煎包

好耐無食過生煎包，尋日朝食早餐較遲，所以同強哥商量話，不如晏晝唔食飯，我返屋企整生煎包食囉。

聽到晏晝有生煎包食，開心到佢咧，搖頭晃腦係度笑嘻嘻「係咪真係晏晝有水煎包食㗎」

切，又唔係咩難事，當然可以滿足到依個願望啦。

睇下，三幾下功夫就整好咁樣一大碟啦~~

具體的生煎包的做法我以前寫過好詳細。可以參考這個網址「生煎包的做法」

今日整包速度真係勁快，因為返到屋企嘅時候距離強哥收工返嚟只凈抵四十幾分鐘，我都唔知趕唔趕得及添。

於是發揮我摩達手的能力，快速的拌了餡搓佐面。

當然，順序上來說，我會先搓好面，然後係醒面的當下去拌嘅餡。

我專登睇佐時間，我搓好面只用佐三分鐘。

其實完全無需搓得太勁太光滑先得，求其搓得成一團就可以啦。

餡依次較得特別香，我自己都記錄下，免得自己下次忘記。

我先磨佐姜蓉，然後落生粉、胡椒粉、生抽老抽、糖、少許鹽、米酒、香油。

肉加佐配料拌起筋之後，倒入半個剁碎的洋蔥，拌勻就是餡了。

我無計過用幾多餡配幾多面粉，都係估下估下嘅~~

又真係好神奇好神奇，次次都用得剛剛好~~

一啲都無浪費到~~

因為時間較短，所以開佐少少爐頭興熱個爐，然後擺包包上去發酵。

煎包包嘅時候無浪費時間，順手切佐一個大蕃茄，滾一個蕃茄蛋花湯配包包食。

由入門口到到擺到包包同湯上台，都係用佐九個字左右咋，強哥返到嚟剛剛煎好，我總得意地向強哥匯報自己嘅摩打手有幾咁叻叻~~~

好彩，不枉我流佐咁多汗。

剛剛煎好上檯的包包，煎得香香脆脆的包包屁股，咬一啖，真係香酥脆口的無話可說，強哥邊食還要拎著個碟接滴下的新鮮肉汁，直呼「鮮吶，美吶」~~~

水煎包最好食之處莫過於新鮮煎好馬上送進口裏的一剎那~~~

唯一的缺憾係我做得稍大佐些，我不過係食佐四個包包，加埋一碗湯，就飽到頂唔順，最後依一大碟嘅生煎包，同強哥點都食唔哂啊~~

 

 

紅燒

買佐兩件佈包豆腐。

紅燒當中嘅紅代表係豉油，燒即係北方人講嘅「煮」，紅燒即係指用豉油去燜煮食物的一種方式。

尋日整紅燒豆腐。

豆腐切一件件，落油炸透。用一個碗仔去炸物，咁樣用油較少。

炸至金黃即可，我無乜耐性，略略炸成差唔多就撈起啦。

準備其它配料：

「薑絲、香菇絲、榨菜絲、肉絲」

做法：

1、先將薑絲同香菇絲爆出味道。

2、肉絲我就簡單地用豉油糖生粉醃佐味道，然後落鑊兜一兜，最後轉色之後俾少少幾滴老抽入去，咁肉絲就會香好多㗎啦。

3、炒好肉絲之後，將所有材料一起掉入鑊，落水，加面豉醬，少少糖，燜五分鐘左右即可。

4、起鑊前，俾一扎蔥段入去。

一味紅燒豆腐，就煮好啦` ~~

炸過嘅豆腐表面較為粗糙，咁樣燜煮嘅時候，所有醬汁的味道就會走哂入去豆腐度，咁樣食起上嚟嘅豆腐，超好味㗎~~

三碟

衝好涼之後，將污漕衫換出嚟開機洗衫，將已晾乾的衫收起，座係地下，吹住風扇，對著電視，聽著新聞的聲浪，一邊拆衫架一邊將衣物分類疊好，強哥見狀，自動座埋我身邊，幫我整理好衫架擺返好原位，再自動地將我折好的衫擺返入衣櫃。

