豆腐魚腩煲「食譜」

食來食去，始終覺得屋企煮嘅餸菜，味道最真實。

無人工合成嘅味道添加，只簡單地用豉油鹽糖醋，配埋食物本身味道，已經非常美妙。

以前唔識欣賞，一味覺得出街食到嘅味道加火候先至為之標準味道，為之傾倒經年之後，漸漸發覺，唯有餸菜本身略加適當少少調味，果種天然生成，淡淡然地恆久存在，先至係生活嘅本原。

幾款早前煮落嘅餸菜。

肥牛炒薯仔絲。

肥牛白鑊煎至出油盛起，利用肥牛本身豐盛油脂，倒入薯仔絲同青紅椒絲猛火炒熟，最後倒入肥牛一起略為翻炒，落鹽、生抽、糖、孜然粉調味。

肥牛本身有好多油脂，所以先白鑊炒熟逼出油脂，最後再俾調味，咁樣即食得到牛肉本身香味，亦都有香料略為調味，無論口感或味道，屋企嘅小炒，都絕不遜色。

買菜芯要睇下個尾，如果有一點白色嘅芯或者有一個細細窿，咁就表示個菜心嘅水份不足，食落肯定唔夠爽甜，拎入手沉澱澱，個尾一片水汪汪嘅菜芯，咁就絕對買得入手啦。

買佐一把紅菜芯，好清甜，一啲渣都無，炒之前係褚紅色，炒好之後變返綠色，一遇熱啲紅色素就走哂凈返綠色素，真係好神奇，係近依兩年先至零零星星間唔中係啲菜檔仔可以買得到，可能因為售價較之普通菜芯稍貴，一般菜檔唔想入貨，不過如果遇著，必定要買嚟一試。。。。

就簡單地用蒜蓉炒熟，落鹽俾味，已經覺得非常美味。

最後回尾俾佐啲啲豬油兜一兜，豬油菜芯，一流~

係阿婆教落，炒餸其實唔洗一開始落太多油，落幾多都會被菜汁衝唔見，所以最後炒起之後再俾返少少油包尾，食落就會非常覺味~~

~~~~~~~~~~~~~~~~~~~~~~~~~~~~~~~~~~~~~~~~~~~~~

一個好易煮，但係好好味嘅豆腐魚腩煲教大家，新手都可以一試，好簡單㗎。

做法：

1、一盒硬豆腐，切塊，用薄薄一層油，煎至兩面金黃，盛起備用。

可以稍稍開大火去煎，咁樣可以好快地將表面煎好，內邊又可以保持滑嫩。

2、傾走大部份油，留返少少油，略為炒一炒香魚腩，目的係想魚腩啲油走出嚟，同埋等個魚肉略熟定型。

魚腩可以係街市買嘅時候，叫檔主代為斬件，自己返嚟再用清水過一過即可用。

因為凈係食一餐，所以我買佐少少一件魚腩咁多，都係8蚊雞咁多咋，如果屋企人多，可以買多二三件魚腩都唔怕。

3、跟住倒入切好嘅薑絲同蒜瓣，略為炒出香味。

薑多啲都唔怕㗎，會好香㗎。。。。蒜我就用佐大約三粒，簡單地拍扁即可。

4、將煎好嘅豆腐放返入去，加少少水，落生抽老抽糖，少少料酒，少少鹽去較味，開中大火，煮大約七八分鐘即可~~~

唔洗煮太耐，魚肉快熟，煮熟其實就食得啦，過程當中唔好翻得太多，驚啲豆腐會散開，咁就唔靚啦，通常我覺得第二餐總入味，所以我會先提早煮好，食之前再翻鍋兜返熱佢，正到不得了~~~

如果水多可以俾返個芡汁去收汁~~~

5、熄火後，倒入適量蔥段，拌炒勻。

6、最後倒入一個砂煲仔，再略略開返火，食得~~~

（其實就算唔入瓦煲仔，上個步驟之後直接上碟都可以食得啦，係我想保暖下，所以入瓦煲仔）

魚腩一件8蚊，豆腐一盒5蚊，唔計薑蔥蒜豉油糖，依煲餸，都不過係13蚊而已，時下物價飛漲，難得如此平靚正嘅餸菜，當然要強力推薦~~~

炒多一碟油麥菜，俾少少菇菇入去，碟菜即時清甜好多~~~

一碟菜一個豆腐煲，滿意~~~