一雞兩味之香菇燜雞煲（下）

通常香菇燜雞我都鐘意隔餐再食，因為更加入味。

所以之前一日，買佐一隻雞，一半焗，另一半就先炒好佢，等第二日要食之前，再加返熱佢，咁就非常之入味啦。

一直覺得自己嘅香菇燜雞點整都不如阿媽整嘅好味。

後嚟親自睇住阿媽整一次俾我睇，先至知道其中嘅區別。

有時阿媽覺得理所當然嘅方式，就遺漏佐對我提及，咁對於我嚟講，就係果一下嘅區別，就令到味道大不同。

終於做到同阿媽一樣嘅味道，講下我屋企嘅做法。

1、先將香菇落鑊炒出香味，然後落少少高湯去煮熟，盛起備用。（我用嘅係朋友送嘅真正深山自然生成嘅野生香菇，雖然好細粒一個，但菇味濃郁，野味實足，與雞配搭，只有更好。）

2、原鑊落油，爆香薑片同蒜瓣

3、將斬件雞肉（唔洗醃）倒入鑊，唔落水，慢火干炒至半熟。

4、落少少水，生抽老抽糖，酒俾味，開火燜熟。

炒雞不宜落得太多水，水太多會衝淡雞本身嘅鮮甜味。

係啊，我屋企唔係一開始就將香菇掉入去一起燜，而係先將香菇用高湯煨熟，最後再同煮好嘅雞炒幾下。

咁做法有個好處，香菇唔會因為同雞煮得太耐而變得好咸，總可以保持得好爽口。

我試過啦，以前我就係一開始就將香菇一起掉入去燜，以為咁樣會味道濃啲香啲。

但其實，只需要最後一步再將香菇掉入去係咁炒幾下，成碟餸嘅味道，真係有好大區別~~~

其實依個時候，已經食得啦，不過我想雞入味啲，所以留返第二日再食。

第二日，天寒地凍，咁就一於用煲仔上。

先係另一個鑊炒返熱碟雞，然後煲仔上火燒興，再將雞倒入煲仔度，咁樣食到尾，雞都係暖笠笠~~

四弟嘅太太有應酬，得佢一枝公，強哥就叫佐佢上嚟屋企食飯，飯後兩兄弟可以一起打下機。。。。

四佬一入到屋，我問佢肚餓未

跟住打開雞煲嘅蓋，佢嘩一聲「聞到個味道，即刻覺得好肚餓」

係㗎，只係簡單嘅薑同蒜，以及豉油糖，已經可以燜到好香好香嘅味道出嚟啦~~

炒多碟牛肉。。。

牛腱較大，炒好後，大大一碟。。。。

又買佐一盒豆苗，再買包五香豆腐，加埋炒成一大碟~~~

果倆兄弟食到捧住個肚，飯後即刻開工打機~~~