強哥今日約佐個木工師傅去睇D嘢，晨早九點鐘就要出門口，變到我又要提早起身整早餐俾佢，順便感受下日全蝕嘅威力。
無乜特別感覺，唔知係天陰嘅關係定係日偏蝕嘅緣故，係九點幾鐘嘅時候，係有少少陰陰哋，不過唔及內地江蘇上海果邊咁震懾人心地日全蝕。
睇電視新聞轉播，上海成個城市真係黑曬，可以想像得到身處其中嘅人，必定係感覺好強烈，大自然始終係強大與不可測的。
九點鐘老公出佐門，我又瞓唔著羅，見個天又好熱好焗，唔知係乜嘢俾到我一個聯想，係要整饅頭咧。。。。而且係黑糖饅頭。
可能係因為天熱饅頭好易發酵掛。
----------------------------------------------------
黑糖有自己一种獨特的焦香味，與清甜嘅白糖有好大區別，我屋企成日都會備有一包係度，煮餸整點心都經常用得著。
今日整饅頭，棄用以往習慣嘅白糖，改用黑糖。
睇下我整包嘅材料。
中筋面粉二碗，黑糖三大匙，油一湯匙，乾酵母一湯匙用暖水開佐佢。（如果整普通中式包包，將黑糖轉用白砂糖即可）
做法：
1，將所有材料混合埋一起，然后倒鮮奶去慢慢將面粉搞濕。（唔用鮮奶，直接用清水一樣無問題）
唔好一次落太多奶，因為太濕就搓唔到面團了，要少少咁落，邊落邊搓。
其實唔落奶，就咁用清水都絕無問題。
同埋整包之前，我會先用少少暖水，開佐乾酵母，再落少少糖，因為酵母鐘意甜味，一有少少糖，可以加速佢嘅生成速度，咁用暖水開佐嘅乾酵母，等待五分鐘左右，如果加佐暖水嘅乾酵母有變大發起，咁就可以加入面粉度，證明酵母已活轉過嚟，可以整包包啦。
如果酵母加佐暖水都無變化，極有可能係乾酵母已失效，咁就唔洗再整包啦，整佐都發唔起嘅。
2，將所有面粉同水揉合一起之後，再搓到光滑地一個面團。
有一種說法，叫搓到「三光」，所謂三光，即係面盤光，面團光，手光。
睇下，我搓好面團之后，個面盤都好乾淨㗎啦，個面團亦都光滑佐，手都無痴到乜面粉，咁就是謂三光啦。。。
3，搓好嘅面粉擺入鑊里邊發酵，因為天氣好熱，面團好易發酵完成，發面唔好發得太耐，睇到發大佐就差唔多啦，因為如果發酵過度，就會有酸味㗎啦，有酸味就唔好食啦。
我由搓好面團到擺入鑊度，一共發酵佐「二十分鐘」，係啊，二十分鐘咋，四個字，唔好發得太耐，見到佢發起就得啦。
4，然後準備好一個蒸盤，擦好一層油係上邊防痴，一細碟仔面粉做手粉，搓面嘅時候先至唔會俾個面團痴係針板度。
可以開始「強嫂整包啦」
5，將發佐酵嘅面團大力再壓扁，搓一搓，然后用面杖搓成一大塊，卷起，再繼續搓成一大塊，如此重複大約三四次度，咁做嘅作用係俾個面團更光滑，而且咁樣折來折去嘅面團，蒸好之后嘅饅頭內部結構會有層次感㗎。
6，最後將麵團再卷成一個長條之后，用刀切成一舊舊。
然後掃一層油係個包包面度，擺上蒸架。（其實後嚟我都無擦油係面，都一樣無問題）
7，依個時候，要進行第二次發酵啦。依次發酵時間可以稍長少少，發酵二十至二十五分鐘左右。
我將佢又係放入鑊里邊發酵，而且煲暖佐D水，咁樣可以加速發酵嘅時間同效果。
8，第二次發酵二十五分鐘，之後將水煲滾，再擺饅頭入鑊里蒸十五分鐘。
熄佐火之后，唔好咁快揭蓋，由得佢焗住大約十分鐘，再開個蓋
睇下，個饅頭一個個，發得幾靚。。。。
用手剖開半邊睇下，發得真係好靚好有層次㗎，依家天時咁熱，整包整饅頭係最容易㗎啦。。。
整饅頭真係容易過整包好多好多。而且食法多樣化，將佢代替面包做早餐，肯定營養同健康好多，因為無乜油無乜添加劑嘛。。。
趁熱快D整返件俾自己食住先。。。。
我就至鐘意饅頭配芝士咁食啦。。。。
芝士嘅奶香同面筋嘅清香配埋一起，彼此之間最清新嘅一面都會剎那間係口腔入邊二合為一，成為最美妙地一種香味慢慢由喉頭向四肢百骸散開去。。。
加埋黑糖淡淡地焦香味，精彩又再添多佐三分。。。。
聽日早上再蒸返熱佢哋，老公至愛用佢擦上牛油花生醬練奶，同樣精彩無倫。。。。
額外醒多一件，屎一砣。。。。。。。。。。。。。。
哈哈哈哈。。。。
