小菲菲俠自煮樂
圖片勝於文字，廢話少講，直接看圖說話。
上個星期嘅記錄，直到依家先記得擺上嚟
晏晝：切幾塊鹵肉、煎個蛋，碌個面
無菜~！
之前一日煮佐個芽菜湯，凈返嘅芽菜，多唔多，少唔少，好尷尬。
咁就加啲甘筍，一啲鹵肉，加加埋埋，又炒一碟~~
花花綠綠，俗不可耐，偏又清甜無比，耐人尋味！~~
上個星期天氣又差，門口都費事出，直接係樓下超市買兩盒菇菇。
愛嚟同牛油炒。
菇菇同牛油味道最搭，係煮菇菇嘅不二選擇。。。。
所以依味餸，材料好簡單「菇菇適量、李乜記蒜蓉、即磨黑椒碎、牛油一匙」
做法：
1、先將牛油落鑊融化，然後倒入菇菇，中火慢慢焗。
2、全程完全唔洗落水，菇菇自己本身會出水，乾煎三分鐘左右。
3、最後熄細火，倒入蒜蓉、黑椒碎、一小撮鹽俾味。
又簡單又好味~~
牛油徘徊於菇菇表面，食落一啲都唔覺肥膩，只覺甘香~~
滑滑嫩嫩嘅口感，實在不容錯過~~~
一碟飯，兩碟仔餸，晚餐就咁簡單~~~
生活中，好多賬單一早就改為電子賬單，到時到候上網查下賬單再找數，要睇返過往記錄又方便，一查成年嘅記錄都可以睇得到，不知幾方便，又環保，所以平時信箱，最多收到嘅，反而係一啲所謂「致住戶」嘅宣傳單張~~
電子郵件就成日會有垃圾郵件好煩，都可以拉佢到黑名單拒收，咁平時日常生活，果類垃圾信件，都咪話唔煩人，真係可以一個星期就可以多到幾十封厚厚一疊，但係屋苑閒雜人等係無可能入到嚟㗎嘛，原來啲垃圾信件，係郵局派送㗎，郵局收取一定嘅服務費用，然後就大量派發俾各區住戶，咁如果以後再唔想收取咁樣嘅垃圾信件，有無辦法？
係有㗎~~~
大家可以去到自己屋企附近嘅郵局領取下圖嘅Label紙，然後痴係自己嘅信箱面度，咁信差見到依張紙仔，就唔會再派啲垃圾信件入去你個信箱度㗎啦，如果大家都唔收取，啲公司就會印少啲，咁都環保啲啦`~~~
九月一號開始實行啦~~
~~~~~~~~~~~~~~~~~~~~~~~~~~~~~~~~~~~~~~~~~~~
每年得8、9月份有新鮮蓮蓬食，當然唔會錯過。
好多人可能未食過新鮮蓮蓬，其實佢脆卜卜，細嚼之下，有一種好清新嘅感覺~~
最愛是撕開蓮蓬露出粒粒飽滿新鮮的大粒蓮子，剎那的快感猶其興奮~~~
直接用牙連撕帶咬地剝去外層的翡色小衣~~
由中間部位輕咬一啖，整粒蓮子應聲斷開兩邊，舌尖輕輕缠上莲的芯，再稍俾啲力氣輕輕一扯，整個蓮芯輕松取出~~
將舌尖的蓮芯吐到杯度，好快就收集齊一小撮~~
沖上一杯仔的滾水，焗一焗佢，無耐，就變成佐一杯碧綠的茶水~~~
甘甘哋，清肺~~~
唔好話俾強哥知，依個蓮子上邊，沾了幾多本小姐的玉液瓊漿~~~
泡佐點雪耳，整佐點紅棗，總有杞子，浸埋少少百合~~
一煲煮，一個鐘左右~~
煲好後，俾少少冰糖~~~
飲嘅時候，問強哥“甜唔甜”
“甜到心”~~~
當然，嘴甜舌滑是我的強項，用嘴一粒粒剝的蓮子，點會唔甜啊~~~呵呵呵~~
飯後甜品，正~~~
有糖水飲，所以晚餐唔洗食得太多。
日日食飯好悶，所以尋晚炒個烏冬。
材料鐘意食乜就落乜。
簡單地炒埋一起，就係一個晚餐啦~~~
炒得好有鑊氣㗎~~~
好好味~~
有網友留言問我，買咩牌子易潔鑊較好。
咁如果要我講，點樣可以選到質量好，耐用的易潔鑊，比起牌子，更重要。
易潔鑊的塗層有質量好壞的區別，最簡單的判別方式，係用手去摸一摸鑊面，如果摸起來好光滑，鑊拎起來好輕身的話，咁表示個鑊係用佐較薄的材質去制作，並且個易潔鑊的塗層，都係較便宜的材料，咁樣的易潔鑊子，用最多幾個月就會有塗層脫落的現象。
我自己多數係用不銹鋼同埋生鐵鑊煮一日三餐，貪佢易打理，比較耐用，而且煮餸更好味，不過屋企點都會有返一二隻易潔鑊嚟看門口嘅。
