食豆腐-麵豉豆腐湯、家常肉絲燜豆腐

我其實真係幾鐘意食豆腐㗎。點樣煮都鐘意。

前日買佐啲豆腐，整佐一個湯一味餸。

買比較靚嘅豆腐，豆味濃鬱，口感一流~~

全部買水豆腐，用最簡單嘅方式去煮。

韓國麵豉滾豆腐湯。

加埋正宗嘅潮州手打純牛丸。

好香好彈牙~~

其實好簡單煮㗎，煲好水，加麵豉，落豆腐同牛丸，熄火後落大扎荽莤~~~

搞掂啦~~

 

又簡單又好味嘅滾湯~~

 

如果係超市買嘅盒裝豆腐，而且係水豆腐，係絕對無可能煎得到成型，未落鑊已經爛到變成水咁嘅款，見到就唔開胃。

睇下，我買嘅水豆腐，就咁煎都唔會碎得太離譜~~~

 

用佐少少香菇做料頭，唔同日本果啲厚身嘅，依啲香菇係國內出品，好薄身，好易浸發，味道非常之濃郁，如果做為配料用，我多數會買依類香菇，愛嚟炒肉絲炒大白菜，都好惹味㗎。

我係用廣西出嘅野生香菇，托朋友買返嚟送俾我嘅，香港無得買，下次用完，要等好耐先至買得到啦。

所用料頭有：「香菇適量、肉片醃好味、薑片、味汁（蠔油生粉糖豉油水）」

做法：

1，先落油爆香薑，再倒入香菇炒出味道。

 

2、倒入肉片炒至五成熟。

 

3，倒入炸好嘅豆腐，倒入味水略燜至收汁即可~~

熄火後倒入少少荽莤吊味，無買到小水芹，如果唔係，加埋入去，味道總正啊~~~

 

炸過再燜嘅豆腐好易入味，食落口，豆腐真係好出色好精彩~~~

簡單一湯一餸，一晚餐~~