酸菜的做法「食譜」

繼續煮阿媽整嘅酸菜。

頭先打過電話問阿媽酸菜做法，趁記憶猶新，即刻記錄落嚟，有興趣嘅朋友可以記抵佢，有機會可以一試~~

酸菜做法：

1、肉芥菜洗凈，滴干水掛起來，風干至軟身。（不宜在太陽下暴晒）

2、準備一個無油的壇子，倒入小半缸蒸餾水，倒入適量的鹽（鹽的量視水的多寡決定，總之調得較咸即可），然後總要倒入一小碗的洗米水。水不要太多，因為總要塞進芥菜，水太多就會溢出來，而且芥菜總會自己出水，所以要預留足夠的空間，水就不能放得太多。

3、調好咸水後，將洗凈風干變到腍身的芥菜，一扎扎整齊地塞進咸水里，壓實。

4、最後，在芥菜的最上面，塞進幾條竹蔗，竹蔗對半剖開才塞進去，用竹蔗將芥菜壓得再實一點，並且要俾咸水浸過竹蔗的表面，作用是讓竹蔗的糖份與咸水產生化學作用，咁樣酸菜的水就會變出酸味來了。如果沒有竹蔗，都可以在缸的表面，灑上一層白砂糖， 作用和放竹蔗是一樣的，因為白砂糖就是甘蔗榨出來的。

要注意，缸一定不能掂到油，一掂到油整壇的酸菜就發臭變壞了。

酸菜泡大約一到二個星期就可以吃了，期間可以自己拎出來試味，覺得夠酸就取出來，泡得越久就會越酸，剩下的酸水，如果沒有起白泡泡，咁就可以繼續重複以上的步驟，再做多幾次酸菜。

唔酸豆角係咪都係咁樣做法呢？

 

補充返整酸菜用嘅芥菜，就係下圖所示嘅依款。。。。

以上，就係我阿媽做酸菜的方法。

媽媽再三交待，一定唔可以碰到油，一碰到油，就全軍覆滅，白費心機啦~~~

依次係將酸菜切碎，然後用薑絲熱鑊，炒散肉碎，俾少少干辣椒炒香，然後倒入酸菜炒香，俾適量嘅砂糖中和個酸味，俾少少生抽等佢香啲，炒熱炒出香味就搞掂。

阿媽教落，炒酸菜一定唔可以落蒜蓉，因為蒜蓉加埋酸菜，會產生一股好大嘅霉味~

酸菜最格薑，所以無論係炒或煲湯，薑都一定唔可以少佐佢。。。

如果係熱天，愛嚟送粥好一流㗎依款酸菜~~~

買佐一舊仔「上肉」，8蚊雞，剁碎後，一部份炒佐酸菜，一部份愛嚟整佐一碟仔梅菜蒸豬肉，強哥至愛~~~

凈有少少肉碎，買佐盒豆苗，蒜蓉肉碎炒豆苗~~

清清啲，幾好㗎~~

三碟餸，份量少少，就剛剛好~~~

酸菜食凈好多，第二日晏晝，自己一個人係屋企，咁就碌個面，酸菜撈面，好好味㗎。

買佐一包掛麵，發現最簡單麵粉整嘅麵條，味道最香，又香又滑，真係正~~

麵煮好後，過一過凍水，然後淋上自制唦嗲醬，再加埋一大匙隔夜酸菜~~~

拌勻開食，酸香惹味，三幾下清哂成碟麵~~~

晏晝食少少，真係好舒服。。。。