一磅牛肋條配一條蘿蔔

「發牢騷」

睇醫生絕對好講彩數，遇著啲不斷巧立名目收費，價格不清嘅醫生，除佐自認倒霉，真係唔知可以點做。

經朋友介紹，為佐睇強哥嘅鼻敏感，走去睇一專科。

其間不停推薦做依樣果樣身體測試，其實根本無咁嘅需要，睇鼻姐，做乜事要做埋咩睡眠測試，拒絕佐之後，又推薦做肺氣量測試，又推薦做乜一日睡眠質量測試，總之就係要你不停付款，最後幾千蚊埋單，俾佐一個星期藥走人。

一星期後食完藥，再去返要藥，要佐一個月嘅藥，原來再去要藥，凈要藥唔睇症，都一樣要收返睇症費喎，算，俾錢走人，諗諗下次食完藥剛好撞到過年，咁返轉頭叫醫生開多一個月藥，到時唔係香港都唔洗驚停佐藥，「我頂佢個肺啊」，一分鐘唔夠返轉頭，要開多一個月藥姐，個醫生夠膽死開單又收多次睇症費。大佬啊，你係專科醫生，睇症費動下都幾舊水，一分鐘唔夠要補返多一個月藥又要收多次錢，擺明搶錢姐。。。。

就咁樣，一次睇症一次要藥，就俾一個睇落好斯文嘅女醫生，巧立名目正當地在搶佐四千幾銀。

最衰啊，後嚟發覺間醫務所無開到收據俾我，返轉頭補返張，個醫生夠膽死將所有數目另外編排，變到凈係收佐一次嘅睇症費，而藥費就變大佐，真係奸到無人有，問返姑娘，點解同樣嘅藥，同之前比會貴咁多，姑娘都好無奈，話醫生就係咁收費喎~~

雖然無下次再幫襯，但係俾人咁樣昆法，就真係好唔開心㗎啦。。。

家下係香港睇醫生，幾精明嘅消費者都無用，各項收費唔夠透明度，人哋要點搶，你亦都唯有任人係咁魚肉罷啦。。。

~~~~~~~~~~~~~~~~~~~~~~~~~~~~~~~~~~~~~~~~~~~~

尋日晏晝，強哥返嚟食飯。

一塊豬扒切絲，加埋少少彩椒，炒埋一碟仔~~

蒸多條潤腸同臘腸，切埋一碟好送飯。

鏞記新鮮鵝潤腸，每年凈係依排有新鮮推出，味道真係唔錯，連我勁唔鐘意食潤腸嘅人都可以接受得到喎，大家如果有興趣，咪錯過啦。

冬天真係分分秒秒想食肉~~~

買佐磅加拿大牛肋條，牛味重，用五香燜。

冬天食牛腩唯一最大嘅困惑係油脂一凍就結成一舊舊，用熱水洗都覺得洗極唔乾淨。

我都費事開多次鑊去出水啦，直接用滾水衝入去，碌一碌表皮變白。

講下我嘅做法：

1，炒糖色。炒過糖色再燜嘅肉，色水會好靚。。。。

用一湯匙白砂糖

加二湯匙清水，慢火煮到糖水色澤變金黃色。

2、然後原鑊倒入出過水嘅牛肋條，同焦糖拌炒上色。

3、加適量清水，加一湯匙柱候醬，加二湯匙李記紅燒汁，覺得味道偏甜，又落多一細細匙鹽，然後拍一大舊薑，二粒八角，一湯匙酒，一片香葉。

4、燜煮一個小時。

5、一個小時之後，牛腩變得腍軟，將一條蘿蔔切大舊，掉入去，繼續燜煮半個小時。

加佐蘿蔔入去，成煲嘢即時變得香噴噴。。。。

忍唔住即刻上MSN話俾強哥聽「成間屋都係牛腩蘿蔔嘅味道，香到好幸福啊」

晚上再開火加熱十幾分鐘，成煲嘢，香到無得頂~~~~

獨沽一味~~

別無所求~~~

牛肋條我無切成細舊，就咁保持一大舊，冷冷的冬天，同強哥一人一碟飯捧住食，真係幸福到無邊無際~~~

更幸福的，係食完嘢之後，有強哥負責洗碗~~~