住家餸---酸辣湯、麻婆豆腐

煮餸其實係工多藝熟嘅一件事，煮佐依幾年餸，都覺得自己漸入佳境，已經可以隨手任何材料就可以搭配煮到碟餸出嚟，味道都掌握得好好，連老公都忍唔住贊賞話，依家係街食到嘅味道，都無老婆仔煮得咁好味添。。。。

 

依日煮一個強哥至愛嘅酸辣湯~~~

豆腐係上一篇提到嘅自己整㗎~~~

材料同做法可以參考我以前寫過嘅食譜

有興趣請點擊「酸辣湯食譜」

一流嘅味道~~~

 

煮多個麻婆豆腐，做法請點擊「麻婆豆腐食譜」

炒多個蒜蓉油麥菜

 

兩餸一湯，白飯任裝~~~

 

 

自製豆腐（食譜）

依一篇係電腦自動上傳我預早寫落嘅食譜。

約佐阿媽將會外游數日，預期月底之前會返嚟，依段日子會不定時上傳我預先寫好嘅嘢，咁等大家無咁掛住我嘛。。。。

所以大家嘅留言我係無辦法及時回復，還請耐心等待我回來~~~

 

廚房係每一個愛好入廚嘅人最佳嘅實驗室。

而我最鐘意係每一次發現或者諗到一個新鮮嘅食譜之後，就鑽入我嘅實驗實，認真地將想像變為現實。

睇到一個係屋企自己整豆腐嘅方法。

反正成日會整豆漿做早餐，所以依一日又整豆漿，當然，都不忘，試下自己係屋企整豆腐啦~~

咁好玩，梗係要玩一次啦~~~~

睇下所有材料：

豆漿一大碗、一個可以漏水嘅盤一個、醋一湯匙（本嚟係要白醋，我屋企剛好用完，咁唯有用黑醋代替）

做法：

1，將醋慢慢倒入已經煲好攤凍少少（大約80度）嘅豆漿度

倒入醋之後，可以見到豆漿即刻有變化，可以睇到佢會慢慢凝固成一粒粒嘅樣。

 

等多一分鐘，就可以見到出佐一層嘅水，水已經同豆分離佐~~

 

咁就搵一個紗布（我用隔豆漿嘅袋嚟整），將起佐粒粒嘅豆漿慢慢倒入去，擺上果個可以漏水嘅碟，就係咁，可以等水慢慢流出去。

 

2，然後，將豆漿掩過嚟，再將一個大碗，裝水，然後壓住係豆漿上

 

3，壓半個鐘之後，將紗佈入邊嘅豆漿返一個面，繼續壓多半個鐘~~~

半個鐘之後可以發現，出佐好多水。。。。

因為我用黑醋嘅原因，個水有少少深色。。。

一個鐘之後，開出嚟睇下~~~

哈，咁鬼少㗎。。。。。

得薄薄一層咋。。。。

 

雖然係薄薄一層，但係，可以睇到，真係豆腐咁嘅款㗎~~~

我試食佐一細細啖，咦，哈哈，真係豆腐咁嘅味道同口感㗎~~

 

因為落佐醋，係有少少少少酸味，不過可能落得唔係太多同埋都隨水流佐出嚟，所以食起上嚟，反而係無酸味，咁我就將佢切成條條。。。

拉近睇，真係豆腐嚟㗎。。。

係就係薄佐啲~~~~

不過，又唔係真係要整成磚嚟食，只不過係想玩下，睇下豆腐點整出嚟，少就少啦，無所謂。。。。

 

當晚，就用佢，整佐一煲「酸辣湯」~~~~~

鐘意將廚房當實驗實嘅你，試下，好有成就感㗎~~~

 

 

家常便飯---八角蒸雞、當歸滾雞湯

父親走的時候，我哭不出來。

百思不得其解。明明是至親，是至愛，何解失去時，反而無法哭得出來？

是後來自己分析，想來就是如此的至親，如此的深愛，因此當事情發生了，並且是如此的突然，其實我內心的最深入，是拒絕去承認事件的發生與結果。

所以才會有父親過世的時候，我完全的哭不出來，只是一臉的木然，內心當下，其實真正是感覺不到太多的悲傷。

是需要過了接近二三個月的時間，我才慢慢相信與接受永遠失去父親的事實，而後那種似被人硬生生從心臟某處強扯去一塊肉似的痛楚與難過，每晚每晚都忍不住躲在被窩里抽泣不止，直至今日，父親離開我足有12個年頭，念及父親的種種，內心深處依然會有隱隱地酸痛。

很明白那一句「子欲養而親不在」的恨。

因此與母親，總是珍惜在一起的每一天。

難得母親來我處小住數日，每日能夠煮兩味給她，聽她閒聊過往的事情，能夠陪伴左右，真的覺得自己好幸福。

炒一個芽菜，好簡單，好清甜。。。。

 

買佐一隻走地雞。

將頸同腳，少量肉斬件，出一出水，用紅棗、杞子、當歸、薑片，滾佐一個簡單的雞湯。

依款湯唔洗煲得太耐，我都係煲佐大約一個鐘左右。

 

