星期三晚餐

今年好似未買過肉芥菜嚟食，終於今日喺街市撞到，即刻買嚟整返味臘味芥菜煲。

好易整，薑同蒜及臘腸，落鑊爆出香味。




落芥菜同炒，俾少少鹽同菇精調味。

略略炒幾下，主要目的係炒均味道，炒好味道之後，倒入砂煲仔。

擺上爐頭燒焗二三分鐘，上檯，食得~~~

甘甘哋嘅芥菜，煲得又淋又入味，總要係吸收佐臘味嘅甘香，真係好好食~~~

另外炒多碟餸。
係尋晚食凈嘅燒鴨，起骨切絲，估唔到都有幾多下~~

少少洋蔥切絲，先落鑊，同鴨絲炒出香味，俾少少老抽上色，增加香味，然後鏟起。

原鑊落韭黃，猛火炒幾下，落少少鹽調味，最後倒入洋蔥鴨絲，兜一兜，盛起。

好惹味嘅一碟餸。可惜個爐唔夠猛火，炒得唔夠干身，如果夠火候，唔會標啲水出嚟的話，依碟餸總要好味~~

開飯~~