麻葉似乎潮州人食得比較多啲。
尋日係潮州人開嘅雜貨舖，買佐半斤麻葉。
買多啲，一次炒好擺住可以食幾日。
炒好嘅麻葉可以凍食，愛嚟送粥最一流。
香港買到嘅麻葉係略為醃過嘅，就唔係新鮮嘅麻葉。
有人話，麻葉食起上嚟會少少麻，所以稱之為麻葉。
哈哈，依個可能係用嚟呃細佬嘅講話，實情係麻葉嘅莖有極高嘅纖維成份，成熟嘅麻葉莖壓扁之後浸水，會浸出好多白色嘅纖維出嚟，古時候嘅人，就會收集依啲浸出嚟嘅纖維，集中之後，再編成一條條嘅麻繩以供使用，因此，依種植物嘅葉，就被稱之為「麻葉」
食佐係唔會口麻㗎，不過有極高嘅纖維成份在內，對於清理腸胃效果極好，其味帶甘，食落有少少苦苦哋嘅感覺，愛嚟送粥非常非常一流。
因為佢嘅莖幹有極高纖維，咬落會起好多渣，所以買返嚟嘅麻葉，我都會慢慢清佐啲莖出嚟唔要。
凈葉食落會滑好多。
麻葉極吸油，所以炒依味餸，要落多少少油去炒。
用蒜蓉就咁炒已經好好味，所以落多幾粒蒜蓉。
因為佢本身已經有咸味，我又想佢香啲，咁就落啲豆醬落去，怕太咸，所以麻葉浸水耐啲，過多幾次水，咁就剛剛好個味啦。
買半斤係好多㗎啦，一餐食少少已經足夠。半斤可以食好多餐。。。。
強哥以前唔識麻葉為何物，係帶佢去食過幾次潮州粥，配埋嘅小菜有炒麻葉，佢食過覺得味道好好，先至跟住我鐘意埋。。。。
整肉餅凈返少少豬肉，加埋落去一起炒，有肉味似乎心理上感覺好味啲啲，炒好後嘅麻葉再滴上幾滴香麻油撈勻，正~~~
我覺得肉餅送粥都好好。
咁就蒸佐一味我婆婆自細蒸俾我嘅味道。
調味有「生粉、生抽老抽、糖、蒜2粒剁蓉、米酒少少」
同免治豬肉加水攪至起膠，入碟上籠蒸15分鐘即成~~~
簡單地蒜蓉同豬肉嘅味道，有濃濃嘅細個時嘅味道。。。。
好鐘意~~~
加埋自家制咸蛋，就依啲餸，晏晝已煲定一大大煲粥，咁就可以晏晝食到晚餐。。。。。
舒服~~~
沒有留言:
張貼留言