我唔記得去雞腳嘅甲添，好彩阿媽話唔緊要，佢話咁樣煲出嚟嘅雞湯無咁油，如果斬佐腳甲，啖湯會油好多，唔知係咪安慰我先咁講定係真係有道理咧？

好清甜，好香嘅一味湯水，男人女人都飲得，好補氣嘅一款滾湯，不過最好係用新鮮雞嚟煲會好味好多㗎~~~

另外半邊，就簡單地抹一層鹽，擺幾塊八角同薑，隔水蒸20分鐘，再焗住10分鐘，蒸得剛剛好，個骨總有血，不過肉已離骨，蒸得好滑好滑。。。。

我同阿媽話我識得斬雞啦，唔洗阿媽幫手，我自己斬好碟雞，阿媽一睇到即刻好開心咁話「合格合格，斬得好正」~~~~

哈哈哈，得阿媽贊，梗開心~~

開開心心清哂佢~~~

 

 

 

晚餐----青椒炒肉碎、脆肉瓜炒肉碎

非常地巧合，父親的生忌是七月十四，死忌則為清明之日。

父母即不拜佛，亦不信教，於生死視若平常事，所以平日與母親的交談是百無禁忌更是無所顧忌，因此母親一早同我交待，它日百年之後，一切的繁文縟節均可免卻，她希望可以重返大地，以大海為最終安所地，一切的所謂拜祭形式都無關重要，一句「在心中」已經足夠。

本應如此，生不帶來，死不帶去，何必苦苦眷戀生前總總，要講嘅能講之時盡情講，想做嘅能走之時儘量做，就已足夠。

~~~~~~~~~~~~~~~~~~~~~~~~~~~~~~~~~~~~~

母親閒來無事，嚟我處小住數日。

日間陪她周圍逛逛，食下嘢，行下街，真好，在母親眼中，我永遠是她膝下嬌生慣養的小女兒，買嘢時總是搶著要幫我買單，擔心我不夠零用錢，俾佢飲茶嘅錢永遠轉個頭又再塞返入我包包度，世上，最好嘅永遠係自己阿媽。

依日無出街食，係屋企煮兩味俾阿媽。

阿媽同我一樣，好鐘意煮餸時加少少碎肉，菜會甜好多。

蒜蓉肉碎炒脆肉瓜~~~

肉碎炒青椒。

大青椒飽含大量維它命B同C，同埋難得嘅胡蘿蔔素，多食有利於脂肪嘅新陳代謝，所以耐唔耐，炒碟青椒嚟食，係好好㗎。

 

買半斤燒肉，唔洗落油，就咁慢慢火煎返香脆，都好好味㗎。。。。

 

滾多一個芫莤豆腐湯，三個人，三餸一湯。

 

 

變種生炒骨之「生炒豬扒粗」

晏畫自己一個，通常一個蘋果或者一個橙已經可以打發。

係好細食嘅一個人。

通常一細細碗仔飯已經足夠。

尋日晏畫買餸返嚟得早，咁見有餸，咪就蒸佐半嘜米嚟當晏畫果餐食囉，點知原來半嘜米都係食唔哂㗎，因為一餐飯，都係咁一細細碗仔已經足夠。

買佐一舊豬扒肉，叫豬肉佬唔洗幫我切片，返嚟自己切。

咁就切佐少少，簡單地用豉油糖生粉醃好味，再切少少青紅甜椒去伴炒。

除佐用蒜蓉起鑊，凈係落少少雞粉俾味，就炒好了。

我發現反而係初學煮餸時，最鐘意落依樣落果樣調味，實在係對自己嘅廚藝信心不夠，所以希望以稍重嘅味道去掩飾自己嘅不自信。

反而係依家，對入廚已經略有體會，好清楚點樣可以將食物帶出佢最佳，最本原嘅一面，反而各式調味用得少佐，更多係著重於炒嘅火候同先後次序，發覺只要炒法得宜，基本上簡單地用少少鹽去調味，都可以係一碟好夠味，好食得出食材本身配搭之後最應有嘅本原嘅味道。

晏畫依餐，一個白飯，一個小菜，足矣~~

~~~~~~~~~~~~~~~~~~~~~~~~~~~~~~~~~~~

買佐一舊豬扒肉，凈係切佐少少晏畫自己炒嚟食，凈返嘅，就愛嚟整佐一味變異版嘅生炒骨嚟食。。。

生炒骨嘅食譜請點擊「生炒骨食譜」。

做法係一模一樣，只不過係將排骨，轉成豬扒肉切成嘅粗條。

 

炸得金黃酥脆，我就咁食，都覺得好好味，忍唔住，偷食佐好多咧。。。

 

啖啖肉，唔怕咬到骨，正~~~~

甜甜酸酸，勁開胃~~~

買佐少少韭菜，加埋甘筍，兩隻蛋，炒埋又一碟~~~

 

只簡單地用雞粉俾味，好食得到韭菜獨有嘅香味同甘筍的爽甜~~~~

係好滿足嘅一餐`~~~