小菲菲俠自煮樂
上個星期六同老公去尖沙咀食飯，果晚落佐好大雨，原本諗住落住雨撐住傘，漫步雨中係好浪漫一件事，但真係無鬼用，第二日即時頭痛感冒。
第二日瞓醒之後頭痛難忍，無胃口食嘢，食佐粒感冒藥，止佐頭痛，胃口即刻嚟啦，叫老公去街市買十蚊豬肉攪碎返嚟，雪櫃總有梅菜。
老公去附近街市買肉，我係屋企就洗米，剁碎梅菜，等老公一返到嚟，壓力煲煮粥，老公買餸嘅時候，滾水浸佐兩粒瑤柱同一塊果皮，佢返到嚟剛好浸開，連米加水同瑤柱果皮一起掉入煲度，15分鐘搞掂一煲粥，另一邊開爐，蒸肉餅。
連買帶煮，半個鐘搞掂，有粥有小菜。
真係方便到爆。。。。
連老公都驚嘆，又會快成咁嘅。。。。
順手蒸埋兩個咸蛋。
雪櫃凈有少少中芹，切細細粒，掉入粥度，即時清香好多。。。。。
大人細佬都鐘意嘅梅菜蒸肉餅。。。。
搞掂。。。。
香港人應該珍惜自己擁有嘅「言論自由權」。
曾經一度，我係內地嘅網頁，所有新嘅文章擺上網，都唔會即時可以出到街，都需要過幾個鐘甚至幾日，網站後台工作人員審核之後先至可以出街，無它，因為我係敏感嘅時間有一啲唔「符合要求」嘅言論出現，之後所有嘅文章都需要特殊對待，有啲文章甚至永遠無機會出現，果刻先會知道，身為公民，連一啲最基本的權利都係無辦法為自己爭取的無力感，最令人沮喪。
係一個咁樣嘅大環境之下，唯有風花雪月，講起上嚟，最自由。
寫下食譜，講下閒話，足夠矣。。。。
~~~~~~~~~~~~~~~~~~~~~~~~~~~~~~~~~~~~~~~~~~
上個星期某日，買佐一扎通菜。
勁大一扎。
分兩份食。
葉還葉，莖還莖。。。
葉就炒佐一碟椒絲腐乳炒通菜。
強哥炒㗎，味道好好㗎，炒得火候又夠，咸度味道都拿捏得好好。。。。
要慢慢培養下佢入廚嘅興致先得，第時我有BB唔方便入廚，都有個老公可以幫下手嘛。。。。
另外，豆卜豉汁蒸排骨。
老公至愛。。。
兩味餸。
~~~~~~~~~~~~~~~~~~~~~~~~~~~~~~~~
通菜莖我提早一日炒好嘅，隔夜再翻炒總好味。。。
用蒜蓉起鑊，倒入辣椒同通菜莖，炒軟身之後，落白醋同糖俾味，搞掂。。。。
夏季食嚟最開胃。。。。
小芹菜同甘筍炒雞柳。
惹味又簡單嘅小菜。。。。
又係一個晚餐兩味餸。。。
簡單好味。。。
個天氣真係變態㗎，尋日真係凍到咧，夜晚要搵冷氣被出嚟先搞得掂。
一凍就覺得肚仔餓，即刻諗到煮一啲惹味好送飯嘅餸。
咁就煮佐一大大煲嘅「咖喱牛腩」
一人大大一碟唔洗諗。。。。
如果係平日，我會提早一日燜定，第二日再食先至入味夠腍。
因為係臨時突發性想食嘅嘢，而牛腩係需要一定時間先會煮得夠腍，時間關係，買佐牛腩返嚟，唯有先用壓力煲壓一壓腍先。
想個牛腩有個基礎嘅味道，又同咖喱味搭得到，所以係水入邊加佐「白酒、八角、草果、香葉、少少鹽」，用壓力煲煮佐十五分鐘。
就咁聞，已經好香好香啦。。。
除佐牛腩，總買佐磅牛筋。
將佢哋剪成大粒。
咁肉嘅方面就準備好啦。
配料方面，我準備佐一啲可以令咖喱更加香嘅添加物。
將二個細蘋果刨成蓉。
我用佐薑蓉刨去刨蘋果，好易刨㗎，刨得又夠蓉，好方便。。。
咖喱必不可缺嘅幾個夥伴「洋蔥、甘筍、薯仔」
加埋蘋果蓉，搞掂。。。。
加蘋果蓉除佐會香甜啲，總會令到個咖喱汁濃稠好多㗎，唔洗話落生粉果啲去人為地令到個醬汁結稠，效果好好多。。。。
屋企用哂舅母自己舂嘅咖喱料，咁唯有用咖喱粉嚟整啦。
係印尼商店買佐一大包嘅印度咖喱粉，好香好香㗎，我比較鐘意食印度味道嘅咖喱，感覺味道重啲，香好多。
個咖喱嘅炒法好簡單：
1，鑊落油，炒洋蔥炒到出香味炒到軟身，倒入咖喱粉，用油炒出香味，如果就咁落咖喱粉係無乜味㗎，要用油炒一炒先出香味，除佐咖喱粉，我總落佐啲孜然粉同芫莤籽粉增加個香味（我直接就係煲仔入邊落油炒香配料）
2，然後倒入甘筍、薯仔同蘋果蓉炒一炒
