北京炸醬面

其實我都唔係好清楚，究竟應該叫做「炸醬面」抑或係「雜醬面」

因為有唔同0既北方朋友同我有過唔同解釋：

一，炸醬面：因為個面醬係需要用油炸出香味，所以叫炸醬面

二，雜醬面：因為用佐二种醬料，所以應該叫雜醬面。

聽落，二種解釋二種叫法，都好合理。

-------話知佢叫乜面啦，好食至緊要。

材料：

1，香菇浸發之后切粒+蔥粒+薑蓉+蒜蓉

2，五花腩一舊，剁粗粒（或者切成細細一條條）

3，北京六必居干黃醬+甜面醬

 

作法：

1，熱鑊落油爆香所有材料之后盛出待用。

2，干黃醬與甜面醬各取一半的量，用油爆出香味（僅用干黃醬味道太咸太干，所以需要用少少甜面醬去中和個味道）

3，上步驟的醬料爆出香味之后，將步驟1的材料同埋豬肉倒入去炒勻炒香。

4，烚熟北京寬面，切D青瓜絲碼係面上，再加上一大匙炸醬~~

撈勻可食~~

為免凈食面太干，滾佐一個芫莤冬瓜肉丸湯~~

清清地，一啖湯一啖面，夏季食來份外好滋味~~

 

全手工製作北方涼皮

 

阿娘隔離屋搬黎一對北方老年夫婦，以阿娘熱情的性格，好快同果對夫婦變得好熟絡，時不時娘親就會整D廣東點心，都會捧D過去俾佢地試下自己O既手勢，做為回敬，果對北方夫婦亦都會整D北方點心俾阿娘。

試食過佢D整過既北方特色小食「涼皮」，口感非常之好，索性問佐做法，想食既時候自己整黎食，當然，有咁好玩既玩意，都要預我一份啦~~~問過詳細做法之后，自己係屋企都整埋一份~

先睇下整好之好既成品~~

晶瑩剔透，口感煙煙恩恩，非常成功`~

材料：面粉+水

（面粉就一般普通面粉，水就係室溫既清水，材料就咁簡單）

作法：

1，加入適量既水

2，將面粉搓成一團，揉搓至面團光滑，跟住擺響度半個鐘醒面。

3，跟住放水落去輕輕潑一潑係個面團度。（因為初次整，無經驗，其實唔應該用淺盤，而應該用高身D既大碗）

4，潑佐一陣，D面漿就開始融入到水度，面筋開始出現。

用淺盤潑佐一陣之后覺得好難搞，索性換到一個高身D既碗度，跟住發現一個最簡單既「洗面筋」的方法，就係用手扯住面團的一端，好像洗衫咁，係個水度前后咁用陰力潑來潑去，潑走晒D面漿。

睇下，當面漿全部衝到水度之后，剩底既就係面既筋啦。

點樣先知已經衝洗乾淨佐咧？可以開好細既水係水喉底下，略略衝一衝個面筋，如果無佐白色水漿，咁就證明已經「洗好面筋」啦~

一團純粹的面筋係好有彈性的~~

好啦，清理下現場。

依家現場有一大碗既面漿水，同埋一細碟既面筋。

點處理依二樣野咧？

1，面漿水：就咁擺住唔使理佢，擺一晚，等清水同面漿分離。

2，面筋：加少少酵母粉落去搓一搓，靜止一晚等佢發酵。

（上海有一道名菜「四喜烤麩」，入邊既烤麩，就係依個面筋既最終形態啦，通常烤麩都係擺係豆腐檔度售賣，但係其實烤麩完全同豆無關係，真正的烤麩就係咁樣用面粉「洗」出黎O架）

滴嗒滴嗒滴嗒。。。。。

一晚時間過去~

因為面漿重於水，所以表面就浮起佐一層清水，底下就係面漿，咁就要小心咁刮走面上果陣清水，留下既面漿水就係製作涼皮既最終原材料啦！

睇下，倒走佐清水之后既面漿，潔白無瑕~~好濃郁添~~

最后形成涼皮最終形態的過程就好簡單，搵一個盤，抹一點油，倒D面漿，大火蒸一二分鐘，係咁簡單就一張涼皮出黎啦~！

 

涼皮整出黎啦，面筋咧？

發佐一晚酵既面筋，都係蒸一蒸佢，蒸大概五六分鐘度啦，可惜我因為係第一次試整，酵母落得少佐，面筋無乜點發起，不過味道，真係同街食果D係一樣咯~~

下次如果想食四喜烤麩可以自己全程自製啦。。。

勁啊~

通常北方人食涼皮，除佐涼皮，會落點青瓜絲啦，花生醬啦，醋啦，辣椒啦依類野，撈勻之后凍食~~

我無青瓜絲，用佐甘筍絲~~一樣係咁好味啊~~

題外話，擺一個我整過既四喜烤麩個樣上黎俾大家睇下~

個味食過既人都贊正`~

 

 

蓮藕宴---糯米蓮藕丸、煎蓮藕餅、南乳炒蓮藕

尋日買佐十蚊豬肉，七蚊二舊仔的蓮藕，係咁就整佐三味送菜。

用佐四分一既蓮藕同二分一既豬肉整佐依個肉丸。

係未好靚靚咧~~

係街度食過依種肉丸，不過多數只係白色，因為自己好鐘意黑糯米既糯香，所以除佐白色，額外嘗試整佐黑糯米~

黑白相映，幾好既視覺效果~~

係街度食既依种肉丸只係用佐豬肉同馬蹄粒，我唔鐘意食馬蹄，覺得佢好鞋，所以我轉佐加入蓮藕，同樣有爽脆的口感，而且蒸煮之后的蓮藕另有糯糯滑滑既香感，同外邊既糯米較之馬蹄更加配合。

