南瓜、玫瑰、饅頭、包子

送你一朵花，一朵玫瑰花，一朵可以食得嘅玫瑰花，一朵南瓜做成可以食得嘅玫瑰花。

靚，美味，純天然，無添加。



金色的美麗，絕非添加劑所造。

好簡單，來自金燦燦的南瓜所為。

煮飯的時間，順手蒸埋一舊仔的南瓜。

又綿又香又清甜。

好綿的南瓜，輕輕壓幾下就已經融開，加入麵粉，麵粉嘅份量我都唔知道，因為要視乎南瓜嘅份量同含水量去決定，所以一邊落麵粉，一邊搓，搓到干身成一團為止。

乾依士更加係好隨意地份量，一細細細茶匙的份量，感覺上足夠就得啦。

南瓜本身含水量極高，所以無需額外俾水，而且所需嘅南瓜份量好少，一個手掌大細的南瓜已足夠整一籠嘅包包。


搓好的麵團，放於稍暖嘅爐頭上發酵一個至二個鐘時間。

搓好麵團，落街飲杯啡，上返嚟嘅時候，已經發得好靚啦。 。。。

發好的麵團，開始整包。

整包的方式過往講過，就唔多講。

依次，主要教大家，整朵玫瑰花。

切五粒細粒嘅麵團，好細粒就得啦，下圖右邊嘅大份麵團，係正常整個包嘅份量，而整玫瑰花，所用份量明顯少好多。

將五粒麵團，搓成餃子皮咁大細一塊。

搓好的皮，灑少少乾粉喺面。

然後一層層疊上去。又唔係完全重疊，如下圖所示，要留返少少位。

然後取一條筷子，係中間位，壓出一條痕。

另取一條麵團，搓成長條形，做花芯。

花芯擺係最底嘅位置。

然後從花芯開始，向上卷起。

麵團嘅彈性與柔軟性，可以好輕易卷起而不會散開。

然後用刀，從中間切開成兩塊。

依個時候，玫瑰花的雛形已開始顯現。

用手稍稍幫忙，向外輕輕將花朵拉開，咁樣就整好玫瑰花的造型了。

其實主要都係整肉包，鮮肉大包，南瓜鮮肉大包。

整做一盒仔餡，香蔥肉餡。

做法就不多講啦，實在好平常。

話咁易，就整好一籠。

蒸個十分鐘，又靚又鬆軟地大包就整好了。

小朋友對於如此美麗的玫瑰花南瓜饅頭，一定毫無抗拒的能力，整俾家中小朋友，又健康又美味，各位媽咪，開工喇~~~

我就整俾我強哥，送朵食得嘅花，鐘意嘛~~~