因為夜晚約佐強哥外出撐檯腳，所以晏晝依餐就求其消滅佐屋企嘅存貨。
一隻南瓜仔。
成熟嘅南瓜大家都知道，係黃色長形嘅。
咁BB南瓜仔，食嘅人可能好少。
香港亦都好難撞得到有賣，早幾日好難得係街市見到有一檔菜檔有得賣喎，即刻買佐個返嚟，都好多好多好多年未食過啦。。。
係未一啲都唔似南瓜？
切開出嚟睇下，同翠肉瓜極相似，我剛剛學識煮飯嘅時候，初初買到翠肉瓜，就一路以為就係細個時成日食到阿媽煮嘅南瓜仔，後嚟阿媽先話俾我聽，根本係兩樣嘢嚟㗎，後嚟阿媽專登帶我去街市搵到真正嘅南瓜仔，指俾我睇係果一樣嘢，先知道原來自己搞錯佐咁耐。。。。
依次係真嘅南瓜仔嚟㗎。。。。
雖然切好後嘅樣真係好似翠肉瓜，不過味道係完全唔同㗎。。。
用蒜蓉同肉碎炒埋個南瓜仔，好清甜啊。。。。有淡淡南瓜嘅味道，但口感又係少少脆嘅感覺，好鐘意~~
一個南瓜仔炒埋大大一碟，再蒸多碟飯，晏晝食清清啲~~~
老公一返到屋企，即刻開得飯~~~
食返舊時嘅味道，好開心~~~
沒有留言:
張貼留言