星期七晚餐

買了幾塊梅香咸魚。

新鮮得不得了，香濃得不得了，喜歡極了梅香的味道，小時候媽媽切上一小塊的梅香，用來蒸點肉片，再炒個青菜，那樣的一餐飯，已經滿足得無以言表。

長大後知道這類醃制食物不宜多吃，因此吃的機會已經少之又少，這日偶爾遇見雜貨店老板正在分解梅香魚，在遠遠的地方，就被味道吸引，一路來到咸魚面前，忍不住買了幾塊回來。

買回家的咸魚，一時半會又不會弄來吃，怎麼保存最適宜？

可以像我一樣，找個玻璃容器，把咸魚放進去，然後直接倒入平時煮菜的油，浸過咸魚表面即可，簡單之極。

我用的是花生油，油浸著咸魚，即能保持咸魚的香味，亦能保持咸魚的「鮮度」，並且油浸得越長時間，咸魚越是好吃，最主要，這樣浸在油里的咸魚，完全不用擔心會有味道在家中周圍跑。

見有時間，就炒做一個菜脯，平時碌個面，煮個米粉，落少少菜脯配食，就非常一流啦~~

亂咁嚟，煲佐啖湯飲。

螺肉，花膠，圓肉，札子，花生，蓮子，百合，淮山，黨參，花旗參，同埋一個新鮮雞架。

新鮮雞架都係二十幾蚊個，兩公婆煲啖湯，其實已足夠，好抵食。

用快速煲嚟煲湯，其實只要做法得宜，一樣可以煲得好濃好出味。

先用中細火煲20分.唔揭蓋，焗住幾個鐘，晚上飲之前開火煲多20分鐘，湯已經可以極之出味。

煲好嘅湯，好濃好濃，幾乎無落鹽，就咁飲，已經好滑，好好飲~~

花花菜我幾鐘意食，不過都唔係識得好多種煮法，食過最好味係蕃茄煮花花菜，咁今日見得閒，又試搞新意。

花花菜先用水烚熟。

反正烚開囉，咪順手，烚埋啲荷豆佢囉。

烚好荷豆，倒走啲水，原鑊落醃好味嘅肉片，煎大半熟。

倒入荷豆，加埋少少清水，等肉同荷豆嘅味融合，最後俾少少芡水兜幾下，等依味餸睇落有光澤哋，食落滑哋，搞掂~~

三幾下功夫搞掂依味餸，好好送飯。

煮好荷豆，洗一洗個鑊，煮花花菜。

倒入切好粒嘅辣辣腸仔，用少少油爆一爆，然後，準備一罐方便白汁。

白汁倒入鑊，落少少清水煮開個醬，因為本身已經有咸味，所以無需額外俾味，我落多少少黑椒，等味道更加豐富，加埋辣腸走出嚟嘅辣油，個白汁香滑得嚟，帶少少辣意，真係好掂。

如果唔落辣腸，我相信轉成落煙肉，一定總要香，煙肉嘅味道同白汁好格，可惜屋企無煙肉，我先轉成辣腸嘅，下次試下用煙肉，肯定效果總要正。

最後倒入煮好嘅花花菜，炒均個白汁都掛住係花菜度，咁就搞掂~~

好滑好香啊，配埋花花菜本身嘅清甜，真係好掂啊咁樣整，有興趣不妨試下~~

全家福~~