3，最後加入剪好嘅牛腩，加水，落鹽，落少少糖較個味。（糖少啲，因為蘋果蓉入邊有甜味）
4，煮大約半個鐘之後，倒入椰漿，開大火煮一煮等椰漿入味熄火，搞掂。。。。
椰漿一定唔好太早落，因為椰漿越煮出越多椰油，所以通常椰漿都會最後落煮一煮就好啦，不宜久煮。
因為先用壓力煲壓過牛腩，所以食落都好腍啦，不過如果講好味，當然係慢火煮出牛肉味先最正啦。。。不過時間關係，咁樣先壓一壓腍再煮嘅牛腩，都OK接受個味道啦。。。
老公都係食慣佐港式咖喱嘅味道，尋晚咁樣煮嘅咖喱，就好接近港式咖喱味啦，所以佢一返到屋企，已經大叫「好香啊」~~~
一食，再次大叫「好好味啊。。。。。」
咁大大一煲嘅咖喱牛腩，起碼要食幾餐啦。。。。所以老公即刻話：
「聽日晏晝我返嚟食飯」
豆腐係植物一類食材里鈣含量最高嘅食材，常食有益。
所以依日又買佐磚豆腐返嚟泡制。
好多人話豆腐無味，但係其實傳統制法出嚟嘅豆腐，係可以好香好香㗎。
依家嘅豆腐，豆係用平價嘅轉基因黃豆嚟整，為效果又靚又快，都轉用化學添加劑去做，咁整出嚟嘅豆腐，當然乜味都無啦。
買佐兩舊佈包硬豆腐，豆味都叫稍濃啲。
依次整一款又好味又簡單嘅蛋煎豆腐食。
做法：
1，豆腐切粒粒，先用少少油，將佢煎至表面金黃，咁食起上嚟，香口啲啲。
（果費事整多步，就咁擺入鑊炒一炒乾身都無問題。）
2，兩個蛋，打散，少少雞粉同麻油俾味，我有少少炒香食凈嘅豬肉，都倒埋入去，豬肉可落可唔落。
將打散嘅蛋液倒入去，煎至凝固香味出嚟即可。
3，食時以少少茄汁伴食，酸酸香香，好開胃。。。。
就咁簡單幾個步驟，又好味又簡單又有益嘅一味餸就整好啦。
另外炒碟菜。
材料好簡單：油麥菜、香菇、木耳，豆醬俾味。
係一碟好惹味嘅素菜。
加埋隔夜菜乾湯，一餐就搞掂。。。。
平靚正。。。。
~~~~~~~~~~~~~~~~~~~~~~~~~~~~~~~~~~~~
另一款雞蛋食譜，又係蛋，蒸蛋。
材料：兩隻新鮮蛋，一隻咸蛋，少少免治豬肉。（凈要咸蛋黃）
作法：
1、蛋加少少雞粉同糖較味，加水打散，水同蛋嘅比例大約係1：1
2，隔水蒸8分鐘，再焗多5分鐘。
因為蒸嘅時候，我會蓋住一個碟，唔俾啲水氣入到去，點知個碟「走氣」，有一半蓋唔到，蒸好之後，一半無水氣入嘅好滑好嫩，另一半走佐水氣嘅，老佐少少。。。
不過整佐嚟講，味道好正。。。。
食時如果覺得唔夠味，可以落少少生抽同麻油調下味。。。。
強哥至愛嘅一款蒸水蛋。。。。。
另外，用脆肉瓜一條，木耳，甘筍，肉碎炒埋一碟。。
鹽俾味足夠。。。。
又清甜又有益。。。。
兩碟餸，一個晚餐。。。。
表姐依日休半日，嚟我度搵我去行下街。
要先上嚟我度幫佢整下電腦啲嘢，本嚟講佐係去附近食粥嘅，睇到雪櫃總有啲食凈嘅雲吞皮，咁夜晚又唔係屋企食飯，想清佐啲嘢，即刻走去買佐十蚊豬肉攪碎，一斤白菜，用一部份，另一半留第二日煲個菜湯飲。
整個菜肉餛飩，簡單又快捷。
先整好個湯底。用一大匙「麻辣醬」加一大舊「沙嗲醬」少少鹽，煮滾就係最正嘅湯底啦。我再落埋啲甜粟，等湯頭再甜啲。
我落得沙嗲醬少佐啲，個湯未夠濃。
不過味道真係好好，表姐教我咁整嘅，下次又試下用依個湯底，煮擔擔面。
菜肉餛飩。就係菜同肉，詳細做法以前寫過，可以搵下我以前寫過嘅食譜。
我網誌嘅首頁可以搜索得到關鍵字。
凈返皮好少，包得十幾個。
所以加多一底面落去煮埋。
一人一大碗，舒服。。。。。
清清啲嘅菜肉餛飩，連表姐都贊好。。。。
第二日，煲佐一大煲嘅菜乾湯，落佐菜乾同新鮮白菜兩種，好好飲嘅菜乾湯。
早幾日去一間各食家大力推薦嘅食肆，其中強哥叫佐一客炒公仔面，可惜面身處理未夠好，炒得好濕，味道又太鹹，食到老公唔想出聲。
一句「都係老婆炒得好食啲」~~~
所以依日又炒佐一大煲，一人一大碟。。。
用佐叉燒絲甘筍椰菜做配料，落豉油魚露俾味，簡單又清爽。。。。
唔出街食過，又點知自己炒得好味咧，哈哈哈。。。。
