輕生是否唯一的選擇

一早聽新聞，又有青少年選擇自我了結生命的事件發生。

再次提醒自己，它日若為人母，一定要同小朋友做多啲心理溝通，自細要培養小朋友樂觀地天性，我認為，其實性格真係可以由細慢慢經過引導而養成㗎。

我好清楚地記得，自己都經歷過因為未夠成熟嘅社會應對心理而產生的種種情緒問題，一啲依家再睇返，真係微到不能再微的小小事情，但係當期時自己心目中覺得佢係大到真係覺得承受唔到嘅壓力，但又真係完全唔知道自己應該點樣去面對。

係啊，無話解決，連面對，都覺得無能為力。

不過基本上我都係一個頗為樂觀的小朋友嚟㗎，所以成日自我催眠，話俾自己知，「任何事情都會有過去嘅時候，我要做嘅就係慢慢等件事自己好返」

好好彩，我有一對非常之開明嘅父母，佢啲唔會要求我如何地出人頭地，名成利成，除佐要求我啲做人唔可以做社會所不容嘅事情之外，基本上無太多要求俾我，所以我有一個非常健康同快樂嘅成長過程，亦都影響到依家嘅我，總能夠用正面嘅態度去面對自己嘅問題，因此大多數時間，都感覺快樂。

亦都係自己成熟之後，發現做人真係需要做一個有「自我」的人，先至可以成為一個快樂的人。真係無需太過著重它人的眼光同心態，照顧好自己嘅心情最緊要，如果一件事，我做佐，但係我會覺得唔舒服同無咁心甘情願的話，我一定會係事情發生之前，先行拒絕。

所以如果問我，細個時同依家相較，有咩係最大嘅轉變，我會話「我依家學識佐理直氣壯地拒絕」

不過我會提醒返我小朋友，「自我」過度，會變成「自私」，所以首先要成為一個「善良」的人，先至有資格，放任自己的「自我」。

一個有「自我」的人，係會更加愛惜自己同身邊的人，在好多事情的選擇之上，一定可以做出更明智的決擇。