四餸一飯

發覺只要識得合理安排，收佐工返屋企煮餐飯，真係唔係想像中咁困難。

今晚收佐工返到屋企，先洗米煮落煲飯。

睇到飯煲出煙，即係開始上氣，咁就掉一條鵝潤腸，半條臘腸入去一起煮。

新鮮鵝潤腸真係好香好香，煮緊嘅時候都聞到果陳香味~~~連超唔鐘意食潤腸嘅我都吞哂口水。

其實果個碟係超細一個味碟咋，細細一碟，好趣致㗎~~

尋晚見雪櫃凈有少少一舊肉，咁就剁碎之後，搞好一細細碟仔嘅梅蒸肉餅，包好擺係雪櫃，今晚煮飯嘅時候，從雪櫃拎出嚟，順手擺埋入飯煲嘅果個蒸籠度，煮飯嘅時候一起蒸熟佢，全不費功夫~~

其實係超細一碟肉餅咋，得手掌咁大大~~

買佐盒蛋，擺入蛋格嘅時候，唔小心整爛一個蛋，咁就索性用果個蛋，蒸一個水蛋。

又係細細一碗仔咋，飯煮好之前五分鐘擺埋入去飯煲個蒸籠度，因為肉餅同依個水蛋都係超細，所以兩碟都可以擺埋一齊。

又係完全不費功夫嘅一個小食~~



超滑嫩㗎水蛋~~

再用少少臘腸，同芥蘭炒碟菜食。

炒芥蘭無乜技巧，最重要係用薑去炒碟餸，除佐落鹽，總要落少少糖，可以去除芥蘭的澀味，起鑊之前，沿鑊邊淋少少白酒，兜幾下起得鑊~~

炒嘅時候，係廳嘅強哥都忍唔住走入嚟話「好香啊」~~

 

一樣一啲啲，全程需時都只不過七八個字，開得飯~~

幾簡單~~

蠔油煮餸

上個月俾公司安排去參加工展會個Party，玩佐成個月咁滯。

真係幾好玩㗎，見足各式人等，幾開心~~

期間真係識見識到內地師奶「到香港打豉油」的傳說，打豉油即係買豉油咁解，豉油500ML一支幾重拎過嘅人都知㗎啦，班內地師奶真係可以一買十幾支咁搬返上去㗎，真係見到都辛苦，好重㗎嘛~~