同埋為佐口感上邊更加滑，蓮藕我做佐二種處理，一部份磨成蓉 ，另一部份切成粒粒。

所有整肉丸既材料如下：免治豬肉+糖+生粉+生抽+胡椒粉+香油+蔥

糯米的處理：1，黑糯米較硬身，所以需要提前一晚浸定

2，白糯米只需要提前二三個鐘開始浸就可以啦。

最后的做法：

將肉既所有材料撈埋，攪到起膠，再造型成圓，跟住係浸好的糯米度均勻的撈一撈，等肉丸完全被糯米包住為佳。

最后上蒸龍猛火蒸十五分鐘到即可~~

比之街外，更勝一籌~

跟住再用多四分一的蓮藕，同剩低既豬肉，又係用免治豬肉+糖+生粉+生抽+胡椒粉+香油+蔥+大粒D既蓮藕撈勻，造成一個大餅狀，煎香

強哥對於香口O野當然的贊不絕口~~

 

剩低既一舊仔蓮藕，用薑蔥爆香個鑊之后再炒香D南乳，加少少糖炒好一個南乳汁，跟住將蓮藕片放落去繼續炒熟入味，簡單又好送飯~~

 

所有材料加加埋埋都只不過二十蚊有找，係通脹咁離譜既年代，唯有用心思補貼下日見干扁的荷包啦~~

 

 

勁好扯飯---豉椒涼瓜排骨煲+梅菜炒年糕

強哥好鐘意食罐頭食品，雖然明知食多無宜，不過偶爾都係整番少少俾佢過下癮。

尋日買佐一罐佢最鍾意既果個排骨罐頭，用苦瓜來燜。

材料：涼瓜一條切片、豆豉蒜蓉，薑蓉，一碗仔（蒜蓉可以多D會香D）罐頭排骨一罐

 

作法：1，熱鑊落蒜蓉豆豉薑蓉爆出香味

2，涼瓜放落去炒軟，落少少鹽調味

3，將成罐排骨倒落去，因為罐頭入邊好多肉汁，加埋涼瓜本身會出水，所以煮依味送，全程唔使落水。

略略燜五六分鐘，調一碗仔生粉水，最后倒入生粉水收收汁，同埋可以令到涼瓜更滑，睇落靚D，起鍋之前加少少糖較味。

跟住轉到瓦煲仔度，開火再燜多三四分鐘或者更耐，咁依個涼瓜煲就好入味，好腍啦~

買佐一包日本年糕好耐都唔記得食，好彩有效期有排未到，尋日睇到，就早D整黎食啦，費事再遲D又唔記得啦~

材料：屋企有D梅菜，剁碎佐加落去做為主味，再配搭少少香菇同青椒做陪襯。

做法：1，年糕用熱水浸軟，或者用滾水慢火烚一烚都得，軟佐既年糕撈少少油等佢炒既時候唔會痴埋一舊。

2，熱鑊爆香蒜蓉，跟住倒晒全部配菜落去炒香，因為梅菜我浸佐大半個鐘，咸味都出佐好多，所以炒既時候落少少蠔油落去調個味，最后加少少水，將年糕倒落去炒勻個味，起鑊之前落少少麻油落去，搞掂~~

極好味既一味齋~~

全家福~~

開飯既時候，強哥一揭開個煲蓋，即時流晒口水咁話：「正啊，好香啊，老婆有無煮多一杯米俾我」

呵。。。因為落佐足夠多既豆豉同蒜蓉，同埋個罐頭排骨本身有五香八角味，所以加加埋埋整出黎，依味送的確好惹味`~

 

焗一焗之后既涼瓜又出佐D水，唔緊要，愛黎撈飯，「一極棒！」

 

 

依二日既住家菜

早二日蒸魚食，蒸魚一D都唔麻煩，只不過最后淋滾油O既步驟總是令人心驚，而且D油又會彈到周圍到係，所以一般倒滾油既時候，我都會將D魚擺落個洗碗槽果度。

咁樣清潔起上黎都簡單D~

蔥我係用叉叉係咁易界幾下，就自然變成佐一朵好靚既蔥花啦~

依條黑立有足一斤重，幾大條嫁，所以上火之后蒸佐十分鐘，再焗多一分，時間剛剛好。。。好滑好嫩~~

屋企有一包薯仔，細細粒果D，擺佐好耐，再唔食就會壞啦。

想食孜然既味道，所以用佐以下方法黎整：

1，薯仔入水烚五分鐘度

2，去皮切粒，撈D豉油、糖、鹽、孜然粉辣椒粉

3，最后入焗爐二百度火焗十分鐘

焗后之后再落多一次孜然粉同辣椒粉，睇下，焗得幾靚~~

果晚基本係無油煙煮食~~簡簡單單~

尋日買佐一個哈蜜瓜，一切開黎睇，嘩，個皮厚過乜咁~~

好彩個肉甜就幾甜~

D肉切好擺落雪櫃做飯后生果，剩底D瓜肉試食佐下，雖然無咁靚，不過都幾甜WO~~

索性切佐出黎，同一舊豬肉黎炒。

原來都可以好好味~

買佐一個好超大既薯仔，切薄片之后再切成絲，一個薯仔整好之后都有滿滿一盤，好有成就感咧~~

用陳醋炒佐一碟「醋溜土豆絲」，加佐D花椒粉落去，自己整可以整酸D，好好味~~自己都好滿意~~

係咁多~