糖水大聯盟---蕃薯湯圓、黑糯米椰汁糖水、喳咋

終於都有少少天涼，香港的冬天越來越短，相信無需好耐時間，下下下一代的子孫，已經無辦法係香港感受到冬天的感覺。

有時食物真係好需要配合埋當期時的環境與溫度去進食先至會與食物產生共鳴與輝映的效果，好像打邊爐，當然絕對可以係三伏天時開行個冷氣黎打，但點樣都唔及得真係天寒地凍之時一家人座埋一起「碌下碌下」咁溫馨，今日將之前整過的幾款糖水擺上黎，依幾款糖水冷冷天時趁熱飲落肚，真係會令人感覺好滿足~~

蕃薯糖水依种平價糖水，我覺得真係首選。

材料：蕃薯、片糖、薑

薑有驅寒功效，我自細就好鐘意薑果種獨特的辛辣香味，平日如果有少少傷風，都會煲一大煲薑糖水訓之前飲上一大碗，第二天保證整個人神清氣爽。

煮薑糖水至簡單不過，加水加薑滾約二十幾三十分鐘，待薑味融於水中之後加入片糖攪拌化開即成~~

至於蕃薯，有D人鐘意同薑糖水一起煮熟，我鐘意較為清爽的感覺，所以通常都會另外煮熟蕃薯再加入糖水度進食，口感上更為分明與配搭。。。。

於於食物我的想像力總是源源不斷，所以是日對於蕃薯糖水，又豈止於簡單的蕃薯加糖水？

平日食湯圓的不二選擇當然是以薑糖水為底，所以這次將番薯加入糯米粉中加水捏成蕃薯湯圓。

將蕃薯壓成蓉之后加水加糯米粉，搓成面團，靜置十分鐘度待其醒面。

然后就可以搓成一粒粒的小小湯圓，睇下大圖，為佐食到蕃薯的口感，特意沒有壓得太蓉的番薯，在湯圓里清楚可見，即可看到亦可食到蕃薯的味道，是謂「蕃薯湯圓」

湯圓不宜久煮，入鍋煮開水后放入湯圓粒，待其浮起即可撈起

蕃薯粒、蕃薯湯圓、薑糖水。

咁樣的搭配，誰能拒絕~~

請你食一粒啦~~

香香軟軟糯糯的感覺~~

另外一味糖水係東南亞人比較常煲的糖水，黑糯米椰漿糖水。

材料「黑糯米、新鮮斑斕葉、片糖」

如果屋企有高速煲，可以所有材料加清水擺落去煲半個鐘度即可，如果沒高速煲，因為黑糯米比較難煮，需提早浸水五六個鐘再煲就比較容易煲腍，食之前加少少椰漿，配住黑糯米獨有的香味，一流。 。。

 

 

喳咋，基本上屋企有乜豆就擺乜落去。

我就用佐「綠豆、紅豆、紅腰豆、洋意仁、三角豆、花生」

一起用高速煲煲佐接近一個鐘~~

所有紅豆與綠豆均融成沙狀，食之前加埋椰浆，食落真係香到無得頂。。。

 

 

 

家常晚餐----豆豉鯪魚焗金瓜、雪耳椰子燉雞湯

最近南瓜充斥了整個街市，每隔幾間就可以見到南瓜的蹤跡，理所當然，強嫂都買佐番來。因為體形太過巨大，強嫂只是買佐半邊回來，不曾想，就是這區區五個幾的半邊南瓜，食了二餐，還剩下一舊仔。真係抵食之極~~

剩下小小的一舊南瓜，切件來炒好似少佐D，同飯一起煲熟當南瓜飯前晚又才試過，想到還有一罐買番黎好耐沒食的豆豉鯪魚有待解決，於是又搞搞新意，將二者搭配，煮做一碟~

1，先將南瓜切成薄片。（如果落鑊煮的話，南瓜好容易就散開變蓉，所以我打算用焗爐烤熟的方式來加工，用焗爐的話切成薄片易於熟透）

2，然後一罐豆豉鯪魚，將少少的油與豆豉同南瓜片拌勻味道，然後擺係碟裏。

3，因為我個焗爐子只得上火，為佐焗出黎的效果更好，我就將南瓜先蓋上一層錫紙，唔俾南瓜的表面過早焦黃

4，然後就入焗爐，二百五十度火，焗二十分鐘。

5，待南瓜焗熟之後，再將剩余的罐頭鯪魚鋪在碟面，入焗爐再開火烤一分鐘左右加熱即可`~~

因為是用熱力將南瓜焗熟，所以南瓜唔會似加水煮既咁綿綿唔成形，食起上來片片分明之余，南瓜獨有的清甜吸收了豆豉的鹹香味，整體的口感香甜兼且惹味之極~~~

 

另外用蒜蓉炒佐一個菜心~~

尋晚就係咁簡單啦。。。。

電腦度存有一個之前整過既椰子煲雞湯，順便擺埋上黎啦。

通常如果係就咁食椰肉，我會揀嫩D既椰子，如果要煲湯，就一定要老些少果D啦，因為椰子肉係越老越香~~

一般點樣區分椰子的熟嫩呢？答案係“用手搖”

