芋粒炒飯

內地嘅發展如火如荼，俾好多人睇到佢嘅無限前景，近年內地人嘅消費態度，已經令到國際商家眼前為之一亮，且不提佢哋嘅消費意識是否正常，起碼果份消費嘅心態好清楚咁表明，對於未來佢哋係好有把握，今日花佐嘅聽日一樣有能力再搵返，所以會比較捨得洗錢。

反觀香港，日前強哥買兩杯栗子杯，企係佢隔離有個阿叔望佐下，然後搭句嘴「嘩，乜要成12蚊杯咁貴啊」

最搞嘅係店員都搭埋嘴「係㗎，成12蚊杯㗎，我自己都唔捨得買嚟食」

返嚟強哥同我講返依啲對白，聞後嘅感覺真係好心噏，12蚊杯嘅點心，要買其實人人都買得起，但係一般嘅市民，對消費嘅果種保留心態，其實真係好大一個警號，人人但求自保，有錢都唔敢亂洗，多個錢傍身比乜都重要，其實背後嘅意義，係表示大家對於本城嘅未來，持有好大嘅保留態度，如果連身在其中嘅人對未來都睇唔到希望，咁依個城市嘅將來，實在堪虞！

~~~~~~~~~~~~~~~~~~~~~~~~~~~

講返自己果個電陶爐，真係幾好玩。。。。

我依家連個焗爐都收起佐，好多要焗嘅食物，直接用個爐搞掂。

早餐要焗返熱包包，直接擺上爐度，細火燒二分鐘，已經燒到熱辣辣，脆卜卜，軟綿綿，好似剛剛焗好咁嘅效果啊~~~

晏晝炒好餸，強哥未返到嚟，咁就開少少火等個爐頭和暖之後熄火，將炒好嘅餸擺上去暖住佢，咁等強哥返到屋企即刻可以開得飯，而且總係暖笠笠㗎~~

天冬炒凍得好快，咁樣座熱啲餸嘅方式，真係非常好~~~

某日晏晝，用咸酸菜炒佐一條麻辣腸。

再炒多個韭菜炒蛋。。。。。

晏晝煮多啲飯，晚上可以食炒飯。。。。

炒飯嘅材料悉聽尊便，係間酒樓食過用芋粒炒嘅飯，帶有淡淡芋頭味，食落咬到芋頭嘅綿綿口感，非常有趣，所以屋企有芋頭炸好（要整芋頭扣肉），咁就一於整返味炒飯，用芋頭炒。

另外準備佐啲麻辣腸同大量蔥花做配搭。

炒好後，一人一大碟，簡單又好味啊~~