嘅，下次我試下掉轉用其它魚去煮~~

腐乳炒佐碟通菜，係咁多~

煎豬扒、水餃、菜

上周的某日中午，煮佐一煲的水餃，碌埋幾條菜仔。

菜湯三鮮餃，不是手制，買超市的灣仔X頭，味道也可接受，人懶起上嚟，自然要放低要求。

晚上整豬扒。

醃料得幾款「咖喱粉、芫莤籽粉、印尼沙嗲豉油」

先用生粉開佐水，將拍鬆的豬扒均勻地浸過生粉水。

然後再將上面的三款香料，加埋少少鹽，均勻地抹係豬扒上。

擺入雪櫃醃入味三個鐘或以上。

另外準備少少蒜粒同紅蔥頭。

晚上直接擺入平底鑊煎熟。

將紅蔥頭及蒜頭一起擺埋同煎。

無需煮得過火，讓肉扒保持入邊的肉汁，食起上嚟先至唔會似肉乾。

煮到變成焦糖咁嘅蔥頭與蒜粒，配以少少沙嗲花生醬，依味豬扒，正~~

炒多碟菜，簡簡單單，就一餐~~