家常小菜---甜酸蘿蔔餅（食譜）、豆苗蘿蔔湯

上個星期同老爺奶奶去一間客家酒樓食飯，餐前嘅蘿蔔酸奶奶食到好滋味咁，見佢咁鐘意食，提早整佐一樽返去俾佢，星期六返去奶奶度食飯帶返去。

 

凈係整佐半隻蘿蔔，凈返半隻，係網友處得到靈感，愛嚟整返個「蘿蔔餅」出嚟。

一半刨絲，另一半切條狀。

 

刨好嘅蘿蔔用少少鹽渣渣水，出佐好多水啊，不要浪費，愛嚟滾個湯都好啊。

 

加水，加肉碎，雪櫃凈有一個濃湯寶，加埋。

 

凈有少少豆苗，落埋。

 

有豆腐，落少少。

滾湯依樣好，有乜落乜，無話唔得。

求其有啖湯水飲~~

 

蘿蔔餅做法：

材料：「蘿蔔絲、面粉兩湯匙、醃過味肉碎、蛋白一隻、胡椒粉、荽莤沫」

（蘿蔔絲先用鹽拉過，出佐水，咁煎嘅時候無咁多水出，肉碎先用豉油糖麻油胡椒粉醃過，面粉係令餅定型，蛋白會凝固得更好。）

做法：

1，所有材料撈勻，擺入雪櫃雪十幾二十分鐘，等雪櫃縮一縮水，成個材料定型更好。

 

2，然後用油煎至兩面金黃至熟。

 

3，用「茄汁、喼汁、白醋、少少少少砂糖、荽莤沫、水」

整返個薄芡，淋係煎好嘅蘿蔔餅之上。

一味甜甜酸酸，香香脆脆嘅甜酸蘿蔔餅，就整好了。

三幾下，同我清曬~~

 

話說強哥返到屋企，走入廚房陪我閒聊幾句，一眼望到碟上邊嘅蘿蔔餅，即刻好奇問「牛肉餅？」

我指指邊上的蘿蔔酸「佢整嘅」

無話有加佐肉碎，強哥驚奇到睜大眼「蘿蔔可以整到咁肉嘅」

即刻試食佐一個，然後默默地話我知：「細個時樓下有一個嬸嬸，一個細細油鑊，一個漏勺，專整炸蘿蔔餅賣，已經好多好多年未食過依個味道，今晚依個蘿蔔餅，味道好似，好似~~~」

 

 

買佐盒豆腐，本嚟係想整麻婆豆腐，不過見開佐鑊煎蘿蔔餅，順手又煎埋個豆腐，加埋少少肉碎，用蠔油俾味，加少少水燜至入味，惹味嘅一碟餸就整好了。。。。

不過加七加八之後，變成好大一碟，搞到一餐都食唔晒。

全家福~