細個時係要到過時過節,阿媽同婆婆先至會整好多好多米發糕,等親朋戚友上門拜年時可以招呼客人飲茶食點心.
都好多好多年無食過依款點心啦,為免自己遺忘依款傳統點心嘅做法,早幾日打過電話問阿媽做法，然後自己試整一次,記錄落嚟,俾大家參考下.
先俾大家睇下,整好之後,就咁睇外形,同細個時嘅記憶,真係一模一樣㗎....
色彩豐富,我諗小朋友應該都一樣鐘意食~~~
作法其實唔係好難，只不過比較繁複，要慢慢理解，我已儘量寫詳細。
細個時阿媽係用一個大大石磨去磨米漿,咁依家無乜可能再用個石磨去磨啦,所以我就轉佐用電動攪拌機去處理依個步驟.
步驟：
1、將平時食飯用嘅米,洗凈後,清水浸一晚.（因為係第一次試整，就用佐少少兩杯米的份量）
2、加水少少，分兩次，將米打碎成漿。
（圖中的水略多，我後來又倒去一大半的清水，米同水嘅比例，我大約係水會超過米薄薄一層就足夠）
係依度有一個問題，阿媽話，泰國米無乜粘性，打好嘅漿好「鞋」，唔知整出嚟對糕嘅口感有無乜影響，所以我諗下次試用日本珍珠米嚟整，唔知效果會唔會更好。
可能會有網友想問，水同米嘅具體比例，咁可以好清楚地講「我唔知」
現代人太過拘泥於食譜的具體份量，要所有條件明確清楚之後先會動手去做，其實煮食最好玩之處，就在於可以在一個基礎之上可以有無數的變化，無論如何，有一個基礎的全面的概念之後，去做佐，先算。。。
經驗根本就係無數次嘗試之後嘅成果，如果一次都無嘗試，又點會形成經驗。
細個時見過長輩製作依款點心，根本無一個比例與份量，全憑感覺與經驗，一去樣玩得開心，食得開心。
好啦，米漿打好啦。
睇下圖，由左至右，我將佢啲分為大中細三碗擺住。
依三碗，其實係全部一樣，生嘅米漿。
我會分別對三碗做出處理。
大碗就先咪理住佢，擺一邊。
3、將中間中等大嘅生米漿，擺上爐，細火煮30秒左右至微熟。
4、然後將煮至略熟嘅米漿，倒入最大碗嘅生米漿入邊撈勻。
咁就形成較大一碗嘅生熟米漿混搭嘅米漿。
5、最細嘅一碗生米漿，倒入一細匙嘅酵母粉，撈勻，等15至20分鐘左右，見到佢發酵起佐好多泡泡變澎脹。
6、將上個步驟，已發酵嘅細碗米漿水，倒入最大果碗米漿度，即係全部米漿已經走埋一堆啦，依個時候，就進行最後發酵。
（我由早上發到下午三點左右，因為驚發酵太耐會有酸味，所以我落佐少少少少蘇打粉去中和個酸味）
發酵好嘅米漿係白色嘅，依個時候，可以隨意選擇想要嘅顏色。
我用佐綠色同粉紅色。
色素如下圖所示，話就話係用天然嘅水果提出嚟嘅顏色，你信唔信啊，不過偶爾食少少，身體應該都有能力排出體外嘅。
一般印尼商店都可以買得到依幾啲色素。
將米漿分為三碗，一碗白色，一碗綠色，一碗粉紅色。
依啲色素顏色好勁，只需要滴少少一滴已足夠。
蒸好後色澤會出嚟好清楚。
將較好色嘅米漿，分裝到細杯度，上鑊隔水大火蒸8分鐘即成~~~
係咪好靚咧。。。。。
個口感，好似白糖糕啊。。。。
同細個時食嘅感覺，係好接近好接近㗎啦。。。。
我自己都俾自己80分~~~
好好味~~~
有興趣唔怕麻煩嘅朋友，可以一試~~~
沒有留言:
張貼留言