1，嫩椰子---因為新鮮水嫩，所以裏面的水份充足，沒有太多的空間，所以搖晃的時候感覺到係好充實無過多的水晃動的聲音，咁樣的嫩椰水多且肉嫩，椰肉適宜刮落黎來食。

2，老椰子---因為沒咁嫩，裏面的水份相對少D，於是裏面的空間較多，所以搖起來的時候可以聽到比較清楚的水晃動的聲音。咁樣的椰子水較少，肉較硬，不適宜吃椰肉，但較香，可以用來煲湯。

上次買了幾個椰子，本來係要刮椰肉出來食的，但是突然想到椰肉煲雞湯，所以就央媽媽幫我開椰子取肉。

娘親自細食慣椰子，好熟手咁，用個大菜刀背敲二敲個椰殼，就打裂一條紋，跟住用刀尖整開大D條裂紋，將水倒出黎。。。

D椰子水好清甜架~~

睇下，個椰子好嫩架，用匙梗就可以刮到D肉出黎啦~

煲椰子湯，最緊要係突出椰子味，所以除佐雞（我又買佐平靚正的雞殼黎整啦），另外加佐D輕味的食材：「雪耳、甘筍、紅棗」

係咁簡單啦`~

快速煲一個鐘，乜味都出晒黎啦`~~

正到閉~~

 

 

 

繼續家常---鹵水豬肚、白斬雞、新鮮淮山排骨湯

阿娘黎我度食飯，整佐幾味阿娘鐘意食D野俾佢食，自細都係阿娘整俾我食，依家自己識得整羅，就梗係要係阿娘面前「威威」啦~~

整佐一隻白斬雞，因為屋企個個好細食，所以凈係斬佐一半黎食。

買清遠走地雞整白斬雞，肉質靚D食落雞味都濃D架~~

另一半第二日再用薑蔥鼓油爆香，都好好味架~~

因為時間幾迫，所以過程都無影抵，不過整鹵水豬肚的圖片之前都有寫過，有興趣可以搵番~~

依次買到依個豬肚好厚身，食落好好味啊。。。

 

另外買佐D芥蘭，烚熟之后淋D蠔油，同樣清甜惹味`~

 

整白斬雞之后凈抵D水好野黎架，食得無晒，買佐盒排骨，一截新鮮淮山，加少少甘筍，一D枸杞紅棗，當歸黨參咁，煲佐一煲湯，總有一對雞腳都加埋落去~~

帶有濃濃藥膳味既靚湯，正~~

覺得自己真係大個女啦，睇番自己整D送，幾有成就感架~~

 

家常晚餐之---魚香肉絲、甜酸通菜桿、紫菜肉絲湯

上一餐講佐通菜桿未煮，所以第二日，我就將通菜桿切成粒粒。

睇下材料圖先：

材料：豆豉、蒜頭、椒絲、通菜桿切粒

 

作法：先將豆豉蒜頭用油爆香，然後倒入通菜桿炒香，最後加點鹽，加點白醋，加點糖，喜歡辣的還可加點辣椒

酸酸甜甜，開胃~~

食之前叫強哥估係乜野黎，食佐半日佢都係估唔到，索性棄權，最後都系我話俾佢才知道，原來咁好食的東西係廢物再利用~~

因為雪櫃凈番好多送頭送尾，為佐清理，整佐一個唔知係四川定湖南既家常菜，都係酸酸辣辣咁架~~

材料真係屋企有乜就落乜就得啦~~

我就用佐：

1，木耳絲 2，紅蘿蔔絲 3，青椒絲 4，洋蔥絲 5，豆瓣醬 6，姜沫，蒜沫 7，蔥沫，加醬油陳醋糖澱粉

加佐肉絲，佐做一碟~~

惹味之極～～

不過依家Ｄ豬肉都係會食到有一陣「騷」味，好難形容，但係食落真係感覺唔舒服，所以依碟送，下次我會將肉絲轉成豆干或者其它齋菜，用同樣調味去炒，相信一定都會好好味～～

 

瘦肉買多佐，簡單地，用紫菜同瘦肉滾佐一個湯～～

係咁簡單一餐又搞掂～～

家常晚餐之---金瓜排骨煲+椒乳通菜

通菜真係好平，係街市四蚊就買到一大扎。

將D葉摘落黎，用椒絲腐乳炒做一碟惹味素菜~

咁時今日，真係慳得一蚊得一蚊，菜葉摘佐，凈底D菜梗好嫩好脆，咁都唔好晒佐佢啦，洗凈佢擺落雪櫃，聽日可以用到。

依家除佐通菜夠平，D南瓜總平啊。。買佐半邊南瓜，都係四個幾架咋，半邊都好大一份，再切開二邊，先用佐四分一南瓜，就足夠整一味送啦。

因為南瓜一煮就好易散，所以煮之前先用油煎一煎封個面。

跟住再倒入排骨，倒入生抽老抽糖炒上色。

最后加水加南瓜加少少鹽，燜至收汁~~

越簡單的調味往往越容易帶出食物的好味~~

睇下，就係簡簡單單既豉油糖，就搞掂一味好正好惹味的送啦~~