此情此景，何其熟悉。

完全似足我心目中對於家庭生活的所有憧憬，父親與母親的生活片段，躍然眼前。

好後生嘅時候已經好清楚自已需要嘅係乜嘢，就係如此平凡的家庭生活，一日三餐，油鹽醬醋，彼此互敬互愛的夫妻關係，滿足而幸福。

就像我明白，真正的愛情其實不需要過多的苦難與波折去證明一樣，真正的生活，也只有在細水長流中，才真正顯現出它的天長地久。

千祈莫以為婚姻只是那一場華麗的婚禮，真正的婚姻，其實由婚禮過後才正式上場。所以和強哥，連那樣一個華麗的籍口都能免則免，我們的婚姻，直接由生活開始。

~~~~~~~~~~~~~~~~~~~~~~~~~~~~~~~~~~~~~~~~~~

洋蔥半個、甘筍一大條、墨魚丸三粒，蠔油調味，炒埋一碟。

通菜半扎，碌熟之後，伴以腐乳醬。

紅腸半條，甜豉油麻油炒埋一碟仔~~

三小碟，伴白飯~~

鴨脾（2）

鴨脾來到第二日，換過另一種食材去配合。

睇下，係咪一樣咁靚咧~~

做法同之前一日嘅大同小異，將雪櫃嘅豉油鴨脾同醬汁一起加返熱。

熱透鴨脾之後，倒入新鮮菠蘿片適量，略略煮一煮至出味，豉油加佐菠蘿嘅香甜，不得了~~~

就係咁簡單，又將原來單調的豉油味道，變化出另一天地~~

菠蘿+鴨脾=菠蘿鴨

對於強哥依個菠蘿怪嚟講，咁樣一碟菠蘿鴨，一啖一天堂~~

另整一味「雜炒」

脆肉瓜、蒜蓉、豆豉鯪魚、腐竹、甘筍

炒炒埋埋一大碟~~

清爽惹味~~

全家福~~

 

鴨脾（1）

竟然俾我發現去開嘅凍肉舖近排有生鴨脾出售。

鴨肉味道雖然重，但係只要識得烹煮，佢本身淡淡陳皮咁嘅肉香味，其實好特別好好味，不過平時好少買全鴨嚟食，因為香港市面可買到嘅冰鮮鴨，都好肥好多油，煮好後肉都唔見佐，只見表面浮起的一層油，諗起都無胃口，所以極少極少買嚟食。

不過依家發現佐有一包包鴨脾出售喎，幾開心啊，鴨脾嘅肉又多，皮又薄，最緊要係鴨脾嘅皮下脂肪較少，而且因為走動多，所以鴨脾嘅肉質好結實，唔會好似鴨胸咁一個唔小心，買到嘅又鞋又梅，簡直係災難。

一盒有三隻鴨脾，加埋雪櫃凈有嘅一塊鴨胸，加埋煮好佢。

做法好簡單：

1、皮向下煎出油，擺幾塊薑入去，無需落油，就咁乾煎。

兩面煎至變色，睇下，出佐幾多油出嚟。

傾走佐多餘嘅油份，然後落調味。

2、落水，生抽老抽，黑糖，米酒一細匙。

無需落鹽以免太咸，因為最後另有處理。

3、然後冚蓋燜煮二十分鐘。

 

其實依個時候已經好好味可以食得㗎啦，不過我係禮拜日鹵好嘅，我哋又唔係屋企食飯，所以就浸住佢擺入雪櫃，等佢總入味啲。

4、第二日，食幾多就拎幾多鴨脾出嚟，俾一部份醬汁，再落幾匙清水，開火熱返熱佢，咁樣再加水煮一煮過嘅方式，會好似剛剛鹵好嘅效果，又嫩滑又入味~~

其實依味餸，好適合返工嘅人，假期嘅時候，鹵好多啲擺係雪櫃，夜晚收工返嚟只需掉返入鑊加少少水，再煮返熱佢就食得。可以擺得起碼三五日都唔怕㗎。

用簡單地豉油糖鹵好的鴨脾，本身已經係一味餸，不過如果想食起上嚟更多變化，可以好似我咁，準備一粒咸檸檬。

5、加返熱好嘅鴨脾，最後倒入剁碎佐嘅咸檸檬，略略煮一煮，咁就變成一碟好美味嘅「檸檬鴨」啦。

依味餸主要以甜酸味以主，酸就嚟自咸檸檬，甜就係糖，個比例可以自己調較，所以一開初煮嘅時候我唔會煮得太咸就係咁解，最後要落埋咸檸檬，可以再自己落糖去調味。

成隻加返熱之後先再斬件，然後將醬汁淋上面。

熱天無乜胃口嘅時候，咁樣一味「檸檬鴨」，絕對能夠提升你嘅胃口，相信我，咁樣一味檸檬鴨，一定要試一次~~~

用蒜蓉豆豉煮佐碟通菜，惹味~

全家福~~