內地豉油質素無保證，唯有過嚟買香港本地製造嘅豉油，較有信心食用咁話喎~~

無論係香港定內地嘅師奶，咁辛苦，為嘅咪又係屋企人，真係可憐天下師奶心~~~

~~~~~~~~~~~~~~~~~~~~~~~~~~~~~~~~~~~~~~~~~~~

平時收工返到屋企都六點幾啦，無辦法，成日要係出邊食完飯先返嚟屋企，但真係食出邊嘅嘢食到悶到嘔，寧可屋企清清哋，炒個菜都覺得好好味，所以食佐幾個月嘅街外飯，都係要收拾心情，諗下點樣安排收工之後嘅晚餐先得啦。


換佐一個飯煲，二百幾蚊，煮飯超快，半個鐘就可以煮好煲飯，以前果個貴價飯煲，煮餐飯要成個鐘，總要煮出嚟嘅飯無咁彈性，勁搞笑，換佐個平嘢，同樣嘅米，煮出嚟嘅飯，竟然又夠煙韌又有飯香味，超滿意~~

所以今日返到屋企，先煮落煲飯，然後洗菜摘菜，由落米煮飯到上台食飯，半個鐘鬆啲就食得，幾開心啊~~~

今晚整佐兩味簡單嘅住家餸。

奶奶整佐鮫肉塊俾我，咁就愛嚟同菜心炒埋一碟。

魚塊本身有鮮味，菜心有青菜獨有嘅清香，為佐令兩者更好地結合埋，只需要係出鑊之前，淋上一細匙嘅蠔油俾味，兜一兜勻即可裝碟，完全無需再額外俾鹽，蠔油本身已有咸香味~~

係極之簡單的一味住家餸，只不過落佐少少靚嘅蠔油，即刻令到成味餸菜變得精彩好多~~

極扯飯~~

提早浸定幾粒香菇，幾粒墨魚丸，與甘筍切絲之後炒埋一碟，同樣地，起鑊之前淋少少蠔油調下味就搞掂~~

雖然兩款餸用嘅都係同一款調味，不過菜系本身具有唔同嘅味道，所以炒好之後成碟嘅餸，完全唔會俾蠔油搶走味道，只會因為蠔油而帶出本身的香味，因此都不需要擔心兩味餸菜會有相似的味道。

道理就同人類擦香水一樣，同一款香水，唔同嘅人擦，配以唔同嘅體味，就會產生不一樣的味道出嚟，煮餸嘅調味料都係一樣嘅道理，唔同嘅食物主體，配以相同的調味品，也會產生完全不同的味道出嚟。

就好似依味甘筍絲，落佐香菇絲同無落香菇絲，落佐蠔油同無落蠔油，就會產生完全不同的味道出嚟，所以炒甘筍絲，我一定會切幾塊香菇入去，而且最後一定要俾少少蠔油，咁樣炒出嚟，每次都會有相近的味道，勁香~~~



用嘅係下圖果款蠔油，剛推出市場無耐，佢用佐比同系列產品更多五倍嘅蠔汁去熬，而且特別之處在於佢係用黑糖去調嘅甜味，相較用蔗糖或者其它嘅糖份，質感上會更為濃厚，甜而不膩，古時嘅人都鐘意用黑糖煮甜品俾女性，認為黑糖對女士身子大有益。

依款蠔油不但鮮味更濃，甜味更香，有機會見到，不妨買支嚟試下。

濃湯與寶

濃湯係阿媽專程嚟屋企煲俾我依個寶貝飲嘅湯，所以，係濃湯，與寶。

淮山豬骨濃湯。




阿媽最鐘意嘅雜雜炒，乜都落啲，咁就一大碟~~

阿媽係屋企煮佐好多，帶嚟俾我，可以食多幾餐嘅甜酸豬手，正到。。。。不得了~~~不得了啊~~~

我收工返到屋企，炒多個菜，熱返個豬手，咁就食得㗎啦~

真係怪哉，阿媽煲嘅湯點解永遠咁正嘅？

問阿媽點解啖湯可以煲得咁靚，阿媽就教我話，好似煲魚湯咁，排骨先用油煎一煎，然後用滾水衝走多餘嘅油份，然後凍水落淮山紅蘿卜，拍多舊薑入去，水大滾之後落排骨，中火煲一個鐘，夜晚我收工返嚟之前，再開返火煲多半個鐘，落少少鹽俾味，咁就搞掂啦。。。

多啲材料少啲水，咁啖湯就可以咁濃啦~~

簡單的一個晚餐，超好味~~

做冬

人生還有什麽事情能夠比得上在這樣冷冷的冬日裏與親愛的縮在暖暖的被窩裏狠狠地睡到實在睡不下去哩~~

 

和強哥由昨夜一點，直睡到今午一點，感覺真痛快！

 
 

尋晚回強哥娘家食飯。

當係提早做冬。

 

去片~~

 

奶奶煲嘅老火湯，花膠響螺湯。

用瓦鍋煲出來的湯水，真係唔同啲嘅，真㗎，絕對不是心理上的作用，同鐵煲煲出來的湯水，口感上確實有些許的若幹的大大的不同的差異`~~

相同的材料同時間，瓦煲煲出嚟嘅湯水，感覺上更為濃更滑~~

用雞湯浸佐一大碗嘅魚肚同白菜，鮮美到不得了~~

似乎成年無食過嘅發菜蠔豉豬手，正~~

.

蒸條魚嚟食~~~

魚肚嘅位置奶奶知我鐘意食，第一時間挾到我碗內，幾時都話，奶奶最好㗎啦~~

好肥啊條魚，食落口滿嘴魚脂的濃香，加埋又滑又嫩的魚肉，食起上嚟，無窮滿瀉的快感~

外賣燒腩仔一碟~~

白灼大中蝦~~

肥雞一碟~~

粉絲蒸鮮貝~~

最好味係底下嘅粉絲~~

雜菜炒蝦球~~

人齊食飯~~~

匯報

消失的這段時間，走去讀佐個課程，點知又俾我考到個牌返嚟，成班同學當中最無心嘅果一個竟然柳成蔭。

想試下每月有固定收入的感覺，寄佐兩封信出去，換佐份工返嚟。

大公司，福利好，強哥比我還歡喜。

最大的樂趣，在於數月之後，第一次將糧卡塞入櫃員機，看著屏幕積累的數字，得意的，微微地笑一笑，將卡繼續收返入銀包，思考一下，將自由換成若干數字的遊戲，值得玩多久。

而其中最具玩味的，莫過於雖然身處本地最具規劃的食品公司，但無人知道，我最習慣買的是對手公司的同類食品，最欣賞的也是對手公司的調料味道，自家品牌的醬料，反而是家中最少儲備。

噓......細聲啲,唔好俾公司同事聽到啦....

依個秘密,得你知,我知咋~~~