咁我自己依幾年買易潔鑊的心得呢，選擇的時候，我會摸一摸個鑊面，如果表面摸落個感覺係會比較鞋，無咁滑，而個鑊拎起比較重，咁樣的鑊我覺得就係比較好的易潔鑊了。
因為表面粗糙，表示佢用佐較好質地嘅涂層材料，同埋塗層較厚，，使用的過程不容易脫落，使用的壽命都會耐啲，個鑊重，表示個鑊底制造得夠厚，厚的鑊雖然看似加熱的速度較慢，但係有一個好處，一但加熱足夠，佢嘅恒溫效果係最好的，唔似薄嘅鑊，加熱雖然快，但係散熱都一樣快，一熄火個鑊好快就凍返，而恒溫好的鑊，就算擺食物進去，都唔會即刻降溫，咁樣煮起食物，更得心應手呢。。。（特別係煎豬扒牛扒，厚底的鑊煎出來的效果勝於薄底嘅）
所以買易潔鑊，唔好貪便宜，平嘅使用的壽命好短，換多幾個，都相當於一個貴的價錢了，倒不如直接買個貴少少嘅，只要使用得當，可以用好多年呢。
另外要記得，易潔鑊一定唔好係個鑊總係好熱嘅時候就清洗，一定要攤凍佐再洗，咁樣塗層就無咁容易脫落了。（熱脹冷氣縮下塗層容易脫落）
不過都要提醒下，如果發現塗層有脫落現象，就無用啦，會揮發致癌物質㗎，所以易潔鑊，可以少用嘅時候，都係少用啲好。。。
依家市面總有好多可供選擇嘅唔痴底嘅鑊可選擇，好似納米技術嘅鑊，或者搪瓷面嘅鑊等等，就要睇各人需求去買啦~~
~~~~~~~~~~~~~~~~~~~~~~~~~~~~~~~~
繼續講返前一日，凈返嘅果塊發麵團，點樣處理？
擺入雪櫃一晚，第二日再拎返出嚟，會有少少酸味，所以落少少蘇打粉入去（蘇打粉係緘性，可以中和麵粉嘅酸味），再重新搓個麵團（如果即日整就唔洗咁麻煩）
不過我要節省早餐準備嘅時間，唯有提早整好一部份成品。
做法：
1、搓好嘅面團，壓成一塊薄嘅圓餅，再係室溫當中發酵十分鐘。
2、然後平底鑊落少少少少油，將薄餅坯放入去，兩面各煎30秒左右，其實都好快熟佐嘅，因為個餅底好薄。
因為二次壓扁佐個麵團，所以基本上個餅底就好薄，唔會發得好厚，不過因為係發麵底，所以薄得嚟，都總會有少少鬆軟嘅效果
3、煎好嘅薄餅底拎出嚟，擦一層奇妙醬。
因為係整早餐，速度要快，味道要好，所以我無額外再整咩蕃茄醬底，用佐成品嘅奇妙醬擦底，又快又簡單~~~
4、擦好醬底，係面隨個人鐘意落材料。
就手啲，雪櫃有咩就落咩，最緊要芝士俾多啲。。。我落佐幾層㗎~~奇妙醬好輕身嘅感覺，所以我配埋啲菠蘿粒，好搭~~
5、落好材料嘅薄餅，再擺返入平底鑊，落一湯匙水，蓋埋蓋，等水氣蒸發完，揭蓋再煎幾下，如果功夫夠，可以翻面煎一下，效果更好~~
幾個小步驟，十分鐘左右，一個靚靚早餐就搞掂~~
比起用焗爐整，時間同效果更好掌握~~~
所以話，煮食嘅工具只不過係輔助性質，只要明白佐食物嘅箇中原理，輔助工具係可以隨意變化唔受條件限制㗎~~~
烹調嘅好玩之處莫過於此，可以天馬行空去任你實踐~~
剛剛擺上檯，強哥就已經嘩一聲「好靚喎」，再拎一塊上手「好似樣喎」，再咬上一啖「好掂啊」~~~
俾個底睇下，好薄身㗎。。。。
最出色係個餅底，底脆得嚟，中間會帶有發麵嘅軟綿口感~~~
而且個底煎得脆卜卜，配埋香噴噴嘅芝士同酸咪咪好開胃嘅菠蘿，脆香軟綿，真係難怪強哥落Order「聽日繼續~~~」
見強哥咁鐘情依隻薄餅，我凈係食佐一塊，其餘老公包辦~~~
平底鑊整薄餅，真係話咁易~~~
地球的環境正以幾何速度在惡化，是不爭事實。
無力改變什麽，只能更珍惜與身邊人相處的每一秒。
某日午後，與強哥瞓響床上睇完一套災難片之後，雙手緊緊握在一起，久久沒有出聲。
然後強哥說：“如果果一刻真的無可避免，我希望能夠好似依家一樣，緊緊捉著你的手，一起面對”
對白好戲劇？
但確實是彼此真實的感受，也是真實的對白。
係要結婚後才真正知道，這樣真實的愛情，是很能給予彼此力量與勇氣的。
以前總是怯生生地面對生活中的一切，整日飄來飄去的思緒也不知為哪般，婚後突然地，心變得更踏實，人好似一下長大了，內心也好似總是充滿著力量，想著有著那麽愛著自己的另一半，還有什麽是自己不能面對的。
不覺不覺，已經五年幾時間了，不過每天都感覺似是新婚咁，聞也聞不夠的是他的味道，抱也抱不夠的，是他的軀體，愛也愛不夠的，是他的全部呢。。。。
結婚吧，真的好幸福！
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~`
同心愛的男人準備的快速早餐~~~
提早一晚，搓好一個發麵麵團（即係整麵包咁嘅麵團）
或者參考我以前寫過嘅做法「發麵麵團」
整好嘅麵團擺入雪櫃，等佢低溫發酵一晚。
準備個餡
買佐2斤幾嘅梅頭肉，鹵好擺係雪櫃慢慢食，鹵梅頭肉嘅作法超級簡單，做法可參考「鹵梅頭肉」
將鹵肉剁碎。
加埋啲鹵水汁入去（因為有豬皮，所以整好嘅鹵水汁會有膠質，啲汁凍佐之後係嗜喱狀，一遇熱，就會變返醬汁狀）
第二日早上，將麵團取出，分割成幾份。
將餡包入去，整成一個包包狀，然後再將佢壓扁。
預佐係整兩個餅仔，麵團多佐一舊，擺住等第二日再處理。
壓扁嘅生餅坯，擺係室溫下大約五分鐘，等佢醒一醒。。。
煎法：
然後平底鑊落少少油，燒到微溫，將生面坯擺入去，兩面煎成稍稍金黃色。
（依個時候凈係煎到表面有少少金黃色，入邊未夠熟）
所以，要加二湯匙嘅水入去，跟住蓋上蓋，焗佢幾分鐘。。。
咁個面皮，就會熟透至入邊啦~~~
最後要開住蓋，再煎一煎至表面香脆。。。。
前後十分鐘時間~~~（熟手的話）
俾多少少時間，即刻有一份熱辣辣，新鮮鬆軟嘅煎餅食啦`~~
餡嘅肉唔洗太多，太多會流。
啲鹵肉嘅汁，已散佈至餡餅每個角落，香噴噴~~~
用手撕開一半嘅鹵肉餅睇下，真係外層脆卜卜，內邊又香又鬆軟㗎~~~
食到老公贊不絕口~~~
一個好豐富好好味早餐~~
係喎，總有一舊多出嚟嘅麵團，點處理？
且聽下回分解~~~~
（經常有網友留言問我，係咪廚師，或者係咪學過廚？好肯定話俾大家知，我結婚之前， 係十指不沾陽春水嘅寶貝女，一切廚藝，都係婚後先慢慢開始學習，所以大家要有信心，我可以做得到嘅，你哋一定都一樣可以㗎！）
前幾日嘅早上，無乜早餐準備，就求其碌個米粉，然後碌埋一條腸仔，少少芽菜，幾粒魚肉燒賣。
都叫好豐富嘅一個早餐，老公食得幾開心~~~
晚上，滾一個開胃嘅湯水。
材料有「蕃茄、芽菜、五花肉片、少少青椒」
做法：
1、先將五花肉炒出油，然後倒入蕃茄翻炒至軟身
2、加水煮至水滾
3、落芽菜略煮，熄火後落青椒，落少少鹽俾味。
原本係想滾大醬芽菜湯，不過後嚟諗諗下，蕃茄酸咪咪，加佐大醬就會飲唔到蕃茄嘅清香，所以臨時改變，凈落鹽調味。
蕃茄湯酸咪咪得嚟，少少青椒增添少少辣意，好開胃~~~
蕃茄嘅酸意，有最天然最香純嘅味道，加埋芽菜嘅清香，天時熱飲落最寫意~~
買佐少少幾粒新鮮沙薑。
要用刀背拍蓉，味道最出。
星期日買佐隻新鮮雞，二斤幾重，細細隻，唔係咁肥，愛嚟整豉油雞就最正，可惜我倆公婆胃口真係細，一餐都食唔哂，咁第二日凈返少少雞肉，決定用新鮮沙薑爆香佢，咁又係一味餸。
雞肉唔係太多，咁就切多半條甘筍，少少青椒配搭，咁炒埋又係一大碟~~~
新鮮沙薑嘅味道好突出，雖然係隔夜餸，不過咁樣炒一炒，碟餸又生返~~~
蒸碟仔飯，一碗湯，一碟餸，搞掂~~
依排我嘅胃口真係細佐好多，一細碗仔飯已足夠。。。
而且似乎越嚟越鐘情食菜，對肉嘅感覺越嚟越遠，撈起湯入邊嘅芽菜，加埋一大匙嘅炒辣醬，撈勻一碗，都覺得好好味，成碗飯好快食哂。。。
