撈飯拌面一流---橙麵醬

會離開屋企一排,先將積係電腦嘅一D食譜POST上嚟,到時到候會自動發表,費事到時又積埋積埋一大堆圖片.所以暫時凈係有新食譜出嚟而回復唔到大家嘅問題,見諒見諒~~

早排D新奇士橙皮好厚,咁就整佐一味愛嚟撈飯或者送面都極好嘅肉醬.

做法:

1,先將橙皮表面嘅一層磨走.

一嚟係去佐橙皮嘅苦澀味,二嚟係因為D橙表面多數會有防腐劑同一層蠟咁樣嘅嘢,磨一磨走佢食得安全好多.

2,然後準備材料:

子薑,蝦米,香菇,橙皮.

 

3,橙皮可提早一日準備定,磨佐皮嘅橙皮,用水煮二三次,再浸係凍水度,咁食起上嚟就無咁澀.

 

4,所有材料切粒粒.

 

準備主要嘅醬料,面豉醬同甜面醬.

 

5,將免治豬肉炒一炒.

6,倒入香菇蝦米同橙粒炒一炒出香味,裝起.

7,用油爆一爆子薑粒(子薑粒要多D都唔怕,我影像時未擺落去)

8,倒入面豉同甜面醬炒出香味.

 

9,然後將所有材料倒埋一起,加水燜至收汁即可.熄火之後淋少少麻油,搞掂....

 

有少少似北方嘅"炸醬",不過加多佐橙皮同子薑,個口感同味道,都完全唔同㗎啦.

橙皮粒粒食起上嚟淡淡嘅清香加埋子薑嘅脆而不辣,醬嘅濃香穿雜其中,愛嚟撈飯真係好